শ্ৰীনগৰ
যুগ যুগ ধৰি পুৰুষসকলে হৰিছা বনাবলৈ প্ৰয়োজনীয় ৰান্ধনীৰ দক্ষতাক একচেটিয়া কৰি লৈছিল। এই হৰিছা হৈছে কাশ্মীৰত শীতকালীন ৰাতিপুৱাৰ আহাৰৰ এবিধ সুস্বাদু ব্যঞ্জন। যি অতি জনপ্ৰিয় আৰ্মেনিয়ান ব্যঞ্জনৰ পৰা লোৱা এক প্ৰতিলিপি। এই ব্যঞ্জন বিধ তন্দুৰৰ ভিতৰত থোৱা বাচনত লাহে লাহে খৰিৰ তাপ ব্যৱহাৰ কৰি সম্পূৰ্ণ এটা নিশাৰ ভিতৰত প্ৰস্তুত কৰা হয়। এই ব্যঞ্জন প্ৰস্তুত কৰাৰ বাবে উপযুক্ত মছলাৰ জ্ঞান থকাৰ লগতে পেশীৰ শক্তি আৰু নিশাৰ ধৈৰ্য্যৰ খুবেই প্ৰয়োজন।
কিন্তু কাশ্মীৰৰ মহিলাসকলক এই শীতকালত হৰিছা-গোয়াৰ বা বিশেষ হৰিছা ৰান্ধনীৰ কঠোৰ প্ৰতিযোগিতা প্ৰদান কৰা হৈছে। শ্বেখ হিৰা হৈছে এগৰাকী অভিযান্ত্ৰিক স্নাতক আৰু শ্ৰীনগৰৰ হাইদৰপোৰা অঞ্চলৰ এগৰাকী মাতৃ। তেওঁ হৰিছাৰ বাবে পুৰুষ প্ৰধান বজাৰ দখল কৰা এক ধাৰাৰ আৰম্ভ কৰিছিল।
হৰিছা প্ৰস্তুত কৰি থকা এক দৃশ্য
হিৰাই কয়, "পূৰ্বে পুৰণি চহৰখনত খুব ৰাতিপুৱাই মানুহে হৰিছা ক্ৰয় কৰাৰ বাবে হৰিছাৰ দোকানৰ বাহিৰত দীঘলীয়া শাৰীপাতি থিয় হৈ আছিল। সেই দেখি মই মনতে ভাবিছিলো যে কেনেকৈ মাত্ৰ এটা ক্লিকৰ জৰিয়তে সকলোৰে ওচৰত হৰিছা উপলব্ধ কৰিব পাৰি। মই পৰিকল্পনা কৰা মতে কাম আৰম্ভ কৰিলো আৰু সঁচাকৈয়ে হৰিছাৰ বিক্ৰী বৃদ্ধি পাবলৈ ধৰিলে। বৰ্তমান জম্মু-কাশ্মীৰৰ প্ৰতিখন ডাঙৰ জিলাতে মই প্ৰস্তুত কৰা হাৰিছা বিক্ৰী হয়।"
ইণ্টাৰনেট শক্তি ব্যৱহাৰ কৰি গেটোচ আৰু ফাষ্টবেটলৰ দৰে অনলাইন প্লেটফৰ্মৰ জৰিয়তে হিৰাই জে এণ্ড কেৰ বাহিৰত হৰিছা প্ৰেৰণ কৰিবলৈ সক্ষম হৈছে। ফল ৱিণ্টাৰ হৰিছা ব্ৰেণ্ডৰ গৰাকী হিৰাই কয়, "বৰ্তমান হৰিছা জে এণ্ড কেৰ বাহিৰত জনপ্ৰিয় হৈ পৰিছে। মই দেশৰ বিভিন্ন প্ৰান্তৰ পৰা হৰিছাৰ বাবে অৰ্ডাৰ পাওঁ। কাশ্মীৰত হৰিছা হ'ল এক আৱেগ। বহু পুৰণি অনাবাসী ভাৰতীয়ই শ্ৰীনগৰত তেওঁলোকৰ পিতৃ-মাতৃৰ বাবে হৰিছা অৰ্ডাৰ দিয়ে, যাতে তেওঁলোকে হৰিছা ক্ৰয় কৰিবলৈ ৰাতিপুৱা ঠাণ্ডাত বাহিৰলৈ ওলাই আহিব নালাগে। গ্ৰাহকৰ সমীক্ষাই যথেষ্ট সহায় কৰিছে।"
