নতুন দিল্লী
ৰাষ্ট্ৰপতিৰ সন্মতি লাভ কৰাৰ পিছত মঙলবাৰে অন্ধ্ৰপ্ৰদেশ পুনৰ্গঠন (সংশোধনী) আইন, ২০২৬ গেজেটত প্ৰকাশ কৰা হয়, যাৰ ফলত অমৰাৱতী অন্ধ্ৰপ্ৰদেশৰ একমাত্ৰ ৰাজধানী হিচাপে পৰিগণিত হয়। এক্সত গেজেট জাননী শ্বেয়াৰ কৰি মুখ্যমন্ত্ৰী এন চন্দ্ৰবাবু নাইডুৱে ঘোষণা কৰে যে, “অন্ধ্ৰপ্ৰদেশৰ ৰাজধানী হ’ল অমৰাৱতী।”
অমৰাৱতীক ৰাজ্যখনৰ একমাত্ৰ ৰাজধানী হিচাপে স্বীকৃতি দিয়াক আদৰণি জনাই মুখ্যমন্ত্ৰী নাইডুৱে ৰাষ্ট্ৰপতি দ্ৰৌপদী মুৰ্মু আৰু প্ৰধানমন্ত্ৰী নৰেন্দ্ৰ মোদীৰ প্ৰতি কৃতজ্ঞতা প্ৰকাশ কৰে। এক্সৰ এটা পোষ্টত নাইডুৱে কয়, “অন্ধ্ৰপ্ৰদেশৰ ৰাইজৰ হৈ মই ৰাষ্ট্ৰপতি দ্ৰৌপদী মুৰ্মু জীৰ প্ৰতি গভীৰ কৃতজ্ঞতা জ্ঞাপন কৰিছো, কাৰণ তেওঁ অন্ধ্ৰপ্ৰদেশ পুনৰ্গঠন (সংশোধনী) আইন, ২০২৬ত সন্মতি প্ৰদান কৰি আমাৰ ৰাজধানীক লৈ থকা দীৰ্ঘদিনীয়া সপোনটো পূৰণ কৰিলে। আমাৰ ৰাজ্যখনৰ প্ৰতি থকা দায়বদ্ধতা আৰু নিৰ্দেশনাৰ বাবে মই প্ৰধানমন্ত্ৰী নৰেন্দ্ৰ মোদী জীৰ নেতৃত্বৰ কেন্দ্ৰীয় চৰকাৰক ধন্যবাদ জনাইছো । লগতে এই বিধেয়কখনক সমৰ্থন কৰা সকলো সাংসদ, আমাৰ ৰাজ্যিক নেতা আৰু আমাৰ সৈতে থকা প্ৰতিগৰাকী নাগৰিকক ধন্যবাদ জনাইছো। এয়া অন্ধ্ৰপ্ৰদেশৰ ৰাইজৰ জয়, বিশেষকৈ অমৰাৱতীৰ কৃষকসকলৰ জয়।”
এই আইনখনে ২০১৪ চনৰ অন্ধ্ৰপ্ৰদেশ পুনৰ্গঠন আইনখন সংশোধন কৰিছে আৰু তাত “অমৰাৱতী নতুন ৰাজধানী হ’ব” বুলি এটা খণ্ডবাক্য সংযোজন কৰিছে । তেলেংগানা এখন সুকীয়া ৰাজ্য হিচাপে গঠন হোৱাৰ পিছত ২০১৪ চনৰ মূল আইনখনত উল্লেখ কৰা হৈছিল যে হায়দৰাবাদ সৰ্বাধিক দহ বছৰৰ বাবে তেলেংগানা আৰু অন্ধ্ৰপ্ৰদেশৰ উমৈহতীয়া ৰাজধানী হৈ থাকিব। এই সময়ছোৱাৰ পিছত হায়দৰাবাদ কেৱল তেলেংগানাৰ ৰাজধানী হ’ব আৰু উত্তৰাধিকাৰী ৰাজ্য অন্ধ্ৰপ্ৰদেশৰ বাবে এখন নতুন ৰাজধানী হ’ব।
২৮ মাৰ্চত অন্ধ্ৰপ্ৰদেশ বিধানসভাত অমৰাৱতীক একমাত্ৰ ৰাজধানী হিচাপে সমৰ্থন কৰি এটা প্ৰস্তাৱ গৃহীত হৈছিল, যিয়ে সংসদত এই আইনখন উত্থাপন কৰাৰ পথ প্ৰশস্ত কৰিছিল । ১ এপ্ৰিলত লোকসভাত বিধেয়কখন গৃহীত হোৱাৰ পিছত, পিছদিনাই সংসদৰ উচ্চ সদনতো ই গৃহীত হয়। অৱশ্যে সেই সময়ত ৱাই.এছ.আৰ. কংগ্ৰেছ পাৰ্টিৰ সাংসদসকলে সদন ত্যাগ কৰিছিল। ৱাই.এছ.আৰ.চি.পিৰ সাংসদ গোল্লা বাবু ৰাওৱে এই আইনখনক এখন “নাটক” বুলি অভিহিত কৰি ইয়াৰ যুক্তিযুক্ততাৰ ওপৰত প্ৰশ্ন উত্থাপন কৰে। সাংবিধানিক সংশোধনীৰ সম্ভাৱনীয়তাৰ ওপৰত গুৰুত্ব দি তেওঁ কয় যে জনসাধাৰণক ন্যায় প্ৰদান কৰিব পাৰিলেহে ৰাজধানী সলনি কৰিব লাগে।
.webp)
