শংকৰদেৱৰ কলা-সংস্কৃতিক অসমৰ সীমা পাৰ কৰাই পশ্চিম বংগত প্ৰতিষ্ঠিত কৰাৰ আঁৰত আছে দুগৰাকী বঙালী লোক। তেওঁলোকৰ এজন হৈছে মেঘালয়ৰ তুৰাৰ প্ৰবীৰ দাস, আৰু আনজন হৈছে ত্ৰিপুৰাৰ সুজিত চক্ৰৱৰ্তী। যদিও শংকৰদেৱে জীৱনৰ এছোৱা কাল পশ্চিম বংগৰ কোচবিহাৰত থাকি মধুপুৰ সত্ৰ আৰু নামঘৰ প্ৰতিষ্ঠা কৰিছিল আৰু তাতে মৃত্যুবৰণ কৰিছিল, তথাপি পশ্চিম বংগৰ বাবে শংকৰদেৱ সামগ্ৰিকভাৱে এগৰাকী অখ্যাত ব্যক্তি আছিল। 

"২০১৬ চনত মই নগাঁৱৰ বৰদোৱা থানলৈ গৈছিলো আৰু তাতেই সঞ্জীব বৰকাকতিক লগ পাইছিলোঁ, যিয়ে ছ'চাইটি অৱ শ্ৰীমন্ত শংকৰদেৱ প্ৰতিষ্ঠা কৰিছে। এই ছ'চাইটিয়ে ভাৰত আৰু বিদেশত মহাপুৰুষ শ্ৰীমন্ত শংকৰদেৱৰ আদৰ্শ প্ৰচাৰৰ ক্ষেত্ৰত বহু ভাল কাম কৰি আছে। তেওঁ শংকৰদেৱৰ বিষয়ে সবিশেষ মোৰ আগত বৰ্ণনা কৰিছিল আৰু শংকৰদেৱৰ বিভিন্ন গ্ৰন্থ দি মোক সহায় কৰিছিল।’-দাসে কয়।

প্ৰবীৰ দাসে উল্লেখ কৰে যে কলকাতাৰ গোলপাৰ্ক ৰাম কৃষ্ণ মিছনত তেওঁ শংকৰদেৱৰ বিষয়ে কৈছিল আৰু তেতিয়া সেই মিছনৰ মূৰব্বী সন্ন্যাসীজনে শংকৰদেৱৰ জীৱনীত হাত থৈ শংকৰদেৱক সন্মান জনাইছিল আৰু অসমৰ মহান পুৰুষজনাক লৈ প্ৰায় ৪৫ মিনিটৰ এটা বক্তৃতা প্ৰদান কৰিছিল। 

চক্ৰৱৰ্তীয়ে কয় যে জয়নগৰৰ ৮.৫ কঠা মাটি বিষ্ণু ৰঞ্জন ঘটকে দান কৰে আৰু সত্ৰীয়া কেন্দ্ৰ আৰু নামঘৰ স্থাপনৰ প্ৰতি আগ্ৰহ প্ৰকাশ কৰা স্থানীয় ৰাইজৰ মাজৰ পৰা এখন সমিতি গঠন কৰা হৈছে। ইয়াত লাই খুটা স্থাপন কৰা এক অনুষ্ঠানো সম্পন্ন হৈছিল।