নতুন দিল্লী
আজিৰে পৰা বন্ধ হব স্কাইপ ৷ মাইক্ৰ’ছফ্ট এ ঘোষণা কৰিছে এই কথা ৷ স্কাইপ ব্যৱহাৰকাৰীসকলে 'মাইক্ৰ’ছফ্ট টীমছ'ৰ বিনামূলীয়া সংস্কৰণলৈ যোৱাৰ বিকল্প থাকিব, যিয়ে অন্যান্য কাৰ্যক্ষমতাৰ উপৰিও একেধৰণৰ মূল বৈশিষ্ট্য প্ৰদান কৰি আহিছে। যিসকল ব্যৱহাৰকাৰীয়ে তেওঁলোকৰ স্কাইপ একাউণ্ট ব্যৱহাৰ কৰি 'টীমছ'ৰ বিনামূলীয়া সংস্কৰণত লগ ইন কৰে তেওঁলোকৰ চেট আৰু যোগাযোগসমূহ এপটোৰ সৈতে ছিংক কৰা হ’ব। অৰ্থাৎ পুৰণি স্কাইপ ব্যৱহাৰকাৰীয়ে য’ৰ পৰা বন্ধ কৰিছিল তাৰ পৰাই আৰম্ভ কৰিব পাৰিব।
তদুপৰি যিসকল ব্যৱহাৰকাৰীয়ে 'মাইক্ৰ’ছফ্ট টীমছ' ব্যৱহাৰ কৰিব নিবিচাৰে, তেওঁলোকে ইয়াৰ পৰিৱৰ্তে তেওঁলোকৰ স্কাইপ ডাটা এক্সপ’ৰ্ট কৰি প্লেটফৰ্ম এৰি যোৱাটো বাছি ল’ব পাৰে। যিসময়ত বিশ্বৰ এটা প্ৰান্তৰ পৰা আনটো প্ৰান্তলৈ আত্মীয়-স্বজন, বন্ধু-বান্ধৱৰ সৈতে যোগাযোগ স্থাপন কৰাৰ সময়ত যথেষ্ট অসুবিধাৰ সৃষ্টি হৈছিল আৰু সেই সময়ত দূৰৈত থকা আত্মীয়ৰ সৈতে টেলিফোনযোগে সংযোগ স্থাপন কৰাটো আছিল যথেষ্ট ব্যয়বহুল প্ৰক্ৰিয়া৷ এই সমস্যাৰ সমাধান সূত্ৰ হিচাপে মুকলি কৰা হৈছিল স্কাইপ৷
২০০৩ চনত স্কাইপ মুকলি কৰা হৈছিল৷ VOIP বা ভইচ অভাৰ ইণ্টাৰনেট প্ৰট’ক’ল এই দুটা প্ৰযুক্তিৰ সহায়ত টেলিফোনৰ পৰিৱৰ্তে ইণ্টাৰনেটৰ জৰিয়তে কল কৰাটো সম্ভৱ হৈ পৰিছিল৷ এই ব্যৱস্থাই দূৰৈত থকা আত্মীয়-স্বজনৰ সৈতে সংযোগ স্থাপন কৰাটো কম ব্যয়বহুল কৰি তুলিছিল৷ মাইক্ৰ’ছফটে ২০১১ চনত ৮.৫ বিলিয়ন ডলাৰত স্কাইপ ক্ৰয় কৰিছিল। দুৰ্ভাগ্যজনকভাৱে স্কাইপ এ অন্যান্য আধুনিক টেলিফোনি এপ যেনে ফেচটাইম আৰু জুমৰ সৈতে খোজ মিলাবলৈ চেষ্টা অব্যাহত ৰাখিছিল।
২০১৭চনত মাইক্ৰ’ছফটে 'মাইক্ৰ’ছফ্ট টিমছ' আৰম্ভ কৰা হৈছিল। 'টীমছ' স্কাইপৰ আৰ্হিত নিৰ্মাণ কৰা হৈছিল, যিটো বিশেষভাৱে কৰ্মক্ষেত্ৰক লক্ষ্য কৰি নিৰ্মাণ কৰা হৈছিল। অতি সোনকালেই টিমছ হিট হৈ পৰিল আৰু কোম্পানীয়ে স্কাইপ এৰি ইয়াৰ ওপৰত গুৰুত্ব আৰোপ কৰিলে। স্কাইপৰ পৰিৱৰ্তে 'টীমছ'ৰ সংহতি আৰু বেছিভাগ ব্যৱহাৰকাৰীয়ে অন্য এপলৈ যোৱাৰ লগে লগে বন্ধ হোৱাটো অনিবাৰ্য আছিল।
বিনামূলীয়াকৈ স্কাইপ ব্যৱহাৰ কৰাসকলে 'মাইক্ৰ’ছফ্ট টিমছ'ৰ বিনামূলীয়া ভাৰ্ছনটো ব্যৱহাৰ কৰিব পাৰে৷ ধনৰ বিনিময়ত স্কাইপ ব্যৱহাৰ কৰাটো বৰ্তমান নতুন ব্যৱহাৰকাৰীসকলৰ বাবে বন্ধ কৰি দিয়া হৈছে৷ বৰ্তমান ধনৰ বিনিময়ত স্কাইপ ব্যৱহাৰ কৰি থকাসকলে ছাবস্ক্ৰীপশ্যন শেষ নোহোৱা পৰ্যন্ত এই এপটো ব্যৱহাৰ কৰাৰ লগতে প্ৰিমিয়াম বৈশিষ্ট্যবোৰ ব্যৱহাৰ কৰিব পাৰে৷
যদি কোনো ব্যৱহাৰকাৰীৰ ২০২৫ বৰ্ষৰ ৩ এপ্ৰিলৰ পূৰ্বে স্কাইপ নম্বৰৰ ছাবস্ক্ৰীপশ্যন শেষ হয়, তেন্তে তেওঁলোকে পুনৰ এবাৰ প্লেনটো নবীকৰণ কৰিব পাৰে৷ অৱশ্যে এই নৱীকৰণৰ সুবিধা লাভ নকৰিব, ৩ এপ্ৰিলৰ পাচত প্লেনৰ ম্যাদ শেষ হোৱা লোকসকলে ৷ অৱশ্যে ছাবস্ক্ৰীপশ্যন শেষ নোহোৱা পৰ্যন্ত এই এপটো ব্যৱহাৰ কৰিব পাৰিব৷
আপোনাৰ স্কাইপ চেটসমূহ 'মাইক্ৰ’ছফ্ট টীমছ'লৈ স্থানান্তৰ কৰিবলৈ প্ৰথমে অফিচিয়েল ৱেবছাইটৰ পৰা 'মাইক্ৰ’ছফ্ট টিমছ'ৰ বিনামূলীয়া সংস্কৰণটো ডাউনলোড কৰিব লাগিব। দ্বিতীয়তে আপোনাৰ স্কাইপ একাউণ্টৰ বিৱৰণ ব্যৱহাৰ কৰি লগ ইন কৰিব লাগিব। সকলো স্কাইপ যোগাযোগ আৰু বাৰ্তা স্বয়ংক্ৰিয়ভাৱে 'মাইক্ৰ’ছফ্ট টীমছ'ত উপস্থিত হ'ব, যাৰ ফলত আপুনি য'ৰ পৰা বন্ধ কৰিছিল তাৰ পৰাই কথোপকথন অব্যাহত ৰাখিব পাৰিব।
