জয়পুৰ
মাৰ্কিন যুক্তৰাষ্ট্ৰৰ উপ-ৰাষ্ট্ৰপতি জে দি ভ্যান্সে মঙ্গলবাৰে জয়পুৰত অনুষ্ঠিত এক অনুষ্ঠানত কয় যে, বৰ্তমানৰ ডোনাল্ড ট্ৰাম্প চৰকাৰে ভাৰতৰ প্ৰতি আগৰ ৱাশিংটনৰ “উপদেশমূলক” মনোভাৱৰ পৰা আঁতৰিছে আৰু উভয় ৰাষ্ট্ৰই একেঅন্যক বহুত দিব পৰা আছে।
ভ্যান্সে কয়, “আমি এতিয়া কোনো এটা নিৰ্দিষ্ট পদ্ধতি অনুসৰণ কৰিবলৈ আপোনালোকক উপদেশ দিবলৈ অহা নাই। অতীতত বহু সময়তে, ৱাশিংটনে প্ৰধানমন্ত্ৰী মোদীৰ প্ৰতি উপদেশমূলক মনোভাৱৰে আগবাঢ়িছিল।”
উপ-ৰাষ্ট্ৰপতি ভ্যান্সে আগৰ চৰকাৰসমূহক সমালোচনা কৰি কয় যে, সেইসমূহে ভাৰতক মূলত সস্তা শ্ৰমিকৰ উৎস হিচাপে চাইছিল আৰু প্ৰধানমন্ত্ৰী মোদীৰ চৰকাৰক সমালোচনা কৰিছিল, যাৰ চৰকাৰক তেওঁ “গণতান্ত্ৰিক বিশ্বৰ আটাইতকৈ জনপ্ৰিয় চৰকাৰ” বুলি অভিহিত কৰে।
ভ্যান্সে কয়, “আগৰ চৰকাৰসমূহে ভাৰতক সস্তা শ্ৰমিকৰ উৎস হিচাপে চাইছিল। একেদিকে, তেওঁলোকে প্ৰধানমন্ত্ৰী মোদীৰ চৰকাৰক সমালোচনা কৰিছিল, যি নিঃসন্দেহে গণতান্ত্ৰিক বিশ্বত আটাইতকৈ জনপ্ৰিয়। আৰু মই প্ৰধানমন্ত্ৰী মোদীক কালি ৰাতি কৈছিলো যে তেওঁৰ জনপ্ৰিয়তা আৰু জনসমৰ্থনৰ হাৰ মোৰ বাবে হিংসা লাগিবলগীয়া।”
ভ্যান্সে মোদীক “এক কঠোৰ মধ্যস্থতাকাৰী” হিচাপে বৰ্ণনা কৰি কয়, এই দৃঢ়তাই তেওঁক ৱাশিংটনত সন্মানীয় কৰি তোলে।
তেওঁৰ এই মন্তব্যসমূহ দুয়োখন ৰাষ্ট্ৰৰ মাজত দ্বিপাক্ষিক বাণিজ্য চুক্তি চূড়ান্ত কৰিবলৈ চলি থকা দ্ৰুত প্ৰচেষ্টাৰ মাজত আহিছে, যিয়ে দুয়োখন ৰাষ্ট্ৰৰ অৰ্থনৈতিক সম্পৰ্কক নতুন ৰূপ দিব পাৰে।
ৰাষ্ট্ৰপতি ডনাল্ড ট্ৰাম্পে আমেৰিকা যুক্তৰাষ্ট্ৰ আৰু ভাৰত দুয়োখন দেশৰ বিকাশ হোৱাটো বিচাৰে, আৰু দুয়োখন দেশে জয়-জয় অংশীদাৰিত্বৰ বাবে বাণিজ্য, প্ৰতিৰক্ষা আৰু শক্তিকে ধৰি বিভিন্ন ক্ষেত্ৰত একেলগে কাম কৰিব পাৰে, আমেৰিকাৰ উপ-ৰাষ্ট্ৰপতি জে ডি ভ্যান্সে কয়।
তেওঁৰ ভ্ৰমণ এনে এক সময়ত আহিছে যেতিয়া ৰাষ্ট্ৰপতি ডনাল্ড ট্ৰাম্পৰ প্ৰশাসনে ঘোষণা কৰা তীব্ৰ শুল্কৰ ওপৰত ৯০ দিনৰ বিৰতি সমাপ্ত হোৱাৰ আগতে ভাৰতে ইয়াৰ সৰ্ববৃহৎ বাণিজ্যিক অংশীদাৰ আমেৰিকা যুক্তৰাষ্ট্ৰৰ সৈতে আগতীয়া বাণিজ্য চুক্তি কৰিবলৈ চেষ্টা কৰি আছে।
প্ৰতিৰক্ষাৰ ক্ষেত্ৰত, ভ্যান্সে কয়, “আমাৰ ৰাষ্ট্ৰসমূহৰ মাজত ঘনিষ্ঠ সম্পৰ্ক আছে আৰু আমি বহু সামৰিক প্লেটফৰ্ম একেলগে গঢ়ি তুলিব পাৰো।”
প্ৰধানমন্ত্ৰী মোদীৰ সৈতে হোৱা আলোচনাৰ বিষয়ে, ভ্যান্সে কয়, “আমাৰ বৈঠকৰ পিছত, আমি দ্বিপাক্ষিক বাণিজ্য চুক্তিৰ ক্ষেত্ৰত গুৰুত্বপূর্ণ অগ্ৰগতি সাধন কৰিছো আৰু আগলৈ আলোচনা চলাবলৈ এক ৰোডমেপ স্থাপন কৰিছো, যিয়ে ভাৰতক অধিক শুল্ক বৃদ্ধিৰ পৰা ৰক্ষা কৰিব পাৰে বুলি আশা কৰা হৈছে।”
ভ্যান্সে আৰু কয়, “আমি ইতিহাস, সংস্কৃতি, ধৰ্মক সন্মান জনাই আগবাঢ়িব বিচাৰো, আমি বাণিজ্য কৰিব বিচাৰো, আৰু আমাৰ বন্ধু-ৰাষ্ট্ৰসমূহৰ সৈতে ভাল চুক্তি কৰিবলৈ চেষ্টা কৰো। আমি বিশ্বাস কৰো, ভৱিষ্যৎ গঢ়িব লাগে গৌৰৱৰ সৈতে, অবিশ্বাস আৰু ভয়ৰ সৈতে নহয়।”
ভ্যান্সে ভাৰতৰ প্ৰাচীন স্থাপত্য, ইতিহাস আৰু পৰম্পৰাৰ প্ৰশংসা কৰি কয়, “ভাৰতৰ ইতিহাস আৰু পৰম্পৰাৰ সমৃদ্ধিত মই অভিভূত, লগতে ভৱিষ্যৎকলৈ ভাৰতৰ স্পষ্ট লক্ষ্যত চমকিত।”
ভ্যান্সে স্পষ্টকৈ কয়, “আমেৰিকা এতিয়া ভাৰতলৈ অংশীদাৰ হিচাপে আহিছে, উপদেশদাতা হিচাপে নহয়।”
