নতুন দিল্লী
ৱেষ্ট ইণ্ডিজৰ অলৰাউণ্ডাৰ আন্দ্ৰে ৰাছেলে আন্তঃৰাষ্ট্ৰীয় ক্ৰিকেটৰ পৰা অৱসৰ লোৱাৰ কথা ঘোষণা কৰিছে। অষ্ট্ৰেলিয়া আৰু ৱেষ্ট ইণ্ডিজৰ মাজত ঘৰুৱা পাঁচখন খেলৰ টি-২০ শৃংখলাৰ প্ৰথম দুখন মেচ হ’ব দলটোৰ হৈ তেওঁৰ শেষ মেচ। ৩৭ বছৰীয়া ৰাছেলক পাঁচখন মেচৰ শৃংখলাৰ বাবে দলত অন্তৰ্ভুক্ত কৰা হৈছে। এই শৃংখলাৰ প্ৰথম দুখন মেচ জামাইকাৰ ছাবিনা পাৰ্কত অনুষ্ঠিত হ’ব, যি এই অল-ৰাউণ্ডাৰগৰাকীৰ ঘৰুৱা খেলপথাৰ। ঘৰুৱা খেলপথাৰৰ পৰাই তেওঁ আন্তঃৰাষ্ট্ৰীয় ক্ৰিকেটক বিদায় জনাব। ছ’চিয়েল মিডিয়া পোষ্টৰ জৰিয়তে উইণ্ডিজ ক্ৰিকেটে ৰাছেলৰ অৱসৰৰ খবৰৰ বিষয়ে অৱগত কৰে।
আন্দ্ৰে ৰাছেলে এক বিবৃতিত কয়, ‘ইয়াৰ অৰ্থ কি আছিল শব্দৰে বৰ্ণনা কৰিব নোৱাৰি। ৱেষ্ট ইণ্ডিজক প্ৰতিনিধিত্ব কৰাটো মোৰ জীৱনৰ অন্যতম গৌৰৱময় কৃতিত্ব। সৰুতে এই পৰ্যায়ত উপনীত হ’ম বুলি আশা কৰা নাছিলো যদিও খেলিবলৈ আৰম্ভ কৰাৰ লগে লগে আৰু খেলখনৰ প্ৰেমত পৰাৰ লগে লগে আপুনি উপলব্ধি কৰে যে আপুনি কি লাভ কৰিব পাৰে। ই মোক ভাল হ’বলৈ অনুপ্ৰাণিত কৰিলে, কাৰণ মই মেৰুণ ৰঙত (সীমিত অভাৰৰ ক্ৰিকেটত ৱেষ্ট ইণ্ডিজৰ জাৰ্চিৰ ৰং) মোৰ চিন এৰি আনৰ বাবে প্ৰেৰণা হ’ব বিচাৰিছিলো।‘
টি-২০ ইণ্টাৰনেশ্যনেলত তেওঁ তিনিটা অৰ্ধশতকীয় ইনিংছ খেলিছে আৰু ৭১ ৰান তেওঁৰ সৰ্বোচ্চ স্ক’ৰ। ইয়াৰ উপৰিও তেওঁ ৩০.৫৯ গড়ে ৬১টা উইকেট আৰু ৩/১৯ৰ সৰ্বোত্তম প্ৰদৰ্শন আগবঢ়াইছে। ২০২৬ চনৰ ফেব্ৰুৱাৰী মাহত ভাৰত আৰু শ্ৰীলংকাই আয়োজন কৰিবলগীয়া পৰৱৰ্তী আই চি চি টি-২০ বিশ্বকাপৰ মাত্ৰ ৭ মাহৰ পূৰ্বে তেওঁৰ অৱসৰ গ্ৰহণ কৰিছে। শেহতীয়াকৈ ৱেষ্ট ইণ্ডিজৰ বিস্ফোৰক বেটছমেন নিকোলাছ পুৰানে ২৯ বছৰ বয়সত আন্তঃৰাষ্ট্ৰীয় ক্ৰিকেটৰ পৰা বিদায় লৈছিল।
আন্দ্ৰে ৰাছেলে নিজৰ কেৰিয়াৰত ৱেষ্ট ইণ্ডিজৰ হৈ মাত্ৰ এখন টেষ্ট খেলাৰ বিপৰীতে ৫৬খন এদিনীয়া খেল খেলিছে, য’ত তেওঁ গড়ে ২৭.২১ ৰানত ১,০৩৪ ৰান, ১৩০ৰ ওপৰৰ ষ্ট্ৰাইক ৰেট, চাৰিটা অৰ্ধশতক আৰু সৰ্বোত্তম স্ক’ৰ ৯২* কৰিছে। এদিনীয়াত তেওঁ গড়ে ৩১.৮৪ ৰান কৰি ৭০টা উইকেট দখল কৰিছে, য’ত তেওঁৰ শ্ৰেষ্ঠ বলিং প্ৰদৰ্শন হৈছে ৪/৩৫। ২০১২ আৰু ২০১৬ চনত আই চি চি টি-২০ বিশ্বকাপত জয়লাভ কৰা ৱেষ্ট ইণ্ডিজ দলৰ অংশ আছিল ৩৭ বছৰীয়া ৰাছেল।
ৰাছেলে ইণ্ডিয়ান প্ৰিমিয়াৰ লীগকে ধৰি বিশ্বৰ বহু টি-২০ লীগত খেলিছে। বিভিন্ন টি-২০ লীগৰ ৫৬১খন মেচত গড়ে ২৬.৩৯ আৰু ষ্ট্ৰাইক ৰেট ১৬৮ৰ ওপৰত ৯,৩১৬ ৰান সংগ্ৰহ কৰিছে তেওঁ । এই সময়ছোৱাত তেওঁৰ নামত দুটা শতক আৰু ৩৩টা অৰ্ধশতক আছে, আৰু তেওঁৰ সৰ্বোত্তম স্ক’ৰ হৈছে ১২১*। বলাৰ হিচাপে তেওঁ ২৫.৮৫ গড়ে ৪৮৫টা উইকেট আৰু ৫/১৫ ৰানত সৰ্বোত্তম প্ৰদৰ্শন আগবঢ়াইছে।
