দিল্লীৰ গৰমৰ পৰা পৰিত্ৰাণ পাবলৈ জামিয়াৰ গৱেষক য়ুছৰা গুলৰ অভিনৱ প্ৰকল্প; লাভ কৰিলে আন্তঃৰাষ্ট্ৰীয় স্বীকৃতি
আৱাজ - দ্য ভইচ / নতুন দিল্লী
দিল্লীৰ অসহ্য গৰমৰ পৰা সাধাৰণ জনতাক সকাহ দিয়াৰ লক্ষ্যৰে এক অভিনৱ প্ৰকল্প যুগুত কৰি সমগ্ৰ বিশ্বৰ দৃষ্টি আকৰ্ষণ কৰিবলৈ সক্ষম হৈছে এগৰাকী ভাৰতীয় গৱেষকে। নেদাৰলেণ্ডৰ ইৰাছমাছ ইউনিভাৰ্ছিটি আৰু ইউৰোপৰ বিখ্যাত সংস্থা 'ইনফৰ্ম টু বিল্ড'ৰ যৌথ উদ্যোগত আয়োজিত 'ৰিথিংকিং ৰুফছ গ্ল'বেল কম্পিটিচন' নামৰ আন্তঃৰাষ্ট্ৰীয় প্ৰতিযোগিতাখনত দ্বিতীয় স্থান লাভ কৰি দেশলৈ গৌৰৱ কঢ়িয়াই আনিছে জামিয়া মিলিয়া ইছলামিয়াৰ গৱেষক য়ুছৰা গুলে।
দৰিদ্ৰ আৰু পিছপৰা শ্ৰেণীৰ লোকসকলৰ বাবে উন্নত আৰু আৰামদায়ক বাসগৃহৰ প্ৰযুক্তি উদ্ভাৱন কৰাই আছিল এই প্ৰতিযোগিতাৰ মূল উদ্দেশ্য, য'ত বিশ্বৰ ভিন্ন প্ৰান্তৰ শ্ৰেষ্ঠ ধাৰণাসমূহক চেৰ পেলাই ভাৰতৰ এই প্ৰকল্পটোৱে নিজৰ শক্তিশালী স্থিতি প্ৰতিপন্ন কৰিছে।
কি এই বিশেষ প্ৰকল্প?
য়ুছৰা গুলে বৰ্তমান জামিয়াৰ স্থাপত্য বিভাগত গৱেষণা কৰি আছে। অধ্যাপক নিছাৰ খান আৰু অধ্যাপিকা হিনা জিয়াৰ তত্ত্বাৱধানত তেওঁ এই প্ৰকল্পটো সম্পূৰ্ণ কৰিছে। এই বিশেষ প্ৰকল্পটোৰ নাম ৰখা হৈছে 'বৰ'ড স্কাইঃ কালেক্টিভ ৰুফস্কেপছ এজ থাৰ্মেল কমনছ ইন ইনফৰ্মেল চেটলমেণ্টছ'।
সমগ্ৰ বিশ্বৰ দৃষ্টি আকৰ্ষণ কৰিবলৈ সক্ষম হৈছে জামিয়াৰ গৱেষক
দিল্লীৰ ঘন জনবসতিপূৰ্ণ আৰু অপৰিকল্পিত বস্তি অঞ্চলসমূহৰ প্ৰতি লক্ষ্য ৰাখি এই প্ৰকল্পটো প্ৰস্তুত কৰা হৈছে। প্ৰতি বছৰে গ্ৰীষ্মকালত দিল্লীৰ তাপমাত্ৰাই অভিলেখ স্পৰ্শ কৰে আৰু এই বস্তিসমূহত বসবাস কৰা দৰিদ্ৰ লোকসকলেই এই মাৰাত্মক গৰমৰ আটাইতকৈ বেছি বলি হ'বলগীয়া হয়। য়ুছৰা গুলৰ এই প্ৰকল্পটোৱে এই জ্বলন্ত সমস্যাটোৰ এক অতি ব্যৱহাৰিক আৰু ফলপ্ৰসূ সমাধান আগবঢ়াইছে
প্ৰকল্পটোৰ বৈশিষ্ট্য
এই প্ৰকল্পটোৰ আটাইতকৈ ডাঙৰ বৈশিষ্ট্য হৈছে ইয়াৰ সৰলতা আৰু কম ব্যয়। বিশ্বৰ বিভিন্ন প্ৰান্তৰ পৰা অহা শ শ প্ৰকল্পৰ মাজৰ পৰা ইয়াক নিৰ্বাচিত কৰাৰ মূল কাৰণটোৱেই হ'ল ইয়াৰ বাস্তৱসন্মত প্ৰয়োগ। সাধাৰণতে স্থাপত্যৰ ডাঙৰ ডাঙৰ প্ৰকল্পসমূহ অতি ব্যয়বহুল হয়, যাৰ বাবে সাধাৰণ মানুহে সেইবোৰ নিজৰ ঘৰত ব্যৱহাৰ কৰিব নোৱাৰে।
