নতুন দিল্লী
কৰ্পৰেট ইনভেষ্টিগেচন এণ্ড ৰিস্ক কনচালটিং ফাৰ্ম ক্ৰ’লৰ এক প্ৰতিবেদন অনুসৰি অভিনেতা ৰণবীৰ সিং হৈছে ২০২২ চনৰ ভাৰতৰ আটাইতকৈ মূল্যৱান চেলিব্ৰিটি।
$১৮১.৭ মিলিয়ন ব্ৰেণ্ড মূল্যৰে সিঙে পাঁচ বছৰ ধৰি শীৰ্ষস্থান দখল কৰা ক্ৰিকেটাৰ বিৰাট কোহলীক শীৰ্ষ স্থানৰ পৰা নমাই আনিছে বুলি “চেলিব্ৰিটি ব্ৰেণ্ড ভেলুৱেশ্যন ৰিপ’ৰ্ট ২০২২: বিয়ণ্ড দ্য মেইনষ্ট্ৰিম” শীৰ্ষক প্ৰতিবেদনত প্ৰকাশ পাইছে।
$১৭৬.৯ মিলিয়ন ব্ৰেণ্ড মূল্যৰে দ্বিতীয় স্থানলৈ নামি আহিল কোহলী। পুৰুষ ক্ৰিকেট দলৰ অধিনায়কত্ব এৰি অহাৰ পিছত একেৰাহে দুবছৰ ধৰি তেওঁৰ ব্ৰেণ্ড মূল্য হ্ৰাস পাইছে। ২০২২ চনত তেওঁৰ ব্ৰেণ্ড মূল্য $২৩৭ মিলিয়নৰ ওপৰত আছিল, যদিও ২০২১ চনত ইয়াৰ মূল্য তীব্ৰভাৱে হ্ৰাস পাই $১৮৫.৭ মিলিয়ন হয়।
$১৫৩.৬ মিলিয়নৰ ব্ৰেণ্ড মূল্যৰে তৃতীয় স্থানত আছে অভিনেতা অক্ষয় কুমাৰ। $১০২.৯ মিলিয়ন মূল্যৰে অভিনেত্ৰী আলিয়া ভাটেও চতুৰ্থ স্থান আৰু আটাইতকৈ মূল্যৱান মহিলা চেলিব্ৰিটিৰ খিতাপ অক্ষুণ্ণ ৰাখিছে।
দীপিকা পাডুকনৰ ব্ৰেণ্ড মূল্য $৮২.৯ মিলিয়নেৰে পঞ্চম স্থান লাভ কৰে। অমিতাভ বচ্চন, হৃতিক ৰোশন আৰু শ্বাহৰুখ খান ছবি জগতৰ আন আন ডাঙৰ নাম আছিল। যিসকলে সৰ্বাধিক মূল্যৱান চেলিব্ৰিটিৰ শীৰ্ষ ১০ খন তালিকাত স্থান লাভ কৰিছিল।
$৮০ কোটিৰ ওপৰত ব্ৰেণ্ড মূল্যৰে তালিকাৰ ষষ্ঠ স্থান দখল কৰে প্ৰাক্তন ক্ৰিকেটাৰ এম এছ ধোনীয়ে। ইফালে, ভাৰতীয় ক্ৰিকেটৰ প্ৰাক্তন আইকন শচীন টেণ্ডুলকাৰে ২০২২ চনত শীৰ্ষ ১০ ক্লাবত প্ৰৱেশ কৰি $৭৩.৬ মিলিয়ন ব্ৰেণ্ড মূল্যৰে অষ্টম স্থান লাভ কৰিছিল।
মন কৰিবলগীয়া যে ২০২২ চনত শীৰ্ষ ২৫ গৰাকী চেলিব্ৰিটিৰ সামগ্ৰিক ব্ৰেণ্ড মূল্য $১.৬ বিলিয়ন বুলি অনুমান কৰা হৈছে। যি ২০২১ চনৰ তুলনাত প্ৰায় ২৯.১ শতাংশ বৃদ্ধি পাইছে। আৰু প্ৰথমবাৰৰ বাবে দক্ষিণ ভাৰতৰ তাৰকা আল্লু অৰ্জুন আৰু ৰশ্মিকা মাণ্ডন্নাই ভাৰতৰ শীৰ্ষ ২৫ গৰাকী সৰ্বাধিক মূল্যৱান চেলিব্ৰিটিৰ তালিকাত স্থান লাভ কৰিছে।
অলিম্পিকৰ স্বৰ্ণ পদক বিজয়ী নীৰজ চোপ্ৰাইও কমনৱেলথৰ স্বৰ্ণ পদক বিজয়ী পিভি সিন্ধুৰ সৈতে শীৰ্ষ ২৫ ৰ ভিতৰত স্থান লাভ কৰিছে। দুয়ো গৰাকীৰে মূল্য আছিল $২৬.৫ মিলিয়ন।
ক্ৰ’লে কয় যে, “এইবাৰৰ অধ্যয়নৰ বিষয়বস্তু হৈছে “বিয়ণ্ড দ্য মেইনষ্ট্ৰিম।” যিয়ে ক্ৰীড়া তাৰকাৰ লগতে দক্ষিণ ভাৰতীয় তাৰকাসকলক শক্তিশালী ব্ৰেণ্ড এণ্ডাৰছাৰ হিচাপে স্বীকৃতি দিয়ে।”
তেওঁ লগতে কয়, ‘২০২২ বক্স অফিচত দক্ষিণ ভাৰতীয় চিনেমাৰ বাবে দ্বিতীয়টো সফল ৰ্ষ আছিল। যাৰ ফলত ৰাষ্ট্ৰীয় পৰ্যায়ত বিজ্ঞাপন আৰু সংবাদ মাধ্যম উদ্যোগত বহু টলিউডৰ মুখৰ সন্ধান পোৱা গৈছে।
তদুপৰি, কমনৱেলথ গেমছৰ পিছত অলিম্পিকত এক সুন্দৰ প্ৰদৰ্শনেৰে ভাৰতীয় ক্ৰীড়া তাৰকাসকলে কেইবাটাও মাৰ্কিন এণ্ডোৰ্চমেণ্ট লাভ কৰি আহিছে। সীমিত বক্স অফিচ সংগ্ৰহৰ সৈতে বলীউডৰ তাৰকাসকলৰ পৰা কম প্ৰতিযোগিতাৰ বাবে লাভৱান হৈছে।
