নতুন দিল্লী
ইৰানৰ সাগৰৰ পাৰৰ দক্ষিণ পাৰ্ছৰ বৃহৎ প্ৰাকৃতিক গেছ ক্ষেত্ৰখনত বুধবাৰে ইজৰাইলে আক্ৰমণ চলায়। আনহাতে টেহৰাণে সমগ্ৰ উপসাগৰীয় শক্তি কেন্দ্ৰসমূহক লক্ষ্য কৰি ইয়াৰ প্ৰতিশোধ লয়। ইয়াৰ উপৰি অধিক ধ্বংসাত্মক আক্ৰমণৰ ভাবুকি দিয়াৰ ফলত মধ্যপ্ৰাচ্যৰ যুদ্ধ তীব্ৰতৰ হৈ পৰিছে।
আনহাতে, এই যুদ্ধই ২০ দিনত প্ৰৱেশ কৰাৰ লগে লগে শেহতীয়াকৈ সংঘটিত আক্ৰমণে ইন্ধন যোগানত ব্যাপক আক্ৰমণৰ আশংকা সৃষ্টি কৰিছে। যাৰ ফলত ইতিমধ্যে প্ৰভাৱ পেলোৱা বিশ্বৰ বজাৰসমূহ অধিক অস্থিৰ হ'ব পাৰে।
বিষয়টোৰ সৈতে পৰিচিত এক সূত্ৰৰ উদ্ধৃতি দি এছোচিয়েটেড প্ৰেছে প্ৰকাশ কৰা অনুসৰি, দক্ষিণ পাৰ্ছত ইজৰাইলৰ আক্ৰমণৰ পৰিকল্পনাৰ বিষয়ে আমেৰিকাক অৱগত কৰা হৈছিল যদিও তেওঁলোকে ইয়াত অংশগ্ৰহণ কৰা নাছিল।
প্ৰাকৃতিক গেছ ক্ষেত্ৰখন ইৰান (দক্ষিণ পাৰ্ছ নামেৰে জনাজাত) আৰু কাটাৰৰ (উত্তৰ ক্ষেত্ৰ বুলি জনাজাত) মাজত ভাগ কৰা হৈছে। ইয়াত ১৮০০ ট্ৰিলিয়ন ঘনফুটতকৈও অধিক গেছ আছে। ইৰাণৰ ৪০%তকৈ অধিক গেছৰ মজুত ইয়াত আছে।
ইজৰাইলে ইছলামিক ৰিপাব্লিকৰ চোৰাংচোৱা বিভাগৰ মুৰব্বী ইছমাইল খাতিবক হত্যা কৰাৰ পিছত ইৰানে অধিক আক্ৰমণৰ ভাবুকি দিছিল। এই ঘটনাটো হৈছে প্ৰায় তিনি সপ্তাহ পূৰ্বে যুদ্ধ আৰম্ভ হোৱাৰ পিছত ইৰানৰ নেতৃত্বক হত্যা কৰাৰ ধাৰাবাহিক আক্ৰমণৰ শেহতীয়া ঘটনা।
আনহাতে, টেহৰাণে নিজৰ দক্ষিণ পাৰ্ছ ক্ষেত্ৰত আক্ৰমণৰ পিছত নিজৰ শক্তি খণ্ডত পৰৱৰ্তী যিকোনো আক্ৰমণৰ তীব্ৰ সঁহাৰি জনাব বুলি কয়।
ইৰাণৰ সংবাদ মাধ্যমে প্ৰেৰণ কৰা এক বিবৃতিত ৰিভলুচনেৰী গাৰ্ডে কয়, "আমি আপোনালোকক আকৌ এবাৰ সকীয়াই দিছোঁ যে আপোনালোকে ইছলামিক গণতন্ত্ৰৰ শক্তিৰ আন্তঃগাঁথনি আক্ৰমণ কৰি ডাঙৰ ভুল কৰিলে । যদি ইয়াৰ পুনৰাবৃত্তি হয়, তেন্তে আপোনালোকৰ শক্তি আন্তঃগাঁথনি আৰু আপোনালোকৰ মিত্ৰশক্তিৰ ওপৰত অধিক আক্ৰমণ সম্পূৰ্ণৰূপে ধ্বংস নোহোৱালৈকে বন্ধ নহ'ব।"
অৱশ্যে ইজৰাইলী সেনাই দক্ষিণ পাৰ্ছ আক্ৰমণ সন্দৰ্ভত কোনো মন্তব্য কৰা নাই। কাটাৰৰ ৰাষ্ট্ৰীয় শক্তি কোম্পানীয়ে ক্ষেপণাস্ত্ৰ আক্ৰমণৰ ফলত ইয়াৰ মূল গেছ কেন্দ্ৰত অগ্নিকাণ্ড সংঘটিত হৈ 'ব্যাপক ক্ষতি' হোৱা বুলি কোৱাৰ পিছত ইৰাণে অধিক প্ৰতিশোধৰ ভাবুকি প্ৰদান কৰে । যাৰ ফলত ডোহাত থকা ইৰাণৰ দুজন কূটনীতিবিদক বহিষ্কাৰ কৰা হয়।
ছৌদি আৰবেও কয় যে তেওঁলোকে পূব দিশৰ শক্তি আন্তঃগাঁথনি লক্ষ্য কৰি নিক্ষেপ কৰা ড্ৰ’ণসমূহক বাধা দিয়াৰ বিপৰীতে বেলিষ্টিক মিছাইলৰ ধ্বংসাৱশেষ ৰিয়াধৰ দক্ষিণে থকা এটা শোধনাগাৰৰ ওচৰত পৰে।
ইতিমধ্যে হৰমুজ প্ৰণালীৰ মাজেৰে যাতায়াতৰ প্ৰায় সম্পূৰ্ণ ব্যাঘাত জন্মাৰ ফলত তেলৰ মূল্য পুনৰ বৃদ্ধি পাইছে । খাৰুৱা তেলৰ বাবে আমেৰিকাৰ মূল মানক বৃহস্পতিবাৰে তিনি শতাংশতকৈ অধিক বৃদ্ধি পাইছে।
