পাটনা
প্ৰধানমন্ত্ৰী নৰেন্দ্ৰ মোদীৰ উপস্থিতিত দশমবাৰৰ বাবে আজি বিহাৰৰ মুখ্যমন্ত্ৰী হিচাপে শপত গ্ৰহণ কৰে জনতা দল ইউনাইটেডৰ মুৰব্বী নীতিশ কুমাৰে। পাটনাৰ ঐতিহাসিক গান্ধী ময়দানত অনুষ্ঠিত শপত গ্ৰহণ অনুষ্ঠানত শপত গ্ৰহণ কৰে নীতিশ কেবিনেটে। শপত গ্ৰহণ অনুষ্ঠানত প্ৰধানমন্ত্ৰী নৰেন্দ্ৰ মোদীৰ লগতে কেইবাগৰাকী কেন্দ্ৰীয় মন্ত্ৰী, মুখ্যমন্ত্ৰী উপস্থিত থাকে।
বিহাৰৰ মুখ্যমন্ত্ৰী হিচাপে নীতিশ কুমাৰৰ দশম শপত গ্ৰহণ অনুষ্ঠানৰ পূৰ্বে কেন্দ্ৰীয় গৃহ মন্ত্ৰী অমিত শ্বাহ বুধবাৰে সন্ধিয়া পাটনাত উপস্থিত হয়। শ্বাহক বিমান বন্দৰত বিজেপিৰ ৰাষ্ট্ৰীয় সভাপতি জে পি নাড্ডা, বিহাৰ বিজেপিৰ সভাপতি দিলীপ জয়ছোৱাল আৰু অন্যান্য নেতৃবৃন্দই আদৰণি জনায়। ৰাষ্ট্ৰীয় গণতান্ত্ৰিক মিত্ৰজোঁটে (NDA) ২০২ টা বিধানসভা সমষ্টিত জয়লাভ কৰাৰ পিছত নীতিশ কুমাৰে বিহাৰত চৰকাৰ গঠনৰ দাবী উত্থাপন কৰে। বুধবাৰে তেওঁ বিহাৰৰ ৰাজ্যপাল আৰিফ মহম্মদ খানক সাক্ষাৎ কৰে আৰু মুখ্যমন্ত্ৰী পদৰ পৰা পদত্যাগ কৰে। পাটনাৰ ঐতিহাসিক গান্ধী ময়দানত শপত গ্ৰহণ কৰাৰ পিছত নীতিশ কুমাৰ আজি দশমবাৰৰ বাবে বিহাৰৰ মুখ্যমন্ত্ৰী হিচাপে শপত গ্ৰহণ কৰিব, য'ত জয়প্ৰকাশ নাৰায়ণে ১৯৭৪ চনত ভাষণৰ সময়ত "সম্পূৰ্ণ বিপ্লৱৰ" আহ্বান জনাইছিল। শপত গ্ৰহণ অনুষ্ঠানৰ এদিন পূৰ্বেই NDAৰ বিধায়িনী দলৰ নেতা হিচাপে সৰ্বসন্মতিক্ৰমে নীতিশ কুমাৰক নিৰ্বাচিত কৰা হয়। পাটনাৰ নিজা বাসভৱনত অনুষ্ঠিত এখন সভাত তেওঁক JD(U)ৰ বিধায়িনী দলৰ নেতা হিচাপে নিৰ্বাচিত কৰা হয়। নীতিশ কুমাৰৰ ডেপুটি সম্ৰাট চৌধুৰী আৰু বিজয় কুমাৰ সিনহাৰ লগতে লোক জনশক্তি পাৰ্টি (ৰামবিলাস) বা [LJP (RV)] ৰ মুৰব্বী চিৰাগ পাছোৱান আৰু বিহাৰ ভাৰতীয় জনতা পাৰ্টিৰ (বিজেপি) সভাপতি দিলীপ কুমাৰ জয়ছোৱাল উক্ত সভাত উপস্থিত আছিল। উল্লেখ্য যে ২০২৫ চনৰ বিহাৰ বিধানসভা নিৰ্বাচনত NDA-এ ২৪৩ খন আসনৰ ভিতৰত ২০২ খন আসন লাভ কৰি ঐতিহাসিক বিজয় সাব্যস্ত কৰে। আনহাতে মহাগোট বন্ধনে মাত্ৰ ৩৫ খন আসন লাভ কৰিবলৈ সক্ষম হয়।
শাসকীয় মিত্ৰজোঁটে ২৪৩জনীয়া সদস্যৰ বিহাৰ বিধানসভাত তিনি-চতুৰ্থাংশ সংখ্যাগৰিষ্ঠতা লাভ কৰে। ৰাজ্যিক নিৰ্বাচনত NDA-এ দ্বিতীয়বাৰৰ বাবে ২০০খন আসন লাভ কৰে। ২০১০ চনত তেওঁলোকে ২০৬ খন আসন লাভ কৰিছিল। NDAত ভাৰতীয় জনতা পাৰ্টিয়ে (BJP) ৮৯খন, জনতা দল (United) ৮৫খন, লোক জনশক্তি পাৰ্টিয়ে (ৰামবিলাস) (LJPRV) ১৯খন, হিন্দুস্তানী আৱাম মৰ্চা (ধৰ্মনিৰপেক্ষ) (HAMS) ৫খন আৰু ৰাষ্ট্রীয় লোক মৰ্চাই ৪খন আসন লাভ কৰে। বিৰোধী দলসমূহৰ ভিতৰত ৰাষ্ট্রীয় জনতা দল (RJD) ২৫খন আসন, ভাৰতীয় জাতীয় কংগ্রেছ ছখন, ভাৰতৰ কমিউনিষ্ট দল (মার্ক্সবাদী-লেনিনবাদী) (Liberation) [CPI(ML)(L)] দুখন, ইণ্ডিয়ান ইনক্লুছিভ পাৰ্টি (IIP) এখন আৰু ভাৰতৰ কমিউনিষ্ট দল (মার্ক্সবাদী) [CPI (M) ]-এ এখন আসন লাভ কৰে। অল ইণ্ডিয়া মজলিছ-ই-ইত্তেহাদুল মুছলিমীন (AIMIM)-এ পাঁচখন আসন লাভ কৰাৰ বিপৰীতে বহুজন সমাজ পাৰ্টিয়ে (BSP) এখন আসন লাভ কৰে। বিহাৰ বিধানসভা নিৰ্বাচন ৬ আৰু ১১ নৱেম্বৰত দুটা পৰ্যায়ত অনুষ্ঠিত হৈছিল।
