গুৱাহাটী
অসমৰ বান পৰিস্থিতিৰ সোমবাৰে কিছু উন্নতি ঘটিছে যদিও পুনৰ এগৰাকী লোকৰ মৃত্যু হোৱাত চলিত বছৰৰ বানত মৃতকৰ সংখ্যা ১০৫ লৈ বৃদ্ধি পাইছে। ইফালে, ৰাজ্যখনৰ চাৰিখন জিলাত এতিয়াও প্ৰায় ৩২ হাজাৰ লোক বানৰ কবলত আছে বুলি বিষয়াসকলে জনায়।
অসম ৰাজ্যিক দুৰ্যোগ ব্যৱস্থাপনা প্ৰাধিকৰণে (ASDMA) প্ৰকাশ কৰা তথ্য অনুসৰি, শিৱসাগৰ জিলাত বানপানীত ডুবি এগৰাকী লোকৰ মৃত্যু হয়। ইয়াৰ ফলত চলিত বছৰৰ বানত ৰাজ্যখনত মৃত্যু হোৱা লোকৰ সংখ্যা ১০৫ লৈ বৃদ্ধি পায়।
ASDMA-ই প্ৰকাশ কৰা বুলেটিন অনুসৰি, গোলাঘাট, যোৰহাট, নগাঁও আৰু শিৱসাগৰ জিলাত মুঠ ৩১,৯০০ৰো অধিক লোক বানত ক্ষতিগ্ৰস্ত হৈ আছে।
ইয়াৰ ভিতৰত নগাঁও জিলাই সৰ্বাধিক ক্ষতিগ্ৰস্ত হৈ আছে। জিলাখনত প্ৰায় ২০,০০০ লোক বানৰ ফলত ক্ষতিগ্ৰস্ত হৈছে। ইয়াৰ পিছতে আছে যোৰহাট, য’ত ৫,০০০ৰো অধিক লোক ক্ষতিগ্ৰস্ত হৈ আছে, আৰু শিৱসাগৰ,য’ত ৪,৫০০ৰো অধিক লোক বানৰ কবলত পৰি আছে।
দেওবাৰৰ তুলনাত বান পৰিস্থিতিৰ উন্নতি ঘটিছে। দেওবাৰে ৰাজ্যখনৰ পাঁচখন জিলাত প্ৰায় ৫২,০০০ লোক বানৰ ফলত ক্ষতিগ্ৰস্ত হৈ আছিল।
ASDMA-ই জনোৱা মতে, প্ৰশাসনে চাৰিখন জিলাত ১৫টা সাহায্য শিবিৰ আৰু সাহায্য বিতৰণ কেন্দ্ৰ চলাই আছে। এই শিবিৰ আৰু কেন্দ্ৰসমূহত মুঠ ২,৭৮২গৰাকী ক্ষতিগ্ৰস্ত লোকক সাহায্য প্ৰদান কৰা হৈছে।
বুলেটিনত উল্লেখ কৰা অনুসৰি, বৰ্তমান ৰাজ্যখনৰ ১৪৭খন গাঁও বানৰ পানীৰ তলত আছে। আনহাতে, অসমজুৰি ৩,১৯৮.৭৭ হেক্টৰ কৃষিভূমিৰ শস্য বানৰ ফলত ক্ষতিগ্ৰস্ত হৈছে।
বানপানীৰ ফলত ৰাজ্যখনৰ বিভিন্ন জিলাত মথাউৰি, পথ, দলং আৰু অন্যান্য আন্তঃগাঁথনি ক্ষতিগ্ৰস্ত হোৱা বুলি ASDMA-ই জানিবলৈ দিয়ে।
ইফালে, ব্যাপক বানপানীৰ ফলত সমগ্ৰ অসমত ১৬,৩২৩টা পোহনীয়া জন্তু আৰু হাঁহ-কুকুৰা ক্ষতিগ্ৰস্ত হৈছে বুলিও বুলেটিনটোত উল্লেখ কৰা হৈছে।
_(1).webp "ত্ৰিবেণী-সপ্তগ্ৰামৰ খানকাহত চুফীসকলৰ কবৰ")
