মালিক আছগৰ হাচমী / নতুন দিল্লী
সাধাৰণতে কোৱা হয় যে, এজন মানুহৰ প্ৰকৃত পৰিচয় বিপদৰ সময়তহে পোৱা যায়। আজি সমগ্ৰ বিশ্বই লুলু গ্ৰুপৰ স্বত্ত্বাধিকাৰী এম এ ইউছুফ আলীক এজন সফল তথা আগশাৰীৰ ব্যৱসায়ী হিচাপে চিনি পায়। কিন্তু তেওঁৰ এই বিশাল সাম্ৰাজ্যৰ ভেটি কেৱল ব্যৱসায়িক মুনাফাৰ ওপৰত নিৰ্ভৰশীল নহয়, বৰঞ্চ ইয়াৰ আঁৰত আছে কঠোৰ সংগ্ৰাম আৰু আপোনজনৰ প্ৰতি থকা দায়বদ্ধতা। বৰ্তমান ইজৰাইল, আমেৰিকা আৰু ইৰানৰ মাজত চলি থকা সংঘাতৰ ফলত উপসাগৰীয় দেশসমূহত এক অশান্তিকৰ পৰিৱেশৰ সৃষ্টি হৈছে। এনে এক ভয়াৱহ সংকটৰ সময়তে ইউছুফ আলী এক সুকীয়া ৰূপত, একপ্ৰকাৰ দেৱদূত হিচাপে থিয় দিছে। যুদ্ধৰ পৰিস্থিতিৰ বাবে উপসাগৰীয় অঞ্চলত সামগ্ৰী কঢ়িওৱা জাহাজ আৰু বিমানৰ চলাচল বেয়াকৈ প্ৰভাৱিত হৈছে। এই বিপদসংকুল পৰিস্থিতিত যেতিয়া বিশ্বৰ ডাঙৰ ডাঙৰ ব্যৱসায়ীসকলে হাত সাবটি বহি আছিল, তেতিয়াই ইউছুফ আলীয়ে উপসাগৰীয় দেশসমূহৰ জনসাধাৰণক ভোকত মৰিবলৈ নিদিয়াৰ সংকল্প লৈছে। তেওঁ ভাৰতৰ পৰা সতেজ ফল-মূল, শাক-পাচলি আৰু মাংস যোগান ধৰিবলৈ বিশেষ কাৰ্গো (মালবাহী) বিমানৰ এক বৃহৎ ব্যৱস্থা গঢ়ি তুলিছে।
এইটো কোনো সাধাৰণ ব্যৱসায়িক সামগ্ৰীৰ যোগান নহয়। যুদ্ধৰ ছাঁত জীৱন নিৰ্বাহ কৰি থকা লাখ লাখ লোকৰ বাবে সতেজ খাদ্য কঢ়িয়াই নিয়া ই এক জীৱনৰেখা (lifeline)। শেহতীয়াকৈ লুলু গ্ৰুপে ভাৰতৰ বিভিন্ন চহৰৰ পৰা কুৱেইট আৰু UAEলৈ বিশেষ বিমানৰ চলাচল আৰম্ভ কৰিছে। পৰিসংখ্যাৰ ফালৰ পৰা চাবলৈ গ'লে, এতিয়ালৈকে প্ৰায় ৮০,০০০ কিলোগ্ৰাম সতেজ সামগ্ৰী উপসাগৰীয় দেশসমূহলৈ প্ৰেৰণ কৰা হৈছে। আৰু এই ধাৰাবাহিকতা এতিয়াও স্তব্ধ হোৱা নাই। যুদ্ধৰ বাবে যেতিয়া সাগৰীয় পথসমূহ অসুৰক্ষিত হৈ পৰিল আৰু বীমাৰ (insurance) হাৰ আকাশলংঘী হ’বলৈ ধৰিলে, তেতিয়া ইউছুফ আলীয়ে আকাশী পথ বাছি ল'লে। তেওঁ প্ৰমাণ কৰি দিলে যে উপসাগৰীয় দেশসমূহে তেওঁক যি উচ্চতাত উপনীত কৰাইছে, তাৰ ঋণ পৰিশোধ কৰিবলৈ তেওঁ সদায় প্ৰস্তুত।
