দক্ষতা বৃদ্ধিৰ বাবে AI আৰু মেচিন লাৰ্নিঙৰ বিশেষ পাঠ্যক্ৰম আৰম্ভ জামিয়া মিলিয়া ইছলামিয়াৰ
আৱাজ - দ্য ভইচ / নতুন দিল্লী
কৃত্ৰিম বুদ্ধিমত্তা (AI) এতিয়া কেৱল ভৱিষ্যতৰ প্ৰযুক্তি নহয়, বৰ্তমান সময়ৰ ই আটাইতকৈ দ্ৰুত বিকাশশীল ক্ষেত্ৰ হৈ পৰিছে। স্বাস্থ্য, শিক্ষা, ব্যৱসায়ৰ পৰা আৰম্ভ কৰি দৈনন্দিন জীৱনলৈকে কৃত্ৰিম বুদ্ধিমত্তা (AI)ৰ প্ৰভাৱ ক্ৰমাৎ বৃদ্ধি পাইছে। এনে পৰিস্থিতিত যুৱ প্ৰজন্মক নতুন যুগৰ দক্ষতাৰে সজ্জিত কৰিবলৈ আগবাঢ়ি আহিছে দিল্লীৰ প্ৰখ্যাত জামিয়া মিলিয়া ইছলামিয়া বিশ্ববিদ্যালয়। বিশ্ববিদ্যালয়খনৰ কম্পিউটাৰ অভিযান্ত্ৰিক বিভাগে কৃত্ৰিম বুদ্ধিমত্তা (AI)আৰু মেচিন লাৰ্নিঙৰ ওপৰত এক বিশেষ হ্ৰস্বম্যাদী প্ৰশিক্ষণ কাৰ্যসূচী আৰম্ভ কৰি শিক্ষাৰ্থীসকলৰ বাবে কেৰিয়াৰৰ এক নতুন দুৱাৰ মুকলি কৰিছে।
তিনি সপ্তাহৰ এই প্ৰশিক্ষণে নতুন ছাত্ৰ এজনকো এআইৰ জৰিয়তে নিজৰ ভৱিষ্যতৰ পথ বাছি ল'বলৈ প্ৰস্তুত কৰি তুলিব। এই বিশেষ প্ৰশিক্ষণ কাৰ্যসূচী ৩০ জুনৰ পৰা আৰম্ভ হ'ব আৰু ২০২৬ চনৰ ১৭ জুলাইলৈকে চলিব। অংশগ্ৰহণকাৰীসকলক এআই আৰু মেচিন লাৰ্নিঙৰ মৌলিক দিশৰ পৰা আৰম্ভ কৰি ইয়াৰ ব্যৱহাৰিক প্ৰয়োগলৈকে বিস্তৃত তথ্য প্ৰদান কৰা হ'ব।
আজিকালি প্ৰতিটো ক্ষেত্ৰতে এআইৰ প্ৰচলন বাঢ়িছে, যাৰ ফলত এই পাঠ্যক্ৰমটো আৰু অধিক গুৰুত্বপূৰ্ণ হৈ পৰিছে। এই পাঠ্যক্ৰমৰ জৰিয়তে বিশ্ববিদ্যালয়খনে যুৱক-যুৱতীসকলক চাকৰিৰ বজাৰত আনতকৈ অধিক আগবাঢ়ি থাকিবলৈ সহায় কৰাৰ উদ্দেশ্যৰে নতুন যুগৰ দক্ষতাৰে সজ্জিত কৰাৰ লক্ষ্য লৈছে।
এই সমগ্ৰ পাঠ্যক্ৰমটো পাইথন প্ৰগ্ৰেমিংৰ ওপৰত ভিত্তি কৰি তৈয়াৰ কৰা হৈছে। আজিৰ তাৰিখত পাইথনক এআইৰ বাবে আটাইতকৈ অপৰিহাৰ্য আৰু সহজ ভাষা বুলি গণ্য কৰা হয়। এই প্ৰশিক্ষণে কেৱল কিতাপৰ দৰে জ্ঞান প্ৰদান কৰাই নহয় ব্যৱহাৰিক বুজাবুজিৰ ওপৰতো গুৰুত্ব আৰোপ কৰিব। এই পাঠ্যক্ৰমৰ জৰিয়তে অংশগ্ৰহণকাৰীসকলক ক'ডিং আৰু নন-ক'ডিং পদ্ধতিও শিকোৱা হ'ব।
