গুৱাহাটী
টাটা গ্ৰুপৰ আগন্তুক অৰ্ধপৰিবাহী প্ৰকল্পই উন্নত ভাৰতৰ ইঞ্জিনৰ চালক আসনত অসমক স্থান দিব বুলি উল্লেখ কৰি কেন্দ্ৰীয় বিত্তমন্ত্ৰী নিৰ্মলা সীতাৰমণে শুকুৰবাৰে কয় যে মূলধনী সম্পদ সৃষ্টিৰ বাবে বিশেষ কেন্দ্ৰীয় পুঁজিৰ সৰ্বাধিক ব্যৱহাৰৰ ক্ষেত্ৰত ৰাজ্যখনে দেশৰ ভিতৰতে শীৰ্ষ স্থানত আছে।
দুদিনীয়া ভ্ৰমণসূচীৰে পুৱা গুৱাহাটীত উপস্থিত হয় সীতাৰমণ। তেওঁ ৰাজ্যৰ বিভিন্ন স্থানত একাধিক প্ৰকল্প উন্মোচন কৰিবলৈ ভ্ৰমণ কৰিছে।
ইয়াত ব্ৰহ্মপুত্ৰ নদীৰ পাৰৰ প্ৰকল্প উদ্বোধন কৰি তেওঁ কয়, "কেন্দ্ৰই প্ৰতিখন ৰাজ্যকে মূলধনী বিনিয়োগৰ বাবে বিশেষ সাহায্য (SASCI) আঁচনিৰ অধীনত পুঁজি প্ৰদান কৰি চিকিৎসালয়, পথ আৰু অন্যান্য আন্তঃগাঁথনিৰ দৰে মূলধনী সম্পত্তি নিৰ্মাণৰ বাবে ধন দিয়ে। অসমেও পায়।"
ৰাজ্যসমূহৰ মূলধনী ব্যয় বৃদ্ধিৰ বাবে এই ধন ৰাজ্যসমূহক ৫০ বছৰৰ সুতমুক্ত ঋণ হিচাপে দিয়া হয় বুলি সীতাৰমনে কয়।
"অসমে যি ধৰণে সম্পদ সৃষ্টিৰ পৰিকল্পনা কৰিছে আৰু কেন্দ্ৰীয় পুঁজিৰ সৰ্বোচ্চ ব্যৱহাৰ কৰিছে, ই অসমক তালিকাৰ শীৰ্ষত ৰাখিছে।" - তেওঁ কয়।
যদিও সকলো ৰাজ্যই সম্পদ সৃষ্টি কৰি আছে, অসমে কাম কৰাৰ দৰে কোনেও কাম কৰা নাই বুলি কেন্দ্ৰীয় বিত্তমন্ত্ৰীগৰাকীয়ে ভাষণত কয়।
বিয়লি মধ্য অসমৰ মৰিগাঁও জিলাৰ জাগীৰোডত অৱস্থিত টাটা ইলেক্ট্ৰনিকছৰ আউটচ’ৰ্চড ছেমিকণ্ডাক্টৰ এছেম্বলি এণ্ড টেষ্ট (OSAT)ৰ আগন্তুক প্ৰকল্প পৰিদৰ্শন কৰে।
২৭ হাজাৰ কোটি টকাৰ বিনিয়োগেৰে এই প্ৰকল্পই ফ্লিপ চিপ আৰু ইন্টিগ্ৰেটেড চিষ্টেম ইন পেকেজ (ISIP)ৰ দৰে উন্নত পেকেজিং প্ৰযুক্তি ব্যৱহাৰ কৰি প্ৰতিদিনে ৪.৮ কোটি পৰ্যন্ত অৰ্ধপৰিবাহী চিপ উৎপাদন কৰিব বুলি আশা কৰা হৈছে। ইয়াৰ জৰিয়তে প্ৰায় ১৫,০০০ প্ৰত্যক্ষ আৰু ১১,০০০-১৩,০০০ পৰোক্ষ চাকৰিৰ সৃষ্টি হ’ব।
