বৰ্ষাপাৰাত ভাৰত-ৱেষ্ট ইণ্ডিজৰ হাই-ভল্টেজ মেচঃ মেচৰ পূৰ্বে ৰবি শাস্ত্ৰীয়ে ‘জয় আই অসম’, ‘জয় জুবিন’ ধ্বনিৰে মুহিলে দৰ্শকক
নিকুঞ্জ নাথ / গুৱাহাটী
গুৱাহাটীৰ বৰ্ষাপাৰা ক্ৰিকেট ষ্টেডিয়ামত অনুষ্ঠিত ভাৰত আৰু ৱেষ্ট ইণ্ডিজৰ মাজৰ এদিনীয়া শৃংখলাৰ দ্বিতীয়খন মেচক লৈ ৰাজ্যৰ ক্ৰীড়াপ্ৰেমীসকলৰ মাজত এক অভূতপূৰ্ব উছাহ পৰিলক্ষিত হৈছে। পিছে, বেট আৰু বলৰ এই ৰোমাঞ্চকৰ যুঁজখন আৰম্ভ হোৱাৰ পূৰ্বেই সমগ্ৰ অসমবাসীৰ দৃষ্টি আকৰ্ষণ কৰাৰ লগতে হৃদয় জয় কৰিবলৈ সক্ষম হৈছে প্ৰাক্তন ভাৰতীয় ক্ৰিকেটাৰ তথা তাৰকা ধাৰাভাষ্যকাৰ ৰবি শাস্ত্ৰীয়ে।
খেল আৰম্ভ হোৱাৰ পূৰ্বে এক বিশেষ মুহূৰ্তত অসমৰ আৱেগ আৰু সংস্কৃতিৰ সৈতে একাত্ম হৈ ৰবি শাস্ত্ৰীয়ে সগৰ্বে উচ্চাৰণ কৰে ‘জয় আই অসম’, ‘জয় জুবিন’ ধ্বনি। অসমৰ যুৱপ্ৰজন্মৰ হাৰ্টথ্ৰৱ তথা প্ৰাণৰ শিল্পী জুবিন গাৰ্গক সুঁৱৰি তেওঁ ‘জয় জুবিন’ বুলি দিয়া ধ্বনিয়ে মুহূৰ্তৰ ভিতৰতে ষ্টেডিয়ামৰ পৰিৱেশ সলনি কৰি পেলায়। মেচখনৰ আনুষ্ঠানিক টছ প্ৰক্ৰিয়াৰ ঠিক পূৰ্বে ধাৰাভাষ্যৰ মাইক্ৰ'ফোন হাতত লৈয়েই শাস্ত্ৰীয়ে নিজৰ পৰিচিত আৰু গধুৰ কণ্ঠৰে ক'বলৈ আৰম্ভ কৰে— "O Guwahati! Joi Aai Axom! Joi Zubeen! We are in the Northeast, Assam is the state, and Guwahati is the venue for match two."
ৰাষ্ট্ৰীয় পৰ্যায়ৰ এগৰাকী তাৰকাৰ মুখত এনেদৰে অসমৰ স্বাভিমানী শ্ল’গান আৰু আৱেগমিশ্ৰিত 'জয় জুবিন’ ধ্বনি শুনি ষ্টেডিয়ামত উপস্থিত থকা দৰ্শকৰ লগতে সমগ্ৰ অসমৰ ক্ৰীড়াপ্ৰেমীসকল আপ্লুত হৈ পৰে। ছ’চিয়েল মিডিয়াতো মুহূৰ্তৰ ভিতৰতে এই ভিডিঅ' বিয়পি পৰে আৰু অনুৰাগীসকলে ৰবি শাস্ত্ৰীৰ এই বিশেষ পদক্ষেপক ব্যাপকভাৱে আদৰণি জনোৱা পৰিলক্ষিত হয়। ভাৰত আৰু ৱেষ্ট ইণ্ডিজৰ মাজৰ এই হাই-ভল্টেজ মেচখন উপভোগ কৰিবলৈ ৰাজ্যৰ ভিন্ন প্ৰান্তৰ পৰা অহা হাজাৰ হাজাৰ দৰ্শকৰ ভিৰৰ মাজত শাস্ত্ৰীৰ এই অসমপ্ৰেমী মন্তব্যই ক্ৰিকেটৰ উন্মাদনাক এক সুকীয়া আৰু অনন্য মাত্ৰা প্ৰদান কৰে।