ইয়াৰদ্বাৰা ক'ডিংত বৰ পাকৈত নহোৱাসকলকো এআই শিকিবলৈ সহায় কৰিব। ছাত্ৰ-ছাত্ৰীসকলে শিক্ষণত কোনো অসুবিধা নাপাবলৈ প্ৰতিটো অধিবেশনৰ বাবে স্লাইড আৰু প্ৰয়োজনীয় অধ্যয়ন সামগ্ৰীৰ ব্যৱস্থা কৰা হ’ব। তেওঁলোকৰ শিক্ষণৰ মূল্যায়নৰ বাবে সময়ে সময়ে কুইজ আৰু এচাইনমেণ্টো অনুষ্ঠিত কৰা হ’ব।
বিশ্ববিদ্যালয়খনে এই পাঠ্যক্ৰমটো সকলোৰে সুবিধা অনুযায়ী ডিজাইন কৰিছে। ছাত্ৰ-ছাত্ৰীসকলে তেওঁলোকৰ সুবিধাৰ ওপৰত নিৰ্ভৰ কৰি অফলাইন বা অনলাইন মোডত এই পাঠ্যক্ৰমত যোগদান কৰিব পাৰিব। দিল্লীৰ পৰা পোনপটীয়াকৈ ক্লাছত অংশগ্ৰহণ কৰিব বিচৰা ছাত্ৰ-ছাত্ৰীসকলে অফলাইন মোডটোও বাছনি কৰিব পাৰিব।
৩০ জুনৰ পৰা ১৭ জুলাইলৈকে চলিব AI আৰু মেচিন লাৰ্নিঙৰ হ্ৰস্বম্যাদী প্ৰশিক্ষণ কাৰ্যসূচী
দুৰ্গম অঞ্চলৰ ছাত্ৰ-ছাত্ৰীয়ে ঘৰত থাকিয়ে অনলাইনযোগে এই উৎকৃষ্ট পাঠ্যক্ৰমত অংশগ্ৰহণ কৰিব পাৰিব। পাঠ্যক্ৰমটো সফলতাৰে সম্পূৰ্ণ কৰা সকলো ছাত্ৰ-ছাত্ৰীয়ে জামিয়া মিলিয়া ইছলামিয়াৰ পৰা প্ৰমাণ পত্ৰ লাভ কৰিব। আৰু এই প্ৰমাণপত্ৰই ভৱিষ্যতে চাকৰি বিচৰাৰ সময়ত তেওঁলোকৰ প্ৰফাইল শক্তিশালী কৰিব। সমগ্ৰ প্ৰশিক্ষণ কাৰ্যসূচীক পাঁচটা পৃথক মডিউলত ভাগ কৰা হৈছে। প্ৰথম মডিউলে এআই আৰু পাইথনৰ মৌলিক দিশসমূহ সামৰি ল'ব। দ্বিতীয় মডিউলে পাইথন ব্যৱহাৰ কৰি প্ৰয়োগ কৰা তথ্য বিজ্ঞান আৰু মেচিন লাৰ্নিং এলগৰিদমৰ বিশদ তথ্য প্ৰদান কৰিব।
তৃতীয় মডিউলত কেৰাছ আৰু টেনছৰফ্ল'ৰ দৰে আধুনিক সঁজুলি ব্যৱহাৰ কৰি কম্পিউটাৰ দৃষ্টিৰ বাবে গভীৰ শিক্ষণৰ জটিলতাসমূহ ব্যাখ্যা কৰা হ'ব। চতুৰ্থ মডিউলত প্ৰাকৃতিক ভাষা প্ৰক্ৰিয়াকৰণ (এনএলপি)ৰ বাবে গভীৰ শিক্ষণৰ প্ৰশিক্ষণ প্ৰদান কৰা হ’ব আৰু লগতে কেৰাছ আৰু টেনছৰফ্ল' ব্যৱহাৰ কৰা হ'ব।এই পাঠ্যক্ৰমৰ আটাইতকৈ উল্লেখযোগ্য বৈশিষ্ট্য হ'ল অতি অভিজ্ঞ অধ্যাপকসকল। জামিয়া মিলিয়া ইছলামিয়াৰ জ্যেষ্ঠ অধ্যাপকৰ উপৰিও আই আই টি, এন আই টি আৰু ট্ৰিপল আই টিকে ধৰি ভাৰত আৰু বিদেশৰ প্ৰতিষ্ঠিত বিশ্ববিদ্যালয়ৰ বিশেষজ্ঞসকলে ছাত্ৰ-ছাত্ৰীসকলক পথ প্ৰদৰ্শন কৰিব।