লুলু গ্ৰুপ ইণ্টাৰনেচনেলে শেহতীয়াকৈ জানিবলৈ দিয়া মতে, তেওঁলোকে কোচি আৰু দিল্লীৰ পৰা কুৱেইটলৈ বিশেষ কাৰ্গো বিমানৰ ব্যৱস্থা কৰিছে। কুৱেইট এয়াৰৱেজৰ জৰিয়তে চলাচল কৰা এই বিমানসমূহৰ উদ্দেশ্য কেৱল নিজৰ ষ্ট’ৰ বা গুদাম ভৰোৱাই নাছিল, বৰঞ্চ বজাৰত সৃষ্টি হ'ব পৰা আতংক ৰোধ কৰাটোহে আছিল ইয়াৰ মূল লক্ষ্য। ১২ মাৰ্চৰ পুৱা কোচি বিমানবন্দৰৰ পৰা এখন বিমানে ৩২ টন সতেজ ফল-মূল আৰু শাক-পাচলি কঢ়িয়াই লৈ যাত্ৰা কৰে। আনহাতে, দিল্লীৰ ইন্দিৰা গান্ধী আন্তঃৰাষ্ট্ৰীয় বিমানবন্দৰৰ পৰা আন এখন বিশাল বিমানে ৫০ টন সতেজ মাংস আৰু অন্যান্য প্ৰয়োজনীয় সামগ্ৰী লৈ কুৱেইটত উপস্থিত হয়। এই বিমানসমূহ আচলতে খালী যাত্ৰীবাহী বিমান আছিল, যিবোৰক বিশেষভাৱে কেৱল সামগ্ৰী কঢ়িয়াবৰ বাবে প্ৰস্তুত কৰা হৈছিল। এই সমগ্ৰ অভিযানৰ আঁৰত আছে লুলু গ্ৰুপৰ ভাৰতীয় শাখা 'ফেয়াৰ এক্সপৰ্টছ', যিয়ে দিনে-ৰাতিয়ে কাম কৰি সতেজ সামগ্ৰীৰ পেকেজিং আৰু যোগান সুনিশ্চিত কৰিছে।
উপসাগৰীয় অঞ্চলৰ দেশসমূহৰ বাবে ভাৰত সদায়েই এখন পাকঘৰৰ দৰে হৈ আহিছে। ইয়াৰ পৰা যোৱা চাউল, মছলা, পিঁয়াজ আৰু মাংস তাত বাস কৰা লোকসকলৰ দৈনন্দিন প্ৰয়োজনীয় সামগ্ৰীৰ এক বৃহৎ অংশ। যুদ্ধৰ পৰিস্থিতিত আটাইতকৈ ডাঙৰ ভয়টোৱেই হৈছে চাপ্লাই চেইন (supply chain) বা যোগান ব্যৱস্থা ব্যাহত হোৱাৰ ভয়। যদি ছুপাৰমাৰ্কেটৰ আলমাৰীবোৰ খালী হৈ পৰে, তেন্তে জনসাধাৰণৰ মাজত হাহাকাৰ সৃষ্টি হ'ব পাৰে। ইউছুফ আলীয়ে মানুহৰ মনৰ এই ভয় দূৰ কৰিবলৈকে চেষ্টা চলাই আছে। তেওঁলোকৰ গ্ৰুপ ডাইৰেক্টৰ মহম্মদ আলতাফে কয় যে লুলুৱে তেওঁলোকৰ সমগ্ৰ নেটৱৰ্কত অতিৰিক্ত পৰিবহণ পথ সংযোগ কৰিছে। তেওঁ স্পষ্ট কৰি দিছে যে বৰ্তমান কোনো সামগ্ৰীৰ অভাৱ নাই আৰু ষ্টকক লৈ কোনো বিপদ নাই। লুলুৰ ব্যৱসায় কেৱল ইউ এ ই বা কুৱেইটতে সীমাবদ্ধ নহয়। তেওঁলোকে সমগ্ৰ জিচিচি (GCC) অঞ্চলৰ ৬০ মিলিয়নতকৈয়ো অধিক গ্ৰাহকক সেৱা আগবঢ়ায়।
প্ৰতিনিধিত্বমুলক ফটো
