শিক্ষাৰ্থীৰ আত্মহত্যা, অস্বাভাৱিক মৃত্যুৰ ক্ষেত্ৰত তৎকালীনভাৱে FIR দাখিল কৰিবলৈ শিক্ষানুষ্ঠানসমূহক নিৰ্দেশ উচ্চতম ন্যায়ালয়ৰ
নতুন দিল্লী
কেতিয়াবা আত্মহত্যা, কেতিয়াবা ৰাগিং, কেতিয়াবা ৰহস্যজনক মৃত্যু। উচ্চ শিক্ষাৰ প্ৰতিষ্ঠানসমূহত এনেধৰণৰ ঘটনা প্ৰায়েই সংঘটিত হৈ থাকে। কিন্তু বহুক্ষেত্ৰত FIR দাখিল কৰা নহয়। উচ্চতম ন্যায়ালয়ে এই সন্দৰ্ভত কঠোৰ নিৰ্দেশনা জাৰি কৰিছে। ন্যায়াধীশ জে বি পাৰ্ডিৱালা আৰু ন্যায়াধীশ আৰ মহাদেৱনৰ সংমণ্ডল বিচাৰপীঠে স্পষ্ট নিৰ্দেশনা জাৰি কৰিছে যে কোনো শিক্ষাৰ্থীৰ আত্মহত্যা বা অস্বাভাৱিক মৃত্যুৰ ঘটনা পোহৰলৈ আহিলে লগে লগে আৰক্ষীক অৱগত কৰিব লাগিব। অন্যথা আদালত অৱমাননাৰ গোচৰ ৰুজু কৰা হ'ব।
উচ্চতম ন্যায়ালয়ে যোৱা বছৰৰ জুন মাহত ছাত্ৰ-ছাত্ৰীৰ মৃত্যুৰ ঘটনাক লৈ এক নিজাববীয়া গোচৰ ৰুজু কৰিছিল। প্ৰতি বছৰে আত্মহত্যা আৰু অস্বাভাৱিক মৃত্যুৰ প্ৰতিবেদন দাখিল কৰিবলৈ নিৰ্দেশ দিয়া হৈছে। বিচাৰপীঠৰ পৰ্যবেক্ষণ, কোনো ছাত্ৰৰ অস্বাভাৱিক মৃত্যু বা আত্মহত্যাৰ ঘটনাত তৎক্ষণাৎ FIR দাখিল কৰিব লাগিব। সেয়া কলেজ কেম্পাছেই হওক, হোষ্টেলেই হওক বা আন কোনোবা। অনলাইন বা অফলাইন সকলো শিক্ষাৰ্থীৰ বাবে এই নিৰ্দেশনা প্ৰযোজ্য হ'ব।
উচ্চতম ন্যায়ালয়ে সকলো আবাসিক উচ্চ শিক্ষানুষ্ঠানত ২৪ ঘণ্টাই চিকিৎসা সেৱা প্ৰদান কৰিবলৈ নিৰ্দেশ দিয়ে। যদিহে কেম্পাছত চিকিৎসা প্ৰদান কৰাটো সম্ভৱ নহয়, তেন্তে অতি কমেও এক কিলোমিটাৰ ব্যাসাৰ্ধৰ ভিতৰত জৰুৰীকালীন চিকিৎসা প্ৰদানৰ ব্যৱস্থা কৰিব লাগিব।
বহু চৰকাৰী আৰু ব্যক্তিগত শিক্ষানুষ্ঠানত শিক্ষকৰ অভাৱ হোৱা বুলি অভিযোগ উত্থাপিত হৈছে। সংমণ্ডল বিচাৰপীঠে অহা চাৰি মাহৰ ভিতৰত পদ পূৰণৰ নিৰ্দেশ দিছে। তদুপৰি, অশিক্ষক কৰ্মচাৰীসকলৰ পদ পূৰণৰ বাবেও নিৰ্দেশ দিয়া হৈছে। সংমণ্ডল বিচাৰপীঠে ভৱিষ্যতে খালী হোৱা পদসমূহ এমাহৰ ভিতৰত পূৰণ কৰাৰ নিয়ম প্ৰৱৰ্তন কৰিবলৈ নিৰ্দেশ দিছে৷
উচ্চতম ন্যায়ালয়ে কেন্দ্ৰীয় আৰু ৰাজ্য চৰকাৰসমূহলৈও এক নিৰ্দেশনা জাৰি কৰিছে। ইয়াৰ ভিতৰত আছে আগন্তুক চাৰিমাহৰ ভিতৰত বৃত্তিৰ ধন পৰিশোধ কৰা। আদালতে স্পষ্ট কৰি দিছে যে বৃত্তি প্ৰদানৰ তাৰিখটো কৰ্তৃপক্ষক আগতীয়াকৈ জনাব লাগিব। উচ্চতৰ শিক্ষা প্ৰতিষ্ঠানসমূহত কেলেংকাৰি প্ৰতিৰোধৰ বাবে ইউজিচি নিয়ম ২০০৯ আৰু আন প্ৰাসংগিক বিধিসমূহ পালন কৰিবলৈও নিৰ্দেশ দিয়া হৈছে।
.webp)
