গুৱাহাটী
অসমজুৰি পেট্ৰ’ল, ডিজেল আৰু ৰন্ধন গেছ (এলপিজি)কে ধৰি সকলো ধৰণৰ তৈল সামগ্ৰীৰ যোগান সম্পূৰ্ণ স্বাভাৱিক হৈ আছে বুলি সোমবাৰে কেন্দ্ৰীয় তেল আৰু প্ৰাকৃতিক গেছ মন্ত্ৰালয়ে জানিবলৈ দিয়ে। একে সময়তে সাধাৰণ জনতাক স্বাভাৱিকভাৱে ইন্ধন ব্যৱহাৰ অব্যাহত ৰাখিবলৈ আৰু আতংকিত হৈ অপ্রয়োজনীয়ভাৱে অধিক পৰিমাণে ইন্ধন ক্ৰয় নকৰিবলৈ আহ্বান জনোৱা হৈছে।
মন্ত্ৰালয়ৰ এক বিবৃতিত কোৱা হয় যে অসমত তৈল উদ্যোগৰ ৰাজ্যিক সমন্বয়ক তথা ইণ্ডিয়ান অইলৰ কাৰ্যবাহী সঞ্চালক আৰু ৰাজ্যিক মুৰব্বীয়ে জনাইছে যে পেট্ৰ’ল, ডিজেল আৰু তৰলীকৃত পেট্ৰ’লিয়াম গেছ (এলপিজি)কে ধৰি অত্যাৱশ্যকীয় তৈল সামগ্ৰীৰ উপলব্ধতা ৰাজ্যজুৰি স্বাভাৱিক আৰু বিঘ্নহীন হৈ আছে।
বিবৃতিটোত উল্লেখ কৰা হয়, “ৰাজহুৱা খণ্ডৰ তেল বিপণন কোম্পানীসমূহ — ইণ্ডিয়ান অইল কৰ্প’ৰেচন লিমিটেড (IOCL), ভাৰত পেট্ৰ’লিয়াম কৰ্প’ৰেচন লিমিটেড (BPCL) আৰু হিন্দুস্তান পেট্ৰ’লিয়াম কৰ্প’ৰেচন লিমিটেড (HPCL)-এ সকলো যোগান কেন্দ্ৰত পৰ্যাপ্ত পৰিমাণৰ ইন্ধন মজুত ৰাখিছে। ফলত সমগ্ৰ অঞ্চলটোৰ যোগান ব্যৱস্থা স্থিতিশীল হৈ আছে।”
মন্ত্ৰালয়ে কয়, “সাধাৰণ জনতাক নিশ্চিন্ত থাকিবলৈ অনুৰোধ জনোৱা হৈছে। সকলোৱে স্বাভাৱিক ব্যৱহাৰ অব্যাহত ৰাখিব লাগে আৰু আতংকিত হৈ অধিক ইন্ধন সংগ্ৰহ কৰাৰ পৰা বিৰত থাকিব লাগে। ইন্ধনৰ উপলব্ধতা সম্পৰ্কে সঠিক আৰু নিশ্চিত তথ্যৰ বাবে গ্ৰাহকসকলক কেৱল তেল বিপণন কোম্পানীসমূহৰ চৰকাৰী ঘোষণাৰ ওপৰতেই নিৰ্ভৰ কৰিবলৈ পৰামৰ্শ দিয়া হৈছে।”
বিবৃতিটোত আৰু কোৱা হয় যে টাৰ্মিনেল, ডিপো আৰু খুচুৰা বিক্ৰয় কেন্দ্ৰসমূহকে ধৰি সমগ্ৰ ইন্ধন যোগান শৃংখলা সুচাৰুৰূপে আৰু কোনো ধৰণৰ ব্যাঘাত নোহোৱাকৈ চলি আছে।
“ৰাজ্যৰ সকলো স্থানতে ইন্ধনৰ মজুত নিয়মীয়াভাৱে পৰ্যবেক্ষণ কৰা হৈছে আৰু পুনৰ যোগান ব্যৱস্থাও মসৃণভাৱে আগবাঢ়িছে,” বুলি চৰকাৰী বিজ্ঞপ্তিত উল্লেখ কৰা হয়।
ঘৰুৱা গ্ৰাহকসকলৰ বাবে এলপিজি যোগানক বিশেষ অগ্ৰাধিকাৰ দিয়া হৈছে আৰু ৰাজ্যজুৰি ইয়াৰ যোগান স্বাভাৱিক হৈ আছে বুলিও মন্ত্ৰালয়ে জানিবলৈ দিয়ে।
বিবৃতিটোত কোৱা হয়, “সকলো গ্ৰাহকৰ ওচৰলৈ বিঘ্নহীনভাৱে ইন্ধন যোগান নিশ্চিত কৰিবলৈ পৰিস্থিতিৰ ওপৰত নিবিড় নজৰ ৰখা হৈছে।”
ইয়াৰ উপৰিও, সমগ্ৰ অঞ্চলটোত ইন্ধনৰ অবিৰত আৰু সুলভ উপলব্ধতা নিশ্চিত কৰিবলৈ তেল উদ্যোগে পৰিবহণ ব্যৱস্থা, মজুত স্থানান্তৰ আৰু খুচুৰা বিক্ৰয় কাৰ্যকলাপৰ ক্ষেত্ৰত ঘনিষ্ঠ সমন্বয় বজাই ৰাখিছে বুলি মন্ত্ৰালয়ে উল্লেখ কৰে।
