নতুন দিল্লী
যোৱা সপ্তাহত ২৬ জনকৈ পৰ্যটকৰ মৃত্যু হোৱা পহলগাম সন্ত্ৰাসবাদী আক্ৰমণৰ পিছত উত্তেজনা বৃদ্ধি পোৱাৰ সময়তে শনিবাৰে ভাৰত-পাকিস্তান সীমান্তৰ কৃষকসকলক ৪৮ ঘন্টাৰ ভিতৰত শস্য চপোৱা কাম সম্পূৰ্ণ কৰি খেতিপথাৰ পৰিষ্কাৰ কৰিবলৈ জৰুৰী নিৰ্দেশ জাৰি কৰা হৈছে।
উচ্চ নিৰাপত্তা ব্যৱস্থাই সীমান্তৰ বেৰ আৰু শূন্য ৰেখাৰ মাজৰ স্পৰ্শকাতৰ অঞ্চলত অৱস্থিত কৃষিভূমি থকা হাজাৰ হাজাৰ কৃষকক প্ৰভাৱিত কৰিছে— যিটো পঞ্জাৱৰ সীমান্তৱৰ্তী সম্প্ৰদায়সমূহৰ বাবে এক অনন্য প্ৰত্যাহ্বান যিয়ে ৫৩০ কিলোমিটাৰ আন্তঃৰাষ্ট্ৰীয় সীমান্তৰ সিপাৰে প্ৰায় ৪৫,০০০ একৰ ভূমিত খেতি কৰি আহিছে।
অমৃতসৰ, টাৰ্ণ তৰণ, ফিৰোজপুৰ, আৰু ফাজিলকা জিলাৰ গাঁৱৰ গুৰদ্বাৰসমূহে কৃষকসকলক সকীয়াই দি এই ঘোষণা সম্প্ৰচাৰ কৰিছিল যে, এই আগফালৰ অঞ্চলসমূহৰ প্ৰৱেশদ্বাৰ অতি সোনকালে বন্ধ কৰি দিয়া হ’ব, যাৰ ফলত পৰিস্থিতি আৰু অধিক অৱনতি ঘটিলে তেওঁলোকৰ ভূমিত প্ৰৱেশ অনিৰ্দিষ্টকাললৈ বন্ধ হোৱাৰ সম্ভাৱনা আছে।
সীমান্তৱৰ্তী গাঁও ভংগালাৰ কৃষক ৰঘবীৰ সিং ভংগালাই কয় যে, বি এছ এফৰ জোৱানসকলে খেতিপথাৰৰ কাম শেষ কৰিবলৈ যোৱা দুদিন ধৰি কৃষকসকলৰ ওপৰত হেঁচা প্ৰয়োগ কৰিছে আৰু পৰিস্থিতি বেয়া হোৱাৰ বাবে গেট বন্ধ কৰি দিয়া হ’ব বুলি কৈ আহিছে।
কৃষিৰ এক জটিল সন্ধিক্ষণত এই নিৰ্দেশ দিয়া হৈছে, ইতিমধ্যে কিছু অঞ্চলত শেহতীয়াকৈ হোৱা বৰষুণৰ বাবে শস্য চপোৱাত পলম হৈছে। বেছিভাগ কৃষকে প্ৰাথমিক চপোৱা সম্পূৰ্ণ কৰিলেও বহুতে এতিয়াও গৰুৰ খাদ্যৰ বাবে ঘেঁহুৰ খেৰ প্ৰক্ৰিয়াকৰণ কৰিবলৈ বাকীয়ে আছে।
সীমান্তৱৰ্তী এখন গাঁৱৰ পৰা সুৰজিৎ সিং ভূৰাই কয় যে, "সীমান্তৰ কাষৰ পথাৰলৈ অধিক মেচিন কঢ়িয়াই নিয়াৰ অনুমতি দিয়া হৈছে যাতে কাম সোনকালে সমাপ্ত কৰিব পৰা যায়। দুদিনতে কৃষকসকলে একো কৰিব নোৱাৰিলে। গেট বন্ধ কৰাৰ সতৰ্কবাণী আমাৰ ওপৰত দিয়া আছে। কৃষকসকলেও ভয় খাইছে কাৰণ তেওঁলোকে নাজানে যে ভৱিষ্যতে কথাবোৰ বেয়া হৈ গলে কেনেকৈ শস্য সিঁচিব।"
ফিৰোজপুৰ জিলাত ৰাজা ৰায় গাঁৱৰ পৰা লখৱিন্দৰ সিঙে এই প্ৰত্যাহ্বান স্বীকাৰ কৰি কয়, "৮০%তকৈ অধিক ঘেঁহু চপোৱাৰ কাম শেষ হ’লেও নিৰ্দিষ্ট সময়ৰ ভিতৰত পিছলৈ গৰু-ম’হৰ খাদ্য হিচাপে ব্যৱহাৰ কৰিবলগীয়া ‘খেৰ’ চপাই সংগ্ৰহ কৰাটো যথেষ্ট প্ৰত্যাহ্বানজনক হব।"
