নতুন দিল্লী
যমুনাৰ জলাশয় এলেকাত হৈ থকা ধাৰাসাৰ বৰষুণৰ বাবে পুনৰবাৰ বৃদ্ধি পাইছে যমুনা নৈৰ জলস্তৰ। শুকুৰবাৰে সন্ধিয়া ৫ বজাত হাতীকুণ্ড বেৰেজত ৯০,৯২৬ কিউছেক বৰষুণৰ পৰিমাণ ৰেকৰ্ড কৰা হৈছে। ইতিমধ্যে দিল্লীৰ কিছু অংশত বান সদৃশ পৰিস্থিতিৰ সন্মুখীন হোৱাত দিল্লীৰ বাবে চিন্তনীয় বিষয় হৈ পৰিছে।
অৱশ্যে চৰকাৰীভাৱে এতিয়াও বানৰ কথা ঘোষণা কৰা নাই যদিও বিশেষজ্ঞসকলে সকীয়াই দিছে যে মাত্ৰ ৯ হাজাৰ কিউচেক পানী বৃদ্ধিয়ে এক সৰু বানপানীৰ সূচনা কৰিব পাৰে। অৱশ্য, সন্ধিয়া ৭ বজালৈকে পানী ৮৪,১৬০ কিউচেকলৈ হ্ৰাস পায়।
জলসিঞ্চন বিভাগৰ এগৰাকী কৰ্মচাৰী শ্বেৰ সিঙে কয়, "এই মুহূৰ্তত পৰিস্থিতি নিয়ন্ত্ৰণত আছে। অৱশ্যে জলাশয় এলেকাত বৰষুণ অব্যাহত থাকিলে বানপানীৰ দৰে পৰিস্থিতিৰ সৃষ্টি হ'ব পাৰে। ইয়াক নিৰীক্ষণ কৰা হৈছে ।"
বিভাগীয় কৰ্তৃপক্ষই জনোৱা মতে, হাতীকুণ্ডৰ পৰা নিৰ্গত হোৱা পানী দিল্লীত উপস্থিত হ’বলৈ প্ৰায় ৬৫ ঘণ্টা সময় লাগিব। যাৰ ফলত ৰাজধানীত পুনৰ বানৰ আশংকা বৃদ্ধি পাইছে। পানী নিৰ্গমনৰ হ্ৰাস-বৃদ্ধি হোৱাৰ লগে লগে জলসিঞ্চন বিভাগে ২৪ ঘণ্টাই নিৰীক্ষণ অব্যাহত ৰাখিছে। চলিত বাৰিষাৰ আৰম্ভণিতে যমুনা নৈয়ে বিপদসীমা অতিক্ৰম কৰিছিল । ফলত নিম্নভূমি অঞ্চল প্লাবিত হোৱাৰ বাবে তাৰ পৰা বাসিন্দাসকল আঁতৰি আহিবলৈ বাধ্য হৈছিল।
ইফালে প্ৰশাসনে তিনিদিনীয়া হাই এলাৰ্ট জাৰি কৰি দুৰ্যোগ ব্যৱস্থাপনা দলসমূহক সাজু কৰি ৰাখিছে। বিষয়াসকলে সকীয়াই দিয়ে যে জলাশয় অঞ্চলত আৰু যদি বৰষুণ হৈ থাকে তেন্তে যমুনা পুনৰ বিপজ্জনক হৈ উঠিব পাৰে।