যুদ্ধৰ মাজত যেতিয়া ইৰানৰ বোমাবৰ্ষণ আৰু প্ৰতিশোধমূলক আক্ৰমণৰ খবৰ আহে, তেতিয়া লজিষ্টিক বা সামগ্ৰী সৰবৰাহৰ কাম কৰাটো নিজৰ প্ৰাণ বিপদত পেলোৱাৰ দৰেই। কিন্তু ইতিহাদ এয়াৰৱেজ (Etihad Airways) আৰু কুৱেইট এয়াৰৱেজৰ সৈতে লগ লাগি লুলু গ্ৰুপে এই প্ৰত্যাহ্বান গ্ৰহণ কৰিছে। যোৱা সপ্তাহতে কোচি, দিল্লী, মুম্বাই আৰু বেংগালুৰুৰ পৰা ইউ এ ইলৈ হাজাৰ হাজাৰ পেকেট সতেজ খাদ্য প্ৰেৰণ কৰা হৈছিল। শনিবাৰে পুৱা যেতিয়া ইতিহাদৰ কাৰ্গো বিমান আবুধাবিত উপস্থিত হৈছিল, তেতিয়া তাত ৮০,০০০ কিলোগ্ৰাম সতেজ সামগ্ৰী ভৰ্তি আছিল। ইউ এ ইৰ অৰ্থনীতি আৰু পৰ্যটন মন্ত্ৰ্যালয়েও এই তৎপৰতাক প্ৰশংসা কৰিছে। মন্ত্ৰ্যালয়ে আশ্বাস দিছে যে দেশৰ কৌশলগত ভাণ্ডাৰ সম্পূৰ্ণৰূপে সুৰক্ষিত আৰু যোগান ব্যৱস্থা স্বাভাৱিকভাৱে চলি আছে।
ভাৰতৰ সৈতে ইউছুফ আলীৰ এক গভীৰ সম্পৰ্ক আছে। তেওঁ জানে যে দক্ষিণ ভাৰতৰ পৰা অহা নাৰিকল, সাগৰীয় খাদ্য আৰু মছলা তাত বাস কৰা কোটি কোটি ভাৰতীয় আৰু স্থানীয় লোকৰ প্ৰাণ। ভাৰতৰ প্ৰধান চহৰ যেনে মুম্বাই আৰু বেংগালুৰুৰ পৰাও অহৰহ সামগ্ৰী প্ৰেৰণ কৰা হৈছে। এয়া কেৱল এক ব্যৱসায় নহয়, বৰঞ্চ খাদ্য নিৰাপত্তা নিশ্চিত কৰাৰ এক বৃহৎ অভিযান। যোৱা এক দশকত জিচিচি দেশসমূহে দুগ্ধ আৰু মীন পালনৰ দৰে ক্ষেত্ৰত যথেষ্ট উন্নতি সাধন কৰিছে। কিন্তু প্ৰধান শস্য আৰু সতেজ সামগ্ৰীৰ বাবে তেওঁলোক এতিয়াও আমদানিৰ ওপৰতেই নিৰ্ভৰশীল। এনে পৰিস্থিতিত, কৌশলগত ভাণ্ডাৰ আৰু দক্ষ খুচুৰা বিতৰণ ব্যৱস্থাই এক সুৰক্ষা কৱচ হিচাপে কাম কৰে।
আলতাফৰ মতে, গোলকীয় সংঘাতৰ বাবে সামগ্ৰীৰ দাম অস্থায়ীভাৱে বৃদ্ধি পাব পাৰে। সামগ্ৰী কঢ়িওৱাৰ ব্যয় আৰু বীমাৰ প্ৰিমিয়াম বৃদ্ধি পোৱাৰ ফলত এক হেঁচাৰ সৃষ্টি হয়। কিন্তু যেতিয়া খুচুৰা বিক্ৰেতাসকলে পৰ্যাপ্ত ষ্টক বজাই ৰাখে, তেতিয়া বজাৰত সুস্থিৰতা আহে। ইয়াৰ ফলত মানুহে 'পেনিক বায়িং' (panic buying) অৰ্থাৎ আতংকিত হৈ প্ৰয়োজনতকৈ বেছি সামগ্ৰী জমা কৰাৰ পৰা বিৰত থাকে। লুলু গ্ৰুপে তেওঁলোকৰ চাপ্লায়াৰসকলৰ সৈতে থকা দীৰ্ঘদিনীয়া সুসম্পৰ্কৰ সুবিধা গ্ৰহণ কৰি এই সংকট হ্ৰাস কৰিবলৈ চেষ্টা কৰিছে। ইউছুফ আলীৰ এই পদক্ষেপে কেৱল উপসাগৰীয় দেশসমূহত খাদ্যৰ অভাৱেই ৰোধ কৰা নাই, বৰঞ্চ ভাৰতৰ কৃষক আৰু ৰপ্তানিকাৰীসকলৰ বাবেও এক বৃহৎ পথ মুকলি কৰি ৰাখিছে।
