দেৱকিশোৰ চক্ৰৱৰ্তী
বংগৰ বিভিন্ন প্ৰান্তত হিন্দু আৰু মুছলমান সম্প্ৰদায়ে একেলগে কালী পূজা পালন কৰি আহিছে, যিটো কেৱল ধৰ্মীয় উৎসৱ নহয়, সমন্বয় আৰু সামাজিক ঐক্যৰ উজ্জ্বল নিদৰ্শন হিচাপেও গণ্য কৰা হয়। মুৰ্ছিদাবাদৰ লালগোলা অঞ্চল এনে একতাৰ অন্যতম কেন্দ্ৰবিন্দু। মুছলমান আৰু হিন্দু চুবুৰীয়াই একেলগে ইফতাৰ আয়োজন কৰা স্থানতে তেওঁলোকে কালী পূজাত অংশ লয়।
এই সন্দৰ্ভত স্থানীয় লোকে কয়, "আমি কাকো বিভাজিত হ'বলৈ নিদিয়াৰ প্ৰতিশ্ৰুতিৰে প্ৰতি বছৰে পূজা পালন কৰে। অৱশ্যে কেৱল লালগোলাতে নহয়, শিলবাৰীহাটৰ তৰ্ছা ইউনাইটেড ক্লাব, মালদা, কেন্দুৱা, বীৰভূমৰ জংগলমহলৰ দৰে ঠাইতো হিন্দু আৰু মুছলমান সম্প্ৰদায়ে একেলগে পূজাৰ আয়োজন কৰিছে।
মালদাত ১১ জন হিন্দু আৰু ১৩ জন মুছলমান সদস্যই যৌথভাৱে পূজাৰ সকলো ব্যৱস্থা পৰিচালনা কৰে। কেন্দুৱা গাঁৱৰ এগৰাকী মুছলমান মহিলাই বিগত তিনিটা দশক ধৰি কালী পূজাৰ আয়োজন কৰি আহিছে, যিটো স্থানীয় ৰাইজৰ মাজত ধৰ্মীয় সম্প্ৰীতিৰ নিদৰ্শন হিচাপে পৰিচিত।
প্ৰতিনিধিত্বমূলক ছবি
এই যৌথ পূজাৰ আয়োজন কৰাটো কেৱল সামাজিক বন্ধন শক্তিশালী কৰাই নহয়, যুৱক-যুৱতীসকলক ঐক্য আৰু মমতাৰ বিষয়েও শিকোৱা হয়। পূজাৰ সময়ত পৰম্পৰৰ প্ৰতি সন্মান বজাই ৰাখি মছজিদৰ আজান আৰু মন্দিৰৰ মাইক্ৰ’ফোন ব্যৱহাৰ কৰা, পেণ্ডেল বনোৱা, মূৰ্তি অনা আৰু প্ৰসাদ বিতৰণত সক্ৰিয়ভাৱে অংশগ্ৰহণ কৰা — এই সকলোবোৰ কাৰ্য্যই স্থানীয় জনগোষ্ঠীসমূহত মাজত সম্পৰ্ক গভীৰ কৰি তুলিছে।
বিশেষজ্ঞসকলৰ মতে এনে যৌথ পূজা কেৱল ধৰ্মীয় উৎসৱ নহয়, সাম্প্ৰদায়িক সম্প্ৰীতিৰ এক অনন্য নিদৰ্শন, যাক দেশৰ অন্যান্য প্ৰান্ততো অনুকৰণ কৰিব পৰা যায়। ইয়াৰ দ্বাৰা প্ৰমাণিত হয় যে মতানৈক্যৰ মাজতো মানৱীয় আৰু সামাজিক বান্ধোনক অগ্ৰাধিকাৰ দিলে শান্তি আৰু ঐক্য বজাই ৰখা সম্ভৱ।
স্থানীয় লোকে কয়, ‘আমি সকলোৱে একেলগে পূজাৰ আনন্দৰ ভাগ লওঁ। ইয়াত হিন্দু-মুছলমানৰ মাজত কোনো বিভাজন নাই। এই সংহতিয়ে আমাৰ সমাজখনক শক্তিশালী কৰি তুলিছে।”
বংগৰ এই কালী পূজাই দেশৰ প্ৰতিজন নাগৰিকলৈ এক গুৰুত্বপূৰ্ণ বাৰ্তা প্ৰেৰণ কৰে যে ধৰ্ম যিমানেই বৈচিত্ৰ্যপূৰ্ণ নহওক কিয়; ঐক্য, সম্প্ৰীতি আৰু প্ৰেমৰ জৰিয়তে সমাজখনক সুন্দৰ আৰু সবল কৰি তোলা সম্ভৱ।
