নতুন দিল্লী
প্ৰধানমন্ত্ৰী শ্ৰী নৰেন্দ্ৰ মোদীয়ে দেওবাৰে কয় যে দেশৰ জেন-জেড (Gen-Z)ৰ দৃঢ়তাই হৈছে ‘উন্নত ভাৰত’ৰ সৰ্বশ্ৰেষ্ঠ শক্তি। প্ৰধানমন্ত্ৰীয়ে তেওঁৰ মাহেকীয়া ৰেডিঅ' অনুষ্ঠান 'মন কী বাত'ৰ ১২৮সংখ্যক সংস্কৰণত কয়, ‘‘যদি হৃদয়ত দৃঢ়তা থাকে, যদি দলবদ্ধভাৱে কাম কৰাৰ সামূহিক শক্তিৰ ওপৰত বিশ্বাস থাকে, যদি পৰাজয়ৰ পিছতো পুনৰ যুঁজাৰ সাহস থাকে, তেন্তে কঠিন সময়তো সফলতা নিশ্চিত।’’
তেওঁ লগতে কয়, "সেই সময়ৰ কথা ভাবকচোন, যিসময়ত ছেটেলাইট, জিপিএছ আৰু নেভিগেচনৰ সুবিধা নাছিল, সেই সময়তো আমাৰ নাৱিকসকলে ডাঙৰ ডাঙৰ জাহাজত যাত্ৰা কৰিছিল আৰু নিজৰ গন্তব্য স্থানত উপনীত হৈছিল। এতিয়া সমুদ্ৰৰ বাহিৰেও পৃথিৱীৰ বিভিন্ন দেশে অসীম মহাকাশৰ পৰিসৰৰ পৰিমাপণ কৰিছে৷ প্ৰত্যাহ্বান এতিয়াও একেই আছে- যদি জিপিএছ, যোগাযোগ নাথাকে, তেন্তে আমি কেনেকৈ আগবাঢ়িম?’’
এটা উদাহৰণ উল্লেখ কৰি প্ৰধানমন্ত্ৰীয়ে কয় যে তেওঁ ইছ’ৰোৰ ড্ৰোন প্ৰতিযোগিতাৰ এটা ভাইৰেল ভিডিঅ' ছ'চিয়েল মিডিয়াত দেখিছিল য'ত জেন-জেডে তেওঁলোকৰ দক্ষতা প্ৰদৰ্শন কৰিছিল।
তেওঁ কয় যে এই ভিডিঅ'ত দেশৰ যুৱক-যুৱতীসকলে, বিশেষকৈ আমাৰ জেন-জেডৰ যুৱক-যুৱতীসকলে মঙল গ্ৰহৰ দৰে পৰিস্থিতিত ড্ৰোন উৰুৱাবলৈ চেষ্টা কৰিছিল। ড্ৰোনবোৰ ওপৰলৈ উঠে, কিছুসময়ৰ বাবে স্থিৰ হৈ থাকে, তাৰ পিছত হঠাৎ মাটিত পৰি যায়।
প্ৰধানমন্ত্ৰীয়ে পুনৰ কয়, ‘‘আপোনালোকে জানে কিয়? কাৰণ এই ড্ৰোনবোৰত কোনো জিপিএছৰ সহায় নাছিল। মঙল গ্ৰহত জিপিএছ সম্ভৱ নহয়। সেইবাবে ড্ৰোনে বাহ্যিক কোনো সংকেত বা নিৰ্দেশ গ্ৰহণ কৰিব নোৱাৰে। কেমেৰা আৰু ছফ্টৱেৰ ব্যৱহাৰ কৰি ড্ৰোনক উৰোৱা হয়। সৰু ড্ৰোনে মাটিৰ পেটাৰ্ণ চিনাক্ত কৰিব লাগে, উচ্চতা জুখিব লাগে, বাধাবোৰ বুজি উঠিব লাগে আৰু নিজে নিজে নিৰাপদ অৱতৰণৰ পথ উলিয়াব লাগে। সেইবাবেই ড্ৰোনবোৰ এটা এটাকৈ বাগৰি পৰিছিল।’’
প্ৰধানমন্ত্ৰীয়ে কয় যে এই প্ৰতিযোগিতাত পুনেৰ যুৱক-যুৱতীসকলৰ এটা দলে সফলতা লাভ কৰে৷ তেওঁলোকৰ ড্ৰোন বহুবাৰ দুৰ্ঘটনাত পতিত হ'লেও তেওঁলোকে হাৰ নামানে আৰু বহুবাৰ প্ৰচেষ্টা চলাই অৱশেষত মঙল গ্ৰহ সদৃশ অৱস্থাত কিছু সময় উৰাবলৈ সক্ষম হয়। ভিডিঅ'টো দেখি প্ৰধানমন্ত্ৰীৰ চন্দ্ৰযান-২ৰ সৈতে যোগাযোগ বিচ্ছিন্ন হোৱাৰ কথা মনত পৰে।
প্ৰধানমন্ত্ৰীয়ে কয় যে সেইদিনা সমগ্ৰ দেশ, বিশেষকৈ আমাৰ বিজ্ঞানীসকল কিছু সময়ৰ বাবে হতাশ হৈছিল। কিন্তু এই বিফলতাই তেওঁলোকক বাধা দিব পৰা নাই। সেইদিনাৰ পৰাই তেওঁলোকে চন্দ্ৰযান-৩ৰ সফলতাৰ কাহিনী লিখিবলৈ আৰম্ভ কৰিছিল। সেইবাবেই চন্দ্ৰযান-৩ৰ সফল অৱতৰণ কেৱল মিছনৰ সফলতা নহয়, বৰঞ্চ বিফলতাৰ মাজৰ পৰা জন্ম হোৱা আত্মবিশ্বাসৰ জয়।
প্ৰধানমন্ত্ৰীয়ে পুনৰ কয়, ‘‘এই ভিডিঅ'ত মই যুৱকসকলৰ চকুত সেই একেই উৎসাহ দেখিবলৈ পাইছো। যেতিয়া মই আমাৰ যুৱ প্ৰজন্মৰ উৎসাহ আৰু বিজ্ঞানীসকলৰ প্ৰতিশ্ৰুতি সাক্ষী হওঁ, মোৰ হৃদয় উৎসাহেৰে ভৰি পৰে। আমাৰ যুৱক-যুৱতীসকলৰ দৃঢ়তাইই হৈছে উন্নত ভাৰতৰ সৰ্বশ্ৰেষ্ঠ শক্তি।’’