কাশ্মীৰত নৱেম্বৰৰ পৰা ফেব্ৰুৱাৰী মাহৰ শীৰ্ষ শীতৰ মাহতহে হৰিছা উপলব্ধ হোৱা এবিধ ৰাতিপুৱাৰ আহাৰৰ ব্যঞ্জন। চহৰখনত হৰিচা ক্ৰয় কৰিবলৈ মানুহে ৰাতিপুৱাৰ ভাগত দীঘলীয়া শাৰী পাতি আহিছে। কিয়নো বৰ্ধিত চাহিদাৰ বাবে দোকানবোৰত হৰিছা দ্ৰুতগতিত শেষ হৈ যায়। হৰিছা হৈছে এবিধ ভৰপূৰ প্ৰ'টিনযুক্ত আহাৰ। এই আহাৰে মানুহৰ শৰীৰ গৰম কৰি ৰাখে আৰু উপত্যকাৰ শীতকালৰ নিম্ন-শূন্য তাপমাত্ৰাৰ সৈতে মোকাবিলা কৰাত সহায় কৰে। কেইবছৰমান আগলৈকে চহৰখনৰ কম সংখ্যক বিপনীত কেৱল পুৰুষেহে হৰিছা ৰন্ধাৰ ওপৰত আধিপত্য বিস্তাৰ কৰিছিল। কিয়নো ইয়াক প্ৰস্তুত কৰা বাবে সম্পূৰ্ণ এটা নিশাৰ প্ৰয়োজন হয় আৰু এপাট ডাঙৰ কাঠৰ হেতাৰে নিৰন্তৰ লৰাই থাকিব লাগে।
ভৰপূৰ মাত্ৰাত প্ৰ'টিন থকা সুস্বাদু ব্যঞ্জন হৰিছা
প্ৰযুক্তিৰে সজ্জিত মহিলাসকল এতিয়া পুৰুষৰ বাবে সমান প্ৰতিযোগী। পাম্পোৰ অঞ্চলৰ বিদ্যালয়ৰ এগৰাকী প্ৰাক্তন অধ্যক্ষ ৫৮ বছৰীয়া শ্বাহিদা ফাজিলিয়ে কয় যে ডুবাইত থকা তেওঁৰ দুই পুত্ৰৰ বাবে ঘৰত প্ৰস্তুত কৰা হৰিছা প্ৰতি বছৰে প্ৰেৰণ কৰা হয়। তেওঁলোকৰ বন্ধু আৰু সহকৰ্মীসকলৰ মাজত তেওঁৰ হৰিছা খুবেই জনপ্ৰিয় হৈ পৰিছে।
ফাজিলিয়ে কয়, "আগতে কেৱল আত্মীয় তথা বন্ধুবৰ্গইহে মোৰ ওচৰলৈ হৰিছা বিচাৰি আহিছিল। এই বছৰ মই দিল্লীৰ পৰা ১৫ কিলোগ্ৰাম হৰিছাৰ অৰ্ডাৰ লাভ কৰিছো। বৰ্তমান বাহিৰৰ মানুহেও হৰিছা খাই ভাল পাই। মই নিশ্চিত যে মোৰ এগৰাকী পেছাদাৰী হৰিছা নিৰ্মাতাৰ সকলো গুণ আছে।"
ফাজিলিয়ে কাশ্মীৰত হৰিছা বজাৰ দ্ৰুতগতিত সম্প্ৰসাৰিত হোৱা দেখিছে। তেওঁ কয়, "এইটো আগতে উচ্চ শ্ৰেণীৰ বাবে নিৰ্ধাৰিত এক ব্যঞ্জন আছিল। অৱশ্যে এতিয়া কাশ্মীৰত হৰিছাই সমৃদ্ধি আৰু চাহিদা পূৰ্বৰ তুলনাত যথেষ্ট বৃদ্ধি পাইছে। মানুহে স্বাস্থ্যকৰ গুণসম্পন্ন হৰিছা বিচাৰে, কিয়নো এই ব্যঞ্জন বিধ পৰিয়ালৰ সকলোৱে খায়। আমি সদায় গ্ৰাহকক তেওঁলোকে বিচৰা ধৰণে হৰিছা যোগান ধৰাৰ চেষ্টা কৰি আহিছো আৰু আগলৈও চেষ্টা কৰি যাম। মানুহে এতিয়া তেওঁলোকৰ মাংসৰ গুণগত মানদণ্ডৰ বাবে হৰিছা আউটলেটতকৈ ঘৰত বনোৱা হৰিছা অধিক পছন্দ কৰে।"
