আগৰতলা
ত্ৰিপুৰাৰ মুখ্যমন্ত্ৰী মানিক সাহাই শনিবাৰে কয় যে, স্বাস্থ্য সেৱাৰ উন্নতিৰ বাবে ৰাজ্যখনত শিশু মৃত্যুৰ হাৰ আৰু মাতৃ মৃত্যুৰ হাৰ যথেষ্ট হ্ৰাস পাইছে। আগৰতলা চৰকাৰী চিকিৎসা মহাবিদ্যালয় আৰু জি বি পি হাস্পতালৰ কেএলএছ প্ৰেক্ষাগৃহত ভাৰতীয় অস্ত্ৰোপচাৰ সংস্থাৰ ত্ৰিপুৰা শাখাৰ ১৯ সংখ্যক বাৰ্ষিক সন্মিলন উদ্বোধন কৰি মুখ্যমন্ত্ৰী ছাহাই এই মন্তব্য কৰিছে।
তেওঁ কয় যে, ৰাজ্যখনৰ স্বাস্থ্য খণ্ডক আধুনিক কৰি তোলা আৰু নাগৰিকসকলক উন্নত চিকিৎসা সেৱা প্ৰদান কৰি জনসাধাৰণৰ আস্থা অৰ্জন কৰিবলৈ ৰাজ্য চৰকাৰে কাম কৰি আছে। তেওঁ কয়, "ৰাজ্য চৰকাৰৰ নিৰন্তৰ প্ৰচেষ্টাৰ ফলত ৰাজ্যখনৰ চিকিৎসা ব্যৱস্থাত অভূতপূৰ্ব উন্নতি সাধন হৈছে।"
তেওঁ উল্লেখ কৰে যে, জিবিকে ধৰি কেইবাটাও গুৰুতৰ ৰোগৰ চিকিৎসা আৰু অস্ত্ৰোপচাৰ এতিয়া ৰেফাৰেল হাস্পতালত কৰা হৈছে, যিটো পূৰ্বতে কল্পনাও কৰিব পৰা নাছিল। তেওঁ কয়, "ৰাজ্যখনত এতিয়া বৃক্ক সংৰোপণ সফলতাৰে সম্পন্ন কৰা হৈছে। এই অঞ্চলত যকৃত সংৰোপণৰ বাবেও প্ৰচেষ্টা চলাই থকা হৈছে। ৰাজ্য চৰকাৰে নিবিচাৰে যে, ত্ৰিপুৰাৰ জনসাধাৰণে নিজৰ ধন খৰচ কৰি চিকিৎসাৰ বাবে ৰাজ্যখনৰ বাহিৰলৈ যাব লাগে"
তেওঁ লগতে কয় যে, ৰাজ্যখনৰ জনসাধাৰণে তেওঁলোকৰ নিজৰ চিকিৎসা ব্যৱস্থাৰ ওপৰত বিশ্বাস ৰাখিব লাগে। ত্ৰিপুৰাৰ মুখ্যমন্ত্ৰীয়ে কয় যে, ৰাজ্য চৰকাৰে কেৱল চহৰাঞ্চলৰ স্বাস্থ্যসেৱা নহয়, গ্ৰামাঞ্চলৰ স্বাস্থ্যসেৱাৰ দ্ৰুত উন্নতিৰ ওপৰতো গুৰুত্ব আৰোপ কৰিছে।
তেওঁ কয়, "জিলা আৰু উপ-বিভাগীয় চিকিৎসালয়সমূহৰ আধুনিকীকৰণৰ বাবে পদক্ষেপ গ্ৰহণ কৰা হৈছে, য'ত ট্ৰমা চেন্টাৰ স্থাপন কৰা হৈছে। স্বাস্থ্য সেৱাৰ উন্নতিৰ ফলত ৰাজ্যখনত শিশুৰ মৃত্যুৰ হাৰ আৰু মাতৃৰ মৃত্যুৰ হাৰ যথেষ্ট হ্ৰাস পাইছে।"
মুখ্যমন্ত্রীয়ে লগতে কয় যে, চৰকাৰে কেৱল চিকিৎসা ব্যৱস্থাৰ আধুনিকীকৰণত গুৰুত্ব আৰোপ কৰা নাই, বৰঞ্চ স্বাস্থ্য খণ্ডত বিভিন্ন ধৰণে জনসাধাৰণক সহায় কৰাৰ ওপৰতো গুৰুত্ব আৰোপ কৰিছে।
তেওঁ লগতে কয়, "এজিএমচিত দূৰ-চিকিৎসা সেৱা প্ৰদান কৰা হৈছে। সংশ্লিষ্ট কৰ্তৃপক্ষক ইতিমধ্যে এটা ষ্টুডিঅ' নিৰ্মাণ কৰিবলৈ নিৰ্দেশ দিয়া হৈছে যাতে ৰোগীসকলে টেলিমেডিচিন সেৱাৰ পৰা ভালদৰে লাভাম্বিত হব পাৰে।"
এই অনুষ্ঠানত মুখ্যমন্ত্ৰীয়ে ৰাজ্যৰ দুজন চিকিৎসকক চিকিৎসা ক্ষেত্ৰলৈ আগবঢ়োৱা বিশেষ অৱদানৰ বাবে আৰু এগৰাকী চিকিৎসা বিজ্ঞানৰ ছাত্ৰীক অসাধাৰণ শৈক্ষিক পাৰদৰ্শিতাৰ বাবে সম্বৰ্ধনা জনায়।
