নতুন দিল্লী
প্ৰধানমন্ত্ৰী নৰেন্দ্ৰ মোদীয়ে তেওঁৰ নিৰ্বাচনী ভাষণত দেশৰ বাবে ডাঙৰ পৰিকল্পনা আছে বুলি ক’লে ভয়ৰ প্ৰয়োজন নাই বুলি আশ্বাস দিয়ে। নিজৰ মন্তব্যৰ ব্যাখ্যা দি প্ৰধানমন্ত্ৰী মোদীয়ে কয় যে তেওঁ কাকো ভয় খুৱাব বা দমন কৰিব নিবিচাৰে, বৰঞ্চ ২০৪৭ চনৰ ভিতৰত ভাৰতক উন্নত ৰাষ্ট্ৰ হিচাপে গঢ়ি তোলাৰ পৰিকল্পনাৰ কথাহে কয়।
সংবাদ সংস্থা এএনআইৰ সৈতে হোৱা কথোপকথনত প্ৰধানমন্ত্ৰী মোদীয়ে কয় যে, "যেতিয়া মই কওঁ যে মোৰ ডাঙৰ পৰিকল্পনা আছে, তেতিয়া কোনেও ভয় খাব নালাগে। মই কাকো ভয় খুৱাবলৈ বা দমন কৰিবলৈ সিদ্ধান্ত লোৱা নাই, মই দেশখনৰ সুস্থ বিকাশৰ বাবেহে সিদ্ধান্ত লওঁ। ইয়াৰ উপৰিও, চৰকাৰে সদায় কয় যে আমি সকলো কৰিছো। মই বিশ্বাস নকৰোঁ যে মই সকলো কৰিছো। মই সকলোবোৰ সঠিক দিশত কৰিবলৈ চেষ্টা কৰিছো, তথাপিও মই বহুতো কৰিবলৈ বাকী আছে, কিয়নো মই দেখিছো যে মোৰ দেশৰ বহুতো প্ৰয়োজনীয়তা আছে। মই প্ৰতিটো পৰিয়ালৰ সপোন কেনেকৈ পূৰণ কৰিম? সেইকাৰণে মই কওঁ যে এইটো কেৱল ট্ৰেইলাৰহে।"
প্ৰধানমন্ত্ৰীগৰাকীয়ে চৰকাৰৰ অভিলাষী '২০৪৭ বিক্ষিত ভাৰত' প্ৰকল্পৰ পৰিকল্পনা প্ৰকাশ কৰি কয় যে ইয়াৰ বাবে কাম যোৱা দুবছৰ ধৰি চলি আছে।
"মই যোৱা দুবছৰ ধৰি ২০৪৭ চনৰ কাম কৰি আহিছো। আৰু তাৰ বাবে মই সমগ্ৰ দেশৰ মানুহৰ পৰা মতামত আৰু পৰামৰ্শ বিচাৰিছিলো। আগন্তুক ২৫ বছৰত ভাৰতক কেনেদৰে চাব বিচাৰে সেই সম্পৰ্কে ১৫ লাখৰো অধিক লোকৰ পৰা পৰামৰ্শ লৈছো।" - তেওঁ কয়।
"মই বিশ্ববিদ্যালয়ৰ সৈতে যোগাযোগ কৰিলোঁ, বিভিন্ন এন জি অ'ৰ সৈতে যোগাযোগ কৰিলোঁ আৰু ১৫-২০ লাখ লোকে নিজৰ মতামত দিলে। তাৰ পিছত মই এ আইৰ সহায় লৈ বিষয়ভিত্তিক শ্ৰেণীবিভাজন কৰিলোঁ। ইয়াৰ ওপৰত কাম কৰিবলৈ প্ৰতিটো বিভাগৰ বিষয়াৰ এক নিষ্ঠাবান দল গঠন কৰিলোঁ। পৰৱৰ্তী কাৰ্যকালত ২৫ বছৰৰ বাবে এই কাম কেনেকৈ কৰিব পাৰি? আৰু তাৰ পিছত মই তেওঁলোকৰ সৈতে বহিছিলো আৰু তেওঁলোকে দুইৰ পৰা ২.৫ ঘণ্টাৰ বাবে প্ৰেজেণ্টেচন দিছিল," প্ৰধানমন্ত্ৰীয়ে এএনআইক কয়।
তদুপৰি প্ৰধানমন্ত্ৰী মোদীয়ে লগতে দাবী কৰে যে আগন্তুক লোকসভা নিৰ্বাচনত দেশৰ ভোটাৰসকলে “ব্যৰ্থ কংগ্ৰেছ মডেল” আৰু বিগত ১০ বছৰত নিজৰ প্ৰদৰ্শন কৰা বিজেপি মডেলৰ মাজৰ পৰা এটা বাছি ল’ব।
"২০২৪ চনৰ নিৰ্বাচনলৈ চালে দেশৰ সন্মুখত এটা সুযোগ আছে -- কংগ্ৰেছ চৰকাৰ আৰু বিজেপি চৰকাৰৰ আৰ্হি আছে। তেওঁলোকে ৫-৬ দশক কাম কৰিলে আৰু মই মাত্ৰ ১০ বছৰহে কাম কৰিছো। যিকোনো ক্ষেত্ৰতে তুলনা কৰক। কিছু অভাৱ থাকিলেও আমাৰ প্ৰচেষ্টাত কোনো অভাৱ নাই।" - এই মন্তব্য কৰে প্ৰধানমন্ত্ৰীগৰাকীয়ে।