মুখ্যমন্ত্ৰী হিমন্ত বিশ্ব শৰ্মাৰ উপস্থিতিত প্ৰকল্প স্থানত এক মত বিনিময়ৰ সময়ত সীতাৰমণে উদ্যোগী আৰু ছাত্ৰ-ছাত্ৰীৰ এটা দলক কয়, "এই প্ৰকল্পৰ জৰিয়তে অসম সম্ভৱতঃ বিকশিত ভাৰতৰ ইঞ্জিনৰ চালক হ'ব। মই ভাবো অসমৰ এটা সোণালী মুহূৰ্ত আছে।"
নিৰ্মাণৰ অধীনত থকা প্ৰকল্পটোৱে এটা পৰিৱেশ তন্ত্ৰ গঢ়ি তুলিছে, যিয়ে প্ৰযুক্তি আৰু নিয়মৰ জৰিয়তে স্থানীয় উদ্যোগীকৰণক সহায় কৰিছে বুলিও তেওঁ লগতে কয়।
সীতাৰমনে কয়, "অসমৰ যুৱক-যুৱতীসকলে সঁচাকৈয়ে এতিয়াই ওলাই আহি দৰমহা পোৱা চাকৰি নিবিচাৰি নিজাববীয়াকৈ ব্যৱসায় কৰাৰ সামান্য ৰিস্ক লোৱা উচিত। আজি আপোনাৰ হাতত হাত ধৰিবলৈ উপযুক্ত ধৰণৰ মানুহ আছে। ওলাই আহক আৰু বিকশিত ভাৰতৰ সপোনত অৰিহণা যোগাওক।"
ঔদ্যোগিক নীতিত দূৰদৰ্শিতা আৰু গতিশীলতা প্ৰদৰ্শন কৰি অসমে ৰাজ্যলৈ অৰ্ধপৰিবাহী নিৰ্মাণ প্ৰকল্প আনি আগভাগ লৈছে বুলি জোৰ দি কয়।
সীতাৰমণে কয়, "মাত্ৰ ১০ দিন পূৰ্বে প্ৰধানমন্ত্ৰী মোদীয়ে গৱেষণা আৰু উন্নয়নৰ বাবে এক লাখ কোটি টকাৰ পুঁজি আবণ্টন দিছে। এই পুঁজি কেৱল চৰকাৰী প্ৰতিষ্ঠানৰ বাবেই নহয়, সমগ্ৰ দেশৰ ব্যক্তিগত খণ্ডৰ প্ৰতিষ্ঠানসমূহৰ উদ্ভাৱন আৰু গৱেষণাৰ প্ৰসাৰৰ বাবেও সুলভ।"
কেন্দ্ৰীয় বিত্তমন্ত্ৰীৰ কাৰ্যালয়ে কয় যে দেশৰ অন্যতম প্ৰধান উৎপাদন স্থান হিচাপে পৰিগণিত হ’বলগীয়া এই অৰ্ধপৰিবাহী প্ৰকল্পটো স্বাৱলম্বী অৰ্ধপৰিবাহী পৰিৱেশ তন্ত্ৰ প্ৰতিষ্ঠা কৰাৰ দেশৰ বহল লক্ষ্যৰ সৈতে মিল আছে।
ইয়াত লগতে কোৱা হৈছে যে মৰিগাঁৱৰ অৰ্ধপৰিবাহী প্ৰকল্প ভাৰতৰ অৰ্ধপৰিবাহী উৎপাদন ক্ষমতাক শক্তিশালী কৰাৰ লক্ষ্যৰে চৰকাৰী সমৰ্থিত প্ৰকল্পৰ বহল নেটৱৰ্কৰ অংশ।
প্ৰধানমন্ত্ৰী নৰেন্দ্ৰ মোদীৰ নেতৃত্বত এনডিএ চৰকাৰে দেশৰ ভিতৰতে অৰ্ধপৰিবাহী আৰু চিপ নিৰ্মাণৰ বৃদ্ধিৰ প্ৰসাৰ ঘটাই প্ৰযুক্তিগত উন্নতি আৰু অৰ্থনৈতিক স্থিতিস্থাপকতাৰ বাট মুকলি কৰি আহিছে বুলি পোষ্টটোত উল্লেখ কৰা হৈছে।
