গুৱাহাটী
'হিন্দু'ৰ নতুন সংজ্ঞা দাঙি ধৰিছে RSSৰ মুৰব্বী মোহন ভাগৱতে৷ তেওঁ কয় যে ভাৰতক লৈ যিয়ে গৌৰৱ কৰে তেওঁৱেই হিন্দু। যিসকল লোকে দেশক সন্মান কৰে, পূৰ্বপুৰুষক সন্মান কৰাৰ লগতে ভাৰতৰ সাংস্কৃতিক ঐতিহ্যক মূল্য দিয়ে তেওঁলোকক হিন্দু বুলি ক'ব পাৰি। তেওঁ লগতে কয় যে ভাৰতক ভালপোৱা আৰু সন্মান কৰা মুছলমান আৰু খ্ৰীষ্টানসকলো হিন্দুৰ এই বহল সংজ্ঞাৰ ভিতৰতে পৰে।
‘‘মাতৃভূমিৰ প্ৰতি সমৰ্পণেৰে আমাৰ পূৰ্বপুৰুষসকলৰ গৌৰৱ আৰু সংস্কৃতিৰ উত্তৰাধিকাৰক যিসকলে আগুৱাই লৈ যায় তেওঁলোক সকলো হিন্দু। যদি মুছলমান আৰু খ্ৰীষ্টানসকলে তেওঁলোকৰ পূজা, ৰীতি-নীতি আৰু পৰম্পৰা ত্যাগ নকৰাকৈ এই দেশক পূজা কৰে, ভাৰতীয় সংস্কৃতি অনুসৰণ কৰে আৰু ভাৰতীয় পূৰ্বপুৰুষক লৈ গৌৰৱ কৰে, তেন্তে তেওঁলোক হিন্দু।’’- মোহন ভাগৱতে কয়৷
RSSৰ শতবাৰ্ষিকী উদযাপনৰ বাবে তিনিদিনীয়া অসম ভ্ৰমণৰ সময়ত তেওঁ গুৱাহাটীত বিশিষ্ট ব্যক্তিসকলৰ সৈতে এক সভাত ভাষণ প্ৰদান কৰে। তেওঁ কয় যে 'হিন্দু' শব্দটো কেৱল ধৰ্মৰ বিষয়ে নহয়, ই হাজাৰ হাজাৰ বছৰ ধৰি চলি অহা সভ্যতাক প্ৰতিনিধিত্ব কৰে। হিন্দু ধৰ্মক ধৰ্মীয় অৰ্থত গ্ৰহণ কৰা উচিত নহয় বুলি তেওঁ মন্তব্য কৰে৷ ভাৰতত হিন্দু ৰাষ্ট্রৰ ভাবধাৰা ইতিমধ্যে প্রতিফলিত হোৱা বুলি তেওঁ উল্লেখ কৰে। তেওঁ উল্লেখ কৰে যে ভাৰতক 'হিন্দু ৰাষ্ট্ৰ' হিচাপে পৰিচয় দিয়াৰ বাবে আনুষ্ঠানিক পৰিচয় দিয়াৰ প্ৰয়োজন নাই, কিয়নো ইয়াৰ সভ্যতাই ইতিমধ্যে ইয়াক প্ৰতিফলিত কৰিছে।
ভাগৱতে লগতে কয় যে RSS কাৰো বিৰোধিতা কৰিবলৈ গঠন কৰা হোৱা নাছিল, বৰঞ্চ শক্তিশালী চৰিত্ৰ গঢ়ি তোলাৰ বাবে আৰু ভাৰতক বিশ্বজনীন দেশ হোৱাত সহায় কৰাৰ বাবেহে গঠন কৰা হৈছিল। তেওঁ RSSক দেশৰ বৈচিত্ৰপূৰ্ণ সমাজক একত্ৰিত কৰাৰ এটা উপায় হিচাপে অভিহিত কৰে।
অসমৰ জনগাঁথনিৰ পৰিৱৰ্তনক লৈ উদ্বিগ্নতা প্ৰকাশ কৰি তেওঁ কয় যে জনসাধাৰণে আত্মবিশ্বাসী, সতৰ্ক আৰু নিজৰ ভূমি আৰু পৰিচয়ৰ সৈতে সংযুক্ত হৈ থকা উচিত। তেওঁ অবৈধ প্ৰব্ৰজন, হিন্দুসকলৰ বাবে তিনিটা সন্তানৰ নীতি অন্তৰ্ভুক্ত কৰা জনসংখ্যা নীতিৰ প্ৰয়োজনীয়তা, আৰু বিভাজন সৃষ্টি কৰা ধৰ্মীয় ধৰ্মান্তৰকৰণ বন্ধ কৰাৰ দৰে বিষয় উত্থাপন কৰে। ভাগৱতে সকলোকে একেলগে কাম কৰি ৰাষ্ট্ৰ নিৰ্মাণত নিঃস্বাৰ্থভাৱে অৱদান আগবঢ়াবলৈ আহ্বান জনায়।