কাশ্মীৰত এখন দোকানত গ্ৰাহকৰ বাবে প্লেটত সজাই দিয়া হৰিছা
হৰিছা প্ৰস্তুত কৰিবলৈ ৰান্ধনীয়ে কমেও চাৰিৰ পৰা ছয় ঘণ্টা সময় দিব লাগে। হৰিছা প্ৰস্তুত কৰিবলৈ কষ্টকৰ হোৱাৰ বাবে ফাজিলিয়ে বিশ্বাস কৰে যে বেছিভাগ কৰ্মৰত মহিলাই ঘৰত বনোৱা ব্যঞ্জনটো নিজে ৰান্ধিবলৈ পছন্দ কৰে।
কাশ্মীৰ টেম্প্টেশ্ব'ন ব্ৰেণ্ডৰ গৰাকী ফাজিলিৰ লক্ষ্য হৈছে তেওঁৰ গ্ৰাহকৰ পৰিসৰ বৃদ্ধি কৰা। তেওঁ কয়, "এতিয়ালৈ, মই হোৱাটছএপ গ্ৰুপত জনপ্ৰিয় আছিলোঁ। মই ফেচবুক আৰু ইনষ্টাগ্ৰামৰ দৰে সামাজিক মাধ্যমলৈ যোৱাৰ পৰিকল্পনা কৰিছো। মই ইতিমধ্যে এই শীতকালত ৪০ কিলোগ্ৰাম হৰিছা প্ৰস্তুত কৰিছো।"
হৰিছা দ্ৰুতগতিত কাশ্মীৰৰ আপমাৰ্কেট কলনীত এক কুটিৰ উদ্যোগলৈ পৰিৱৰ্তিত হৈছে। যিহেতু ইয়াৰ বাবে মহিলাসকলক ওলাই অহাৰ প্ৰয়োজন নাই। মহিলাসকলে অনলাইন ষ্টাৰ্টআপ হিচাপে ৰন্ধন ব্যঞ্জন বিশেষকৈ হৰিছা প্ৰস্তুত কৰাটো এক আৰামদায়ক কাম বুলি গণ্য কৰে।
গ্ৰাহক যোগান ধৰাৰ বাবে কণ্টেইনাৰত থকা হৰিছা
শ্ৰীনগৰৰ বেমিনা অঞ্চলৰ এগৰাকী গৃহিনী ৰেহানা খানে কেৱল নিজৰ এলেকাত আৰু আত্মীয়সকলৰ বাবে হৰিছা প্ৰস্তুত কৰি আহিছে। তেওঁ কয়, "মোৰ ঘৰত প্ৰস্তুত হৰিছা মোৰ আত্মীয়সকলৰ মাজত জনপ্ৰিয় আছিল। পিছলৈ ওচৰৰ মানুহৰ মাজতো জনপ্ৰিয় হৈ পৰিল। বৰ্তমান মই কেৱল চুবুৰীয়াৰ পৰাহে হৰিছাৰ অৰ্ডাৰ লওঁ। মই ইতিমধ্যে এই শীতকালত ১৫ টা হৰিছাৰ অৰ্ডাৰ প্ৰস্তুত কৰিছো।"
আগন্তুক দিনত খানৰ বাবে হৰিছাৰ বিক্ৰী আৰু বৃদ্ধি হোৱাৰ সম্ভাৱনা আছে। কাশ্মীৰত দিনৰ তাপমাত্ৰা দ্ৰুতগতিত হ্ৰাস হোৱাৰ লগতে নিশাৰ তাপমাত্ৰা ইতিমধ্যে শূন্য ডিগ্ৰী চেলচিয়াছৰ তলত থাকে। সেয়ে উপত্যকাৰ হিমশীতল বতৰৰ সৈতে মোকাবিলা কৰিবলৈ হৰিছা হৈছে এক সকলোৰে পছন্দৰ ব্যঞ্জন হৈ পৰিছে।
