নতুন দিল্লী
প্ৰধানমন্ত্ৰী নৰেন্দ্ৰ মোদীয়ে শুকুৰবাৰে পূব নাগালেণ্ডৰ বাবে স্বাক্ষৰিত নতুন ত্ৰিপাক্ষিক চুক্তিখনক "ঐতিহাসিক" বুলি অভিহিত কৰি কয় যে, ই অঞ্চলটোৰ জনসাধাৰণৰ বাবে উন্নয়ন আৰু নতুন সুযোগ প্ৰদান কৰিব।
কেন্দ্ৰ, নাগালেণ্ড চৰকাৰ আৰু পূব নাগালেণ্ড পিপলছ অৰ্গেনাইজেশ্যন (ইএনপিঅ') ৰ মাজত স্বাক্ষৰিত এই চুক্তিৰ জৰিয়তে পূৰ্বৰ ছয়খন জিলাৰ আঠটা স্বীকৃতিপ্ৰাপ্ত নাগা জনগোষ্ঠীৰ প্ৰতিনিধিত্ব কৰা হৈছে। এই চুক্তিৰ জৰিয়তে এই অঞ্চলৰ প্ৰগতি ত্বৰান্বিত কৰা আৰু সামগ্ৰিক বিকাশ নিশ্চিত কৰা হ'ব।
এক্সৰ এক পোষ্টত প্ৰধানমন্ত্ৰী মোদীয়ে লিখিছে, "এয়া সঁচাকৈয়ে এক ঐতিহাসিক চুক্তি, যিয়ে বিশেষকৈ পূব নাগালেণ্ডৰ বিকাশৰ গতিপথ বৃদ্ধি কৰিব। মই নিশ্চিত যে, ইয়াৰ জৰিয়তে জনসাধাৰণৰ বাবে সুযোগ আৰু সমৃদ্ধিৰ নতুন পথ মুকলি হ'ব। ই উত্তৰ-পূৰ্বাঞ্চলত শান্তি, প্ৰগতি আৰু অন্তৰ্ভুক্তিমূলক বিকাশৰ প্ৰতি আমাৰ অংগীকাৰক প্ৰতিফলিত কৰে।"
কেন্দ্ৰীয় গৃহমন্ত্ৰী অমিত শ্বাহ আৰু নাগালেণ্ডৰ মুখ্যমন্ত্ৰী নেফিউ ৰিঅ'ৰ উপস্থিতিত এই চুক্তি স্বাক্ষৰিত হয়। এই চুক্তিৰ জৰিয়তে নাগালেণ্ডৰ ছয়খন জিলা ক্ৰমে তুয়েনছাং, মন, কিফাইৰ, লংলেং, নোকলক আৰু শ্যামাতোৰৰ বাবে এফএনটিএ গঠন কৰাৰ লগতে ৪৬খন জিলাৰ ক্ষমতা এফএনটিএলৈ হস্তান্তৰ কৰাৰ পথ প্ৰশস্ত হ'ব।
এই চুক্তিৰ অধীনত এফএনটিএৰ বাবে অতিৰিক্ত মুখ্য সচিব আৰু প্ৰধান সচিবৰ নেতৃত্বত এখন ক্ষুদ্ৰ সচিবালয় গঠন কৰা হ'ব আৰু পূব নাগালেণ্ড অঞ্চলৰ বাবে জনসংখ্যা আৰু মাটিকালিৰ অনুপাতে উন্নয়ন ব্যয়ৰ ভাগ-বতৰা কৰা হ'ব। অৱশ্যে, এই চুক্তিয়ে ভাৰতীয় সংবিধানৰ ৩৭১ (ক) অনুচ্ছেদৰ কোনো প্ৰকাৰে প্ৰভাৱিত নকৰে।
এই উপলক্ষে অমিত শ্বাহে কয় যে, উত্তৰ-পূৰ্বাঞ্চলৰ বিবাদমুক্ত অঞ্চলৰ বাবে আজিৰ দিনটো এক গুৰুত্বপূৰ্ণ দিন। প্ৰধানমন্ত্ৰী নৰেন্দ্ৰ মোদীয়ে উত্তৰ-পূৰ্বাঞ্চলক বিদ্ৰোহ, হিংসা, বিবাদমুক্ত আৰু বিকাশশীল হিচাপে গঢ়ি তোলাৰ পৰিকল্পনা কৰিছে। আজি আমি সেই সপোন বাস্তৱায়িত কৰাৰ দিশত আৰু এটা পদক্ষেপ গ্ৰহণ কৰিছো।
তেওঁ কয় যে, এঘাৰ বছৰ পূৰ্বে উত্তৰ-পূৰ্বাঞ্চলত কেইবাটাও সশস্ত্ৰ গোট আৰু বিবাদে অঞ্চলটোক বিভাজনৰ দিশলৈ ঠেলিছিল আৰু ইয়াৰ শান্তি বিঘ্নিত কৰিছিল। একে সময়তে, বহু আন্তঃৰাজ্যিক বিবাদে ৰাজ্যসমূহৰ শান্তি বিঘ্নিত কৰিছিল।
কেন্দ্ৰীয় গৃহমন্ত্ৰীগৰাকীয়ে কয় যে, প্ৰধানমন্ত্ৰী মোদীৰ নেতৃত্বাধীন চৰকাৰখন প্ৰতিটো বিবাদৰ সমাধানৰ বাবে প্ৰতিশ্ৰুতিবদ্ধ। তেওঁ কয় যে, ২০১৯ চনৰ পৰা মোদী চৰকাৰে উত্তৰ-পূৰ্বাঞ্চলত ১২খন গুৰুত্বপূৰ্ণ চুক্তি স্বাক্ষৰ কৰিছে। পূৰ্বৰ চৰকাৰসমূহে কেৱল চুক্তিপত্ৰহে স্বাক্ষৰ কৰিছিল, কিন্তু মোদী চৰকাৰে সেই চুক্তিসমূহ আখৰে আখৰে ৰূপায়ণ কৰিছে।