বি এছ এফৰ বিষয়াসকলে নিশ্চিত কৰিছে যে, এই নিৰ্দেশনা পহলগাম আক্ৰমণৰ পিছত ভাৰত আৰু পাকিস্তানৰ মাজত কূটনৈতিক আৰু সামৰিক উত্তেজনাৰ পিছত বৰ্ধিত নিৰাপত্তা ব্যৱস্থাৰ অংশস্বৰূপ। সন্ত্ৰাসবাদী আক্ৰমণৰ ফলত ইতিমধ্যে দুয়োখন দেশে কূটনৈতিক সম্পৰ্ক নিম্নগামী কৰাৰ লগতে গুৰুত্বপূৰ্ণ সীমান্ত ক্ৰছিং বন্ধ কৰি দিছে।
বি এছ এফৰ এগৰাকী জ্যেষ্ঠ বিষয়াই কয়, "আমি আমাৰ কৃষকৰ উদ্বেগ বুজি পাওঁ, কিন্তু ৰাষ্ট্ৰীয় নিৰাপত্তা সৰ্বোচ্চ। আগতে কোনো ধৰণৰ অসুবিধাৰ পৰা হাত সাৰিবলৈ আমি সকলো খেতিয়কক সম্পূৰ্ণ সহযোগিতা আগবঢ়াবলৈ আহ্বান জনাইছো।"
নিৰাপত্তা বাহিনীয়ে জৰুৰী খেতিপথাৰ পৰিষ্কাৰৰ একাধিক কাৰণ উল্লেখ কৰিছে। চপোৱা নোহোৱা শস্যই সীমান্ত টহলৰ বাবে দৃশ্যমানতাত বাধাৰ সৃষ্টি কৰিব পাৰে আৰু সীমা অতিক্ৰম কৰি অনুপ্ৰৱেশৰ প্ৰচেষ্টাৰ সময়ত আৱৰণৰ বাবে সম্ভাৱনাময়ভাৱে শোষণ কৰিব পাৰে। এই অঞ্চলসমূহ মুকলি কৰাটো নিশ্চিত কৰি বি এছ এফে স্পৰ্শকাতৰ সীমান্তত চোৰাংচোৱাগিৰিৰ ক্ষমতা শক্তিশালী কৰাৰ লক্ষ্য লৈছে।
জম্মু অঞ্চলত আন্তঃৰাষ্ট্ৰীয় সীমান্তত পাকিস্তানে ৰেঞ্জাৰ নিয়োগক শক্তিশালী কৰাৰ খবৰ পোৱাৰ সময়তে এই বৃদ্ধি পোৱা সতৰ্কতা প্ৰকাশ পাইছে, কাঠুৱা, চাম্বা আৰু জম্মু জিলাৰ বিপৰীতে অতিৰিক্ত বাহিনী স্থাপন কৰা হৈছে।
সুৰজিৎ সিং ভূৰাই লক্ষ্য কৰে যে, "দুয়োখন দেশৰ মাজত হোৱা উত্তেজনাৰ বাবে আটাইতকৈ বেছি ক্ষতিগ্ৰস্ত হৈছে কৃষকসকল। সীমান্তৰ কাষৰ পৰিস্থিতিৰ ওপৰতে তেওঁলোকৰ জীৱিকা নিৰ্ভৰ কৰে। কোনো সমস্যাৰ সন্মুখীন হ’লে আমি বিএছএফৰ উচ্চপদস্থ বিষয়াৰ কাষ চাপিম।"
একাংশ কৃষকে কটকটীয়া সময়সীমা পূৰণ কৰাত সহায়ক হোৱাকৈ প্ৰশাসনক অতিৰিক্ত শস্য চপোৱাৰ সঁজুলি যোগান ধৰাৰ পৰামৰ্শ দিছে। লখৱিন্দৰ সিঙে পৰামৰ্শ দিয়ে, "প্ৰশাসনে আগবাঢ়ি আহি সৰ্বাধিক শস্য চপোৱা কৃষকসকলক অতি সোনকালে খেৰ সংগ্ৰহ কৰিবলৈ সুবিধা প্ৰদান কৰিব লাগিব।"
এই ঘোষণাৰ ভিডিঅ’সমূহ ছ’চিয়েল মিডিয়াত আপলোড কৰি একাংশ টিভি চেনেলৰ দ্বাৰা টেলিকাষ্ট কৰাৰ পিছত অমৃতসৰৰ উপাযুক্ত সাক্ষী সাৱনীয়ে বিএছএফৰ হৈ এনে কোনো ঘোষণা কৰা হোৱা নাই বুলি উল্লেখ কৰিছে। বি এছ এফৰ বিষয়াৰ সৈতে কথা পাতিছে বুলি জানিবলৈ দিয়ে উপায়ুক্তগৰাকীয়ে।
তেওঁ লগতে কয়, " প্ৰশাসনে নাগৰিকক এনে ভিত্তিহীন উৰাবাতৰি অৱজ্ঞা কৰি চৰকাৰী চেনেলৰ জৰিয়তে তথ্য সত্যাপন কৰিবলৈ আহ্বান জনাইছে। নাগৰিকক এনে যিকোনো খবৰ স্থানীয় কৰ্তৃপক্ষ, যেনে পাটোৱাৰী, তহচিলদাৰ, বা জিলা প্ৰশাসনৰ বিষয়াৰ সৈতে স্পষ্ট কৰিবলৈ পৰামৰ্শ দিয়া হৈছে।"
