গুৱাহাটী
শুকুৰবাৰে প্ৰধানমন্ত্ৰী নৰেন্দ্ৰ মোদীয়ে ৪,৫৭০ কোটি টকাতকৈ অধিক ব্যয়সাপেক্ষ বিভিন্ন উন্নয়নমূলক প্ৰকল্প মুকলি কৰে আৰু অসমৰ কোকৰাঝাৰ তথা উত্তৰ-পূৰ্বাঞ্চলৰ যোগাযোগ ব্যৱস্থা উন্নত কৰাৰ লক্ষ্যৰে তিনিখন নতুন ৰে'ল সেৱাৰ শুভাৰম্ভ কৰে। এই তিনিখন ৰে'ল হৈছে কামাখ্যা-চাৰ্লাপল্লী অমৃত ভাৰত এক্সপ্ৰেছ, গুৱাহাটী-নিউ জলপাইগুৰি এক্সপ্ৰেছ আৰু নাৰেংগী-আগৰতলা এক্সপ্ৰেছ।
বিধানসভা নিৰ্বাচনৰ পূৰ্বে প্ৰধানমন্ত্ৰীগৰাকীয়ে দুদিনীয়া ভ্ৰমণসূচীৰে অসমলৈ আহিছে। বেয়া বতৰৰ বাবে তেওঁ কোকৰাঝাৰলৈ যাব নোৱাৰাৰ বাবে গুৱাহাটীৰ পৰাই ভিডিঅ' কনফাৰেন্সিঙৰ জৰিয়তে ৪,৫৭০ কোটি টকাৰো অধিক মূল্যৰ বিভিন্ন উন্নয়নমূলক প্ৰকল্পৰ ভূমি পূজন কৰাৰ লগতে আধাৰশিলা স্থাপন কৰে।
কামাখ্যা-চাৰ্লাপল্লী অমৃত ভাৰত এক্সপ্ৰেছে উত্তৰ-পূব আৰু দক্ষিণ ভাৰতৰ মাজত প্ৰত্যক্ষ ৰে'ল যোগাযোগ স্থাপন কৰিব, আনহাতে গুৱাহাটী-নিউ জলপাইগুৰি এক্সপ্ৰেছে অসম আৰু পশ্চিম বংগৰ মাজত যোগাযোগ বৃদ্ধি কৰিব আৰু নাৰেংগী-আগৰতলা এক্সপ্ৰেছে অসম আৰু ত্ৰিপুৰাৰ মাজত যোগাযোগ উন্নত কৰিব, যাৰ ফলত যাত্ৰী, ব্যৱসায়ী আৰু পৰ্যটকসকলৰ বাবে এখন ৰাজ্যৰ পৰা আন এখন ৰাজ্যলৈ যাতায়াত কৰাতো অধিক সুচল হ'ব।
এই প্ৰকল্পসমূহে অসমৰ বড়োলেণ্ড টেৰিটৰিয়েল ৰিজিঅ'নত অৱস্থিত কোকৰাঝাৰ জিলাৰ যান-জঁট হ্ৰাস কৰাত সহায় কৰিব আৰু যোগাযোগ, পৰ্যটন, কৃষিজাত সামগ্ৰীৰ প্ৰৱেশাধিকাৰ, স্বাস্থ্যসেৱা আৰু গ্ৰাম্যাঞ্চলৰ যাতায়াত ব্যৱস্থা উন্নত কৰিব।
প্ৰধানমন্ত্ৰী মোদীয়ে কোকৰাঝাৰ জিলাৰ বাঁহবাৰীত এটা পিৰিয়ডিক অভাৰহলিং (POH) অৰ্থাৎ ৰে'ল মেৰামতি ৱৰ্কশ্বপৰো আধাৰশিলা স্থাপন কৰে। এই ৱৰ্কশ্বপটোৱে ৰে'লৱেৰ মেৰামতিৰ আন্তঃগাঁথনি শক্তিশালী কৰিব, কাৰ্যক্ষমতা বৃদ্ধি কৰিব আৰু এই অঞ্চলত নিযুক্তিৰ সুযোগ সৃষ্টি কৰিব।
ইয়াৰ উপৰি প্ৰধানমন্ত্ৰী মোদীয়ে ভাৰ্ছুৱেলী 'অসম মালা ৩.০'-ৰ ভূমি পূজন কৰে, যিটো ৩,২০০ কোটি টকাতকৈ অধিক ব্যয়সাপেক্ষ এটা মুখ্য পথ আন্তঃগাঁথনিৰ পদক্ষেপ। এই আঁচনিৰ অধীনত সমগ্ৰ অসমত ৯০০ কিলোমিটাৰতকৈও অধিক পথ নিৰ্মাণ কৰা হ'ব, যাতে আন্তঃৰাজ্যিক যোগাযোগ উন্নত হয় আৰু ৰাষ্ট্ৰীয় ঘাইপথসমূহৰ সৈতে গ্ৰাম্য পথসমূহৰ সংযোগ শক্তিশালী হয়।
প্ৰায় ১,১০০ কোটি টকা বিনিয়োগেৰে বড়োলেণ্ড টেৰিটৰিয়েল কাউন্সিল (BTC) এলেকাত চাৰিখন উৰণীয়া সেতু আৰু দুখন দলংসহ ছটা পথৰ আন্তঃগাঁথনি প্ৰকল্পৰো ভূমি পূজন কৰে প্ৰধানমন্ত্ৰীয়ে।
১৪ মাৰ্চত প্ৰধানমন্ত্ৰীয়ে শিলচৰত প্ৰায় ২৩,৫৫০ কোটি টকাৰ বিভিন্ন প্ৰকল্পৰ ভূমি পূজন কৰাৰ লগতে দেশবাসীৰ নামত উছৰ্গা কৰিব।
অহা মাহত অসমত বিধানসভা নিৰ্বাচন অনুষ্ঠিত হোৱাৰ সম্ভাৱনা আছে আৰু শাসকীয় বিজেপি দলে ৰাজ্যখনত সম্ভাৱ্য ক্ৰমাগত তৃতীয়টো কাৰ্যকালৰ বাবে সাজু হৈছে।