এই ক্ষেত্ৰত কাম কৰা উদ্যোগ বিশেষজ্ঞসকলেও তেওঁলোকৰ অভিজ্ঞতা ভাগ-বতৰা কৰিব। বিশেষজ্ঞসকলৰ পৰা এই প্ৰত্যক্ষ শিক্ষণ অভিজ্ঞতাই ছাত্ৰ-ছাত্ৰীসকলক বাস্তৱ জগতত এআই কেনেকৈ ব্যৱহাৰ কৰা হয় সেই কথা বুজিবলৈ সহায় কৰিব। পাঠ্যক্ৰমৰ সময়ত কিছুমান মডিউলে কম বা কোনো ক'ডিঙৰ সৈতে এআই সঁজুলি ব্যৱহাৰ কৰাৰ সহজ উপায়ো প্ৰদান কৰিব।
জামিয়া মিলিয়া ইছলামিয়া বিশ্ববিদ্যালয়ৰ প্ৰশিক্ষণ কাৰ্যসূচী
জামিয়া মিলিয়া ইছলামিয়াত এই বিশেষ পাঠ্যক্ৰমত আসনৰ সংখ্যা অত্যন্ত সীমিত। ইয়াত মাত্ৰ ১৬০ খন আসনহে উপলব্ধ। ইয়াৰে ৬০খন আসন অফলাইন মোডৰ বাবে আৰু ১০০খন আসন অনলাইন মোডৰ বাবে সংৰক্ষিত। এই পাঠ্যক্ৰমত নামভৰ্তি প্ৰথমে অহা আৰু প্ৰথমে পোৱাৰ ওপৰত ভিত্তি কৰি প্ৰদান কৰা হ'ব।
অৰ্থাৎ প্ৰথমে আবেদন কৰা ছাত্ৰ-ছাত্ৰীয়ে প্ৰাধান্য লাভ কৰিব। গতিকে ইয়াৰ আসন ভৰ্তি হোৱালৈ অপেক্ষা নকৰাকৈয়ে সময়মতে আবেদন কৰাটো বুদ্ধিমানৰ কাম হব। এই পাঠ্যক্ৰমৰ বাবে শ্ৰেণীসমূহ প্ৰতিদিনে সোমবাৰৰ পৰা শনিবাৰলৈকে, পুৱা ১০ বজাৰ পৰা দুপৰীয়া ১:০০ বজালৈ অনুষ্ঠিত হ’ব। তিনি ঘণ্টীয়া এই শ্ৰেণীটোৱে ছাত্ৰ-ছাত্ৰীসকলক প্ৰযুক্তিৰ জগতখনৰ গভীৰতালৈ যোৱাৰ সুযোগ প্ৰদান কৰিব।
এই পাঠ্যক্ৰমত যোগদানৰ বাবে এক নিৰ্দিষ্ট যোগ্যতাৰ মাপকাঠী আছে। গণিতৰ পটভূমি থকা সকলো ডিপ্লমাধাৰী, স্নাতক, স্নাতকোত্তৰ, আৰু পি এইচ ডি ছাত্ৰ-ছাত্ৰীৰ বাবে এই পাঠ্যক্ৰম মুকলি থাকিব। বিশ্ববিদ্যালয় আৰু মহাবিদ্যালয়ৰ অধ্যাপকসকলেও এই প্ৰশিক্ষণ কাৰ্যসূচীত অংশগ্ৰহণ কৰিব পাৰিব, যদিহে তেওঁলোকৰ গণিতৰ পটভূমি থাকে। গণিতৰ মৌলিক বুজাবুজিয়ে মেচিন লাৰ্নিং এলগৰিদম বুজি পোৱাটো সহজ কৰি তোলে।
