মুম্বাই
ভাৰতত নক্সালবাদে এক ডাঙৰ আঘাতৰ সন্মুখীন হৈছে, কাৰণ চিপিআই (মাওবাদী)ৰ জ্যেষ্ঠ নেতা মল্লজোলু ভেনুগোপাল ৰাও, যাক ভূপতি, অভয়, আৰু সোণু বুলিও কোৱা হয়, আন ৬০ জন কেডাৰৰ সৈতে আত্মসমৰ্পণ কৰে। সূত্ৰৰ পৰা জানিব পৰা মতে, বুধবাৰে গাধচিৰোলিত মহাৰাষ্ট্ৰৰ মুখ্যমন্ত্ৰী দেৱেন্দ্ৰ ফাদনবিছৰ আগত আনুষ্ঠানিকভাৱে আত্মসমৰ্পণ কৰিব ভেনুগোপাল ৰাৱে।
৭০ বছৰীয়া ভেনুগোপাল ৰাও নিষিদ্ধ সংগঠন চিপিআই (মাওবাদী)ৰ সৰ্বোচ্চ সিদ্ধান্ত গ্ৰহণকাৰী সংস্থা পলিটব্যুৰোৰ সদস্য হিচাপে কাম কৰি আহিছে আৰু গাধচিৰোলিত দণ্ডকাৰণ্য বিশেষ খণ্ড সমিতিৰ দায়িত্বত আছিল। তেওঁ এই সংগঠনটোৰ বাবে কেন্দ্ৰীয় সামৰিক আয়োগৰ নেতৃত্বও দিছিল, যিটো মহাৰাষ্ট্ৰ-ছত্তীশগড় সীমান্তৰ নক্সাল দুৰ্গ বুলি গণ্য কৰা ঘন বনাঞ্চল আবুঝমাদৰ পৰা চলাইছিল।
নিৰাপত্তা বাহিনীৰ মতে ভেনুগোপাল ৰাৱে কেইবাটাও ডাঙৰ আক্ৰমণৰ ষড়যন্ত্ৰ কৰিছিল, য’ত ২০১০ চনত চিআৰপিএফৰ জোৱানৰ ওপৰত দনটেৱাড়া আক্ৰমণত ৭৬ জন জোৱানৰ প্ৰাণ কাঢ়িছিল। তেওঁৰ বিৰুদ্ধে হত্যা, হত্যাৰ চেষ্টা, নিৰাপত্তা বাহিনীক আক্ৰমণ, অগ্নিসংযোগ আদিকে ধৰি একাধিক অভিযোগ আছে । সমগ্ৰ মহাৰাষ্ট্ৰ, তেলেংগানা, আৰু ছত্তীশগড়ত তেওঁৰ ওপৰত ৭ কোটি টকাতকৈ অধিক পুৰস্কাৰ আছিল।
পূৰ্বৰ অন্ধ্ৰপ্ৰদেশৰ পেডাপ্পালিৰ পৰা বাণিজ্য স্নাতক ভেনুগোপাল ৰাও ২০১০ চনত নিৰাপত্তা বাহিনীৰ সৈতে মুখামুখি হৈ নিহত হোৱা জ্যেষ্ঠ নক্সাল নেতা মাল্লাজোলু কোটেশ্বৰ ৰাও ওৰফে কিষেনজীৰ কনিষ্ঠ ভাতৃ। ২০১৮ চনত তেওঁৰ পত্নী তাৰাক্কাই গাধচিৰোলি আৰক্ষীৰ ওচৰত আত্মসমৰ্পণ কৰিছিল।
গাধচিৰোলি আৰক্ষীৰ বিষয়াসকলে এই আত্মসমৰ্পণক নিৰাপত্তা বাহিনীৰ বাবে এক বৃহৎ জয় আৰু নক্সাল প্ৰভাৱ নিৰ্মূলৰ দিশত এক উল্লেখযোগ্য পদক্ষেপ বুলি অভিহিত কৰে, যিটো কেন্দ্ৰীয় গৃহমন্ত্ৰী অমিত শ্বাহে ২০২৬ চনৰ ভিতৰত নক্সালবাদ সম্পূৰ্ণৰূপে নিৰ্মূল হ’ব বুলি পূৰ্বে দিয়া বক্তব্যৰ সৈতে মিল খায়।
ভেনুগোপাল ৰাও আৰু তেওঁৰ কেডাৰসকলৰ আনুষ্ঠানিক আত্মসমৰ্পনে বিদ্ৰোহ বিৰোধী প্ৰচেষ্টাক শক্তিশালী কৰাৰ লগতে মধ্য আৰু পূব ভাৰতত নক্সাল নেটৱৰ্ক দুৰ্বল হোৱাৰ সংকেত দিব বুলি আশা কৰা হৈছে।