যেতিয়া আমি যুদ্ধৰ ভয়াৱহতাৰ বিষয়ে শুনিবলৈ পাওঁ, এই ব্যতিক্ৰমী প্ৰচেষ্টাই আশাৰ সঞ্চাৰ কৰে। ১৯৯৭ চনত ইউছুফ আলীয়ে যি সৰু আৰম্ভণিৰে লুলু গ্ৰুপৰ ভেটি স্থাপন কৰিছিল, আজি সেয়া সংকটৰ সময়ত এক মজবুত স্তম্ভ হৈ থিয় দিছে। এছিয়াৰ পৰা ইউৰোপলৈ বিয়পি থকা তেওঁলোকৰ ২৫০ খনতকৈয়ো অধিক ষ্ট’ৰে আজি লাখ লাখ লোকৰ প্ৰয়োজনীয়তা পূৰণ কৰি আছে। এই যুদ্ধই বিশ্বক দেখুৱাই দিলে যে পৰিবহণৰ পথসমূহ বন্ধ হৈ পৰিলেও, যদি ইচ্ছা শক্তি দৃঢ় হয় তেন্তে আকাশৰ বুকুৰেও পথ তৈয়াৰ কৰিব পাৰি।
ভাৰতৰ কোচিৰ পৰা আৰম্ভ কৰি আবুধাবিৰ মৰুভূমিলৈকে, এই কাৰ্গো বিমানসমূহে কেৱল সামগ্ৰী কঢ়িওৱা নাই, বৰঞ্চ এক বিশ্বাস লৈ উৰা মাৰিছে। এইটোৱেই সেই বিশ্বাস যে বেয়া সময়তো কাৰো কাঁহী খালী হৈ নাথাকে। লুলু গ্ৰুপৰ এই দ্ৰুত লজিষ্টিক ৰণনীতি আন খুচুৰা বিক্ৰেতাসকলৰ বাবেও এক শিক্ষা। তেওঁলোকে দেখুৱাই দিলে যে সাগৰীয় পথৰ বাধাক আকাশী মালবাহী ব্যৱস্থাৰ জৰিয়তে কেনেকৈ অতিক্ৰম কৰিব পাৰি। আহিবলগীয়া দিনবোৰত আৰু অধিক চাৰ্টাৰ বিমান চলাচলৰ পৰিকল্পনা কৰা হৈছে যাতে ষ্টকৰ পৰিমাণ কেতিয়াও হ্ৰাস নাপায়।
প্ৰতিনিধিত্বমুলক ফটো
ইউছুফ আলীৰ এই কাহিনী এজন সফল উদ্যোগীতকৈ এজন দায়িত্বশীল নাগৰিকৰ কাহিনী হিচাপে অধিক প্ৰাসংগিক। তেওঁ নিজৰ শিপা আৰু কৰ্মক্ষেত্ৰ, দুয়োটাৰে প্ৰতি নিজৰ আনুগত্য প্ৰমাণ কৰিছে। ভাৰতৰ সতেজ মাংস আৰু শাক-পাচলি যেতিয়া উপসাগৰীয় বজাৰত উপস্থিত হয়, তেতিয়া তাত বাস কৰা প্ৰবাসীসকলেও মানসিক শান্তি লাভ কৰে। তেওঁলোকে অনুভৱ কৰে যে সংকটৰ এই সময়তো এনে কোনোবা আছে যিয়ে তেওঁলোকৰ বিষয়ে চিন্তা কৰিছে। লুলু গ্ৰুপৰ এই এয়াৰ কাৰ্গো অপাৰেচন ইতিহাসত সংকট ব্যৱস্থাপনাৰ এক বৃহৎ নিদৰ্শন হিচাপে স্মৰণীয় হৈ ৰ'ব। ই প্ৰমাণ কৰে যে ব্যৱসায় কেৱল ধন ঘটাৰ আহিলাই নহয়, বৰঞ্চ মানৱতাৰ সেৱা কৰাৰ এক শক্তিশালী মাধ্যমো হ'ব পাৰে।
