নতুন দিল্লী
কাটাৰৰ দোহা চহৰত বিখ্যাত ভাৰতীয় চিত্ৰশিল্পী প্ৰয়াত মকবুল ফিদা হুছেইন (এমএফ হুছেইন)ক স্মৰণ কৰি এটা সংগ্ৰহালয় মুকলি কৰা হৈছে। তেওঁ ভাৰতৰ বাহিৰত থাকিব লগা হৈছিল কাৰণ তেওঁৰ হিন্দু দেৱতাৰ চিত্ৰ অঁকাকলৈ বহু বিতৰ্কৰ সৃষ্টি হৈছিল। তেওঁ বহু বছৰ কাটাৰত বসবাস কৰিছিল আৰু দেশখনক ভাল পাইছিল।
সংগ্ৰহালয়টোত প্ৰয়াত শিল্পীগৰাকীৰ চিত্ৰ, ছবি, বস্ত্ৰশিল্প, ফটো, ব্যক্তিগত সামগ্ৰীকে ধৰি ১৫০ টাতকৈও অধিক কৰ্মৰাজি সংৰক্ষণ কৰা হৈছে। ইয়াৰে কিছুমান প্ৰথমবাৰৰ বাবে ৰাজহুৱাভাৱে প্ৰদৰ্শন কৰা হৈছে বুলি কাটাৰৰ সংবাদ মাধ্যমে প্ৰকাশ কৰিছে।
কাটাৰ ফাউণ্ডেশ্যনৰ অধ্যক্ষ শ্বেইখা মোজা বিণ্ট নাছেৰে প্ৰয়াত ভাৰতীয় শিল্পী মকবুল ফিদা হুছেইনৰ উত্তৰাধিকাৰ উদযাপনৰ বাবে এডুকেচন চিটিত ‘লাউহ ৱা কালাম’ সংগ্ৰহালয় উদ্বোধন কৰে।
নাছেৰে কয়; "হুছেইন এনে এজন কিংবদন্তি শিল্পী এজন প্ৰকৃত মাষ্টৰ যাৰ কলাত্মক কৰ্মই সীমা অতিক্ৰম কৰি সংস্কৃতি, ইতিহাস আৰু পৰিচয়ক সংযোগ কৰে বুলি বৰ্ণনা কৰিছে।"
তেখেতে কয় যে "সংগ্ৰহালয়টোৱে প্ৰয়াত শিল্পীগৰাকীৰ সপোন পূৰণ কৰে, তেওঁৰ জীৱন আৰু কৰ্মৰ উল্লেখযোগ্য দিশসমূহ প্ৰদৰ্শনৰ বাবে স্থান প্ৰদান কৰিছে।"
মুকলিৰ পিছত শ্বেইখা মোজাই হুছেইনৰ কলাত্মক যাত্ৰাৰ সন্ধান কৰা সংগ্ৰহালয়টোৰ গেলেৰীসমূহ ভ্ৰমণ কৰি বিশ্বাস, দৰ্শন, সাংস্কৃতিক বৈচিত্ৰ্য আৰু তেওঁৰ য়েমেনৰ শিপাৰ বিষয়বস্তু অন্বেষণ কৰে। আৰব সভ্যতাৰ সৈতে তেওঁৰ জড়িততা আৰু বৈচিত্ৰ্যৰ মাজত ঐক্যৰ সন্ধানো এই সংগ্ৰহালয়টোৱে প্ৰতিফলিত কৰে।
অনুষ্ঠানত কাটাৰ ফাউণ্ডেশ্যনৰ উপাধ্যক্ষ শ্বেইখা হিন্দ বিন্ত হামাদ আল-থানী; ৰয়েল পৰিয়ালৰ সদস্য, শ্বেখ আৰু মন্ত্ৰীসকলৰ লগতে শিল্প সংগ্ৰাহক আৰু বিশেষজ্ঞ উপস্থিত থাকে।
ইয়াত কাটাৰ ফাউণ্ডেশ্যনৰ নিৰ্দেশনাত ২০১৯ চনত মৰণোত্তৰভাৱে সম্পূৰ্ণ হোৱা শিল্পীগৰাকীৰ চূড়ান্ত মাষ্টাৰপিছ "Seeroo fi al ardh" আছে।
হুছেইনে নিজেই ডিজাইন কৰা এই সংগ্ৰহালয়টোৱে শৈক্ষিক আৰু সাংস্কৃতিক কেন্দ্ৰ হিচাপে কাম কৰে, যিয়ে দৰ্শনাৰ্থীসকলক তেওঁৰ সৃষ্টিশীল যাত্ৰা অন্বেষণ কৰিবলৈ উৎসাহিত কৰে।
সুবিধাসমূহৰ ভিতৰত আছে পুথিভঁৰাল, সৃষ্টিশীলতাৰ কোণ, উপহাৰৰ দোকান, কেফে, বক্তৃতা আৰু অনুষ্ঠানৰ বাবে হ'ল। শনিবাৰৰ পৰা বৃহস্পতিবাৰলৈ, পুৱা ১০ বজাৰ পৰা বিয়লি ৫ বজালৈ, আৰু শুকুৰবাৰে ১:৩০ বজাৰ পৰা ৭:৩০ বজালৈ, সোমবাৰ আৰু ৰাজহুৱা বন্ধৰ দিনত বন্ধ থাকিব।