সীতাৰমনৰ কাৰ্যালয়ে কয় যে, "এইটো অটোমোটিভ, বৈদ্যুতিক বাহন, টেলিকমিউনিকেচন, আৰু কনজিউমাৰ ইলেক্ট্ৰনিকছৰ দৰে অত্যাৱশ্যকীয় খণ্ডসমূহৰ বাবে নিৰ্মাণ কৰা হৈছে। মাননীয় প্ৰধানমন্ত্ৰী শ্ৰী @narendramodi ডাঙৰীয়াই ২০১৪ চনৰ পৰা উত্তৰ-পূবৰ সামগ্ৰিক উন্নয়নৰ ওপৰত গুৰুত্ব আৰোপ কৰি আহিছে, যিটো ২০৪৭ চনৰ ভিতৰত #বিক্ষিতভাৰতৰ লক্ষ্যত উপনীত হোৱাৰ বাবে অতি গুৰুত্বপূৰ্ণ।"
ব্ৰহ্মপুত্ৰ নদীৰ পাৰত টাৰ্মিনেল আৰু জেটিৰে গঠিত ৩০৫ কোটি টকা ব্যয় সাপেক্ষে নিৰ্মাণ কৰা ‘গেটৱে অৱ গুৱাহাটী’ প্ৰকল্পটো উদ্বোধন কৰে কেন্দ্ৰীয় বিত্তমন্ত্ৰীগৰাকীয়ে।
পিছত ৰাজ্যৰ ৰাজধানীত ৩২৭ কোটি টকা ব্যয় সাপেক্ষে সতী ৰাধিকা উদ্যানত স্থাপন কৰা ব্ৰহ্মপুত্ৰ ৰিভাৰফ্ৰন্ট প্ৰকল্পটো ৰাইজৰ বাবে উৎসৰ্গা কৰে।
সীতাৰমনে কয়, "মই শুনিছো যে এই নদীৰ পাৰৰ প্ৰকল্পৰ তলত মাছৰ বজাৰ আছে। মুখ্যমন্ত্ৰী শৰ্মাই মোক কৈছিল যে ই এতিয়াও আছে আৰু তেওঁলোকে এতিয়াও নদীলৈ গৈ মাছ ধৰিব পাৰে। গতিকে, এইটো জীৱিকা আৰু উন্নয়নৰ মাজত এক ভাল মিশ্ৰণ।"
নগৰ উন্নয়ন প্ৰয়োজনীয়, কিন্তু স্থানীয় অঞ্চলৰ পৰা জনসাধাৰণক স্থানচ্যুত কৰি নহয় বুলিও কয় সীতাৰমনে।
"মানুহৰ জীৱন উন্নত কৰাৰ বাবে আমি কাম কৰিব লাগে। মানুহৰ জীৱিকাত অশান্তি নকৰি পৰিৱৰ্তন অনাটো সুশাসনৰ নিদৰ্শন। দুয়োৰে মাজত সুক্ষ্ম ভাৰসাম্য গুৰুত্বপূৰ্ণ।"- কেন্দ্ৰীয় মন্ত্ৰীগৰাকীয়ে কয়।
তেওঁ শনিবাৰে বিশ্বনাথ জিলাৰ গহপুৰলৈ গৈ স্বহিদ কনকলতা বৰুৱা ৰাজ্যিক বিশ্ববিদ্যালয়ৰ আধাৰশিলা স্থাপন কৰিব।
চলিত বৰ্ষৰ জুন মাহত অসম কেবিনেটে ৪০০ কোটি টকা ব্যয় সাপেক্ষে বিশ্ববিদ্যালয়খনৰ স্থাপনত অনুমোদন জনাইছিল।
ইয়াৰ পূৰ্বে দিনটোত গুৱাহাটীৰ লোকপ্ৰিয়া গোপীনাথ বৰদলৈ আন্তঃৰাষ্ট্ৰীয় বিমানবন্দৰত মুখ্যমন্ত্ৰী শৰ্মা আৰু ৰাজ্যৰ বিত্তমন্ত্ৰী অজন্তা নেওগে তেওঁক উষ্ম আদৰণি জনায়।
সীতাৰমনৰ সৈতে জাগীৰোডলৈ যোৱা শৰ্মাই অৰ্ধপৰিবাহী প্ৰকল্পটো অসমলৈ অনাত তেওঁৰ সহায় সহযোগিতাৰ বাবে আন্তৰিক ধন্যবাদ জ্ঞাপন কৰে।