কিন্তু য়ুছৰাৰ এই আৰ্হিটো বস্তিত বসবাস কৰা দৰিদ্ৰ লোকসকলে অতি সহজেই স্থানীয় পৰ্যায়ত নিজে ব্যৱহাৰ কৰিব পাৰিব। ইয়াত স্থানীয়ভাৱে উপলব্ধ সামগ্ৰী ব্যৱহাৰ কৰি ঘৰৰ ছাদখন শীতল কৰি ৰখাৰ প্ৰযুক্তিৰ বিষয়ে উল্লেখ কৰা হৈছে। এই প্ৰযুক্তিয়ে ঘৰৰ ভিতৰৰ উষ্ণতা যথেষ্ট পৰিমাণে হ্ৰাস কৰে। মানুহৰ জীৱনধাৰণৰ মানদণ্ড পোনপটীয়াকৈ উন্নত কৰাৰ যি ক্ষমতা এই প্ৰকল্পটোৰ আছে, তাক বিচাৰক মণ্ডলীয়ে বিশেষভাৱে প্ৰশংসা কৰিছে।
অধ্যাপক মজহৰ আছিফ
বিশ্ববিদ্যালয় প্ৰশাসনৰ আনন্দ প্ৰকাশ
এই বৃহৎ সাফল্যত এতিয়া জামিয়া মিলিয়া ইছলামিয়াত এক আনন্দৰ পৰিৱেশ বিৰাজ কৰিছে। বিশ্ববিদ্যালয়খনৰ উপাচাৰ্য অধ্যাপক মজহৰ আছিফে সমগ্ৰ গৱেষক দলটোক অভিনন্দন জ্ঞাপন কৰিছে। তেওঁ কয় যে জামিয়াই নিজৰ গৱেষণাৰ জৰিয়তে 'বিকশিত ভাৰত ২০৪৭'ৰ সপোন বাস্তৱায়িত কৰাৰ দিশত নিৰন্তৰ কাম কৰি আছে। এই স্বীকৃতিয়ে প্ৰমাণ কৰিছে যে আমাৰ গৱেষকসকল সঠিক দিশত আগবাঢ়িছে।
বিশ্ববিদ্যালয়ৰ পঞ্জীয়ক অধ্যাপক মেহতাব আলম ৰিজভীয়েও এই সাফল্যত আনন্দ প্ৰকাশ কৰিছে। তেওঁৰ মতে, যিকোনো গৱেষণা প্ৰতিষ্ঠানৰ প্ৰকৃত উদ্দেশ্য সমাজৰ সেৱা কৰা হ'ব লাগে। জামিয়াই যে জাতি গঠনত নিজৰ শ্ৰেষ্ঠ অৱদান আগবঢ়াই আহিছে, এই স্বীকৃতিয়েই তাৰ এক জ্বলন্ত প্ৰমাণ।
বিশ্ব দৰবাৰত স্বীকৃতি
প্ৰকল্পটো
এই আন্তঃৰাষ্ট্ৰীয় স্বীকৃতিয়ে ইউছুৰাৰ প্ৰকল্পটোক বিশ্বৰ দৰবাৰত এক বিশাল মঞ্চ প্ৰদান কৰিব। আগন্তুক সময়ত 'ৱৰ্ল্ড আৰ্বান ফ'ৰাম'ত এই গৱেষক দলটোৰ উদ্ভাৱন প্ৰদৰ্শন কৰা হ'ব। ইয়াৰ উপৰি বিশ্বৰ শ্ৰেষ্ঠ ৰুফিং ছলিউচন সন্দৰ্ভত প্ৰকাশ পাবলগীয়া এখন বিশেষ গ্ৰন্থতো এই ভাৰতীয় মডেলটোৱে এক সুকীয়া স্থান লাভ কৰিব।
এই প্ৰযুক্তিৰ বিষয়ে অধিক আলোচনা আৰু বিশ্লেষণৰ বাবে গৱেষকসকলক নেদাৰলেণ্ডত অনুষ্ঠিত হ'বলগীয়া এখন আন্তঃৰাষ্ট্ৰীয় সন্মিলনলৈ আমন্ত্ৰণ জনোৱা হৈছে। তাত তেওঁলোকে বিশ্বৰ আগশাৰীৰ বিজ্ঞানী আৰু স্থপতিবিদসকলৰ আগত এই অভিনৱ ভাৰতীয় মডেলটোৰ সবিশেষ দাঙি ধৰিব। এয়া কেৱল জামিয়া মিলিয়া ইছলামিয়াৰ বাবেই নহয়, বৰং সমগ্ৰ দেশৰ গৱেষক সমাজৰ বাবে এক বিৰল অনুপ্ৰেৰণাৰ উৎস হৈ ৰ'ব, যিয়ে প্ৰমাণ কৰে যে সমাজৰ তৃণমূল পৰ্যায়ৰ সমস্যাৰ সৰল সমাধানেও বিশ্বজয় কৰিব পাৰে।
