গুৱাহাটী
কাগজৰ দলিল নিষিদ্ধ কৰি অসম চৰকাৰে সূচনা কৰিলে ই-দলিলৰ ব্যৱস্থা। ১ অক্টোবৰৰ পৰা কাৰ্যকৰী হোৱাকৈ কাগজৰ দলিল নিষিদ্ধ কৰাৰ লগে লগে ৰাজ্যত অব্যৱহৃত হৈ পৰি থাকিল চাৰিশ কোটি টকা মূল্যৰ কাগজৰ দলিল। এনে পৰিস্থিতিত অব্যৱহৃত হৈ পৰি থকা দলিলসমূহ পুনৰ ব্যৱহাৰ কৰাৰ আৰ্জিৰে গুৱাহাটী উচ্চ ন্যায়ালয়ত দাখিল হৈছে এখন ৰাজহুৱা স্বার্থজড়িত আবেদন (পি আই এল)।
উচ্চ ন্যায়ালয়ে এই আবেদনখনৰ শুনানি গ্রহণ কৰি অসম চৰকাৰ, ৰাজহ বিভাগৰ লগতে অন্যান্য চৰকাৰী পক্ষসমূহলৈ জাননী জাৰি কৰিছে। উল্লেখযোগ্য যে অসম চৰকাৰে কেবিনেট সিদ্ধান্তৰ জৰিয়তে ১ অক্টোবৰৰ পৰা কাগজৰ দলিল সম্পূর্ণৰূপে নিষিদ্ধ কৰিছিল। ইয়াৰ পৰিৱৰ্তে চৰকাৰে ই-দলিলৰ ব্যবস্থা কৰে।
কিন্তু চৰকাৰে গ্ৰহণ কৰা এনে পদক্ষেপৰ ফলত দলিল বিক্রেতা তথা গ্রাহকৰ মাজত হাহাকাৰৰ সৃষ্টি হয়। কিয়নো চৰকাৰৰ লগতে বিক্রেতা আৰু গ্ৰাহকৰ মাজতো চাৰিশ কোটি টকা মূল্যৰ দলিল অব্যৱহৃত হৈ থাকি গ'ল। বিক্ৰীৰ বাবে আগতীয়াকৈ আনি থোৱা লাখ লাখ টকাৰ দলিলসমূহ অব্যৱহৃত হৈ পৰি থকাত দহ সহস্রাধিক দলিল বিক্রেতা সম্প্রতি চৰম বিপদৰ সন্মুখীন হৈছে।
মন কৰিবলগীয়া যে, নির্ধাৰিত পৰিমাণৰ ধন জমা দি বিক্রেতাসকলে দলিলসমূহ আগতীয়াকৈ কোষাগাৰৰ পৰা আনি থয়। এনেদৰে জনসাধাৰণেও বিভিন্ন কামত দলিল ক্রয় কৰা দেখা যায়। কিন্তু সম্প্রতি বিক্রেতা, জনসাধাৰণৰ লগতে সর্বাধিকসংখ্যক দলিল অব্যৱহৃত হৈ পৰি ৰৈছে কোষাগাৰত। বিশেষকৈ উচ্চ মূল্যৰ দলিলসমূহ অব্যৱহৃত হৈ থকাত ব্যৱসায়ীসকলে যথেষ্ট কঠিন পৰিস্থিতিৰ সন্মুখীন হ'বলগা হৈছে। যাৰ বাবে অব্যৱহৃত দলিলসমূহ পুনৰ ব্যৱহাৰৰ আৰ্জিৰে সমাজকর্মী ধনুৰাম দাসে পি আই এলখন দাখিল কৰে।