উল্লেখ্য যে, শৃংখলাটোৰ দ্বিতীয়খন এদিনীয়াত আজি গুৱাহাটীৰ বৰ্ষাপাৰা ষ্টেডিয়ামত ভাৰত আৰু ৱেষ্ট ইণ্ডিজ মুখামুখি হৈছে। টছত জয়লাভ কৰি শুভমান গিলে প্ৰথমে ৱেষ্ট ইণ্ডিজৰ বিৰুদ্ধে বলিং কৰাৰ সিদ্ধান্ত গ্ৰহণ কৰে। বাতৰি লিখা পৰলৈকে ৱেষ্ট ইণ্ডিজ দলে বেট ধৰি ৪০ অভাৰত ২ টা উইকেটৰ বিনিময়ত ৩৩১ ৰানৰ এক দ্ৰুত স্ক'ৰ সংগ্ৰহ কৰিছে। মন কৰিবলগীয়া যে, ইয়াৰ পূৰ্বে অনুষ্ঠিত প্ৰথমখন এদিনীয়াত ভাৰতীয় দলে এক চমৎকাৰ প্ৰদৰ্শন দাঙি ধৰিছিল। সেই মেচখনত ভাৰতে ৮ উইকেটৰ বৃহৎ ব্যৱধানত জয়লাভ কৰি শৃংখলাটোত ১-০ ব্যৱধানত অগ্ৰগতি লাভ কৰি আছে।
আজিৰ এই গুৰুত্বপূৰ্ণ মেচখনত ভাৰতীয় দলৰ হৈ পেচাৰ আকিব নবীক অভিষেক কেপ (Debut Cap) প্ৰদান কৰা হয়। তেওঁ নীতিশ ৰেড্ডীৰ স্থানত খেলপথাৰত নমা মূল একাদশত (Playing XI) স্থান লাভ কৰিছে। আনহাতে, আলহী দল ৱেষ্ট ইণ্ডিজে নিজৰ দলত মুঠ চাৰিটা পৰিৱৰ্তন কৰিছে। প্ৰথমখন মেচত শতক অৰ্জন কৰি দলক সকাহ দিয়া জাষ্টিন গ্ৰীভছক ৱেষ্ট ইণ্ডিজে আঘাতৰ বাবে আজিৰ মেচত হেৰুৱাবলগীয়া হৈছে। ৱেষ্ট ইণ্ডিজৰ হৈ গ্ৰীভছ, মেথিউ ফৰ্ড, গুডাকেশ মোটি আৰু জুৱেল এণ্ড্ৰিউৰ স্থানত আজি শ্বেৰফেন ৰাডাৰফৰ্ড, কীমো পল, ভিটেল ল'ৱেচ আৰু শ্বামাৰ জোচেফে মূল একাদশত স্থান লাভ কৰিছে।
ভাৰত বনাম ৱেষ্ট ইণ্ডিজৰ দ্বিতীয় এদিনীয়াৰ মূল একাদশ (Playing XI):
ৱেষ্ট ইণ্ডিজ: জন কেম্পবেল, কেচি কাৰ্টি, শাই হোপ (উইকেটকীপাৰ/অধিনায়ক), আমিৰ জাংগু, শ্বেৰফেন ৰাডাৰফৰ্ড, ৰষ্টন চেজ, কীমো পল, আলজাৰী জোচেফ, শ্বামাৰ জোচেফ, জেইডেন ছীলছ, ভিটেল ল'ৱেচ।
ভাৰত: ৰোহিত শৰ্মা, শুভমান গিল (অধিনায়ক), বিৰাট কোহলী, ঋতুৰাজ গাইকোৱাড়, কে এল ৰাহুল (উইকেটকীপাৰ), নমন ধীৰ, ৰবীন্দ্ৰ জাডেজা, আকিব নবী, গুৰনূৰ ব্ৰাৰ, কুলদীপ যাদৱ, প্ৰসিদ্ধ কৃষ্ণ।
ক্ৰীড়াই যে কেৱল খেলপথাৰৰ সীমাৰেখাতে আবদ্ধ নাথাকি বিভিন্ন প্ৰান্তৰ ভাষা, কলা-সংস্কৃতি আৰু মানুহৰ আৱেগক একত্ৰিত কৰিব পাৰে, ৰবি শাস্ত্ৰীৰ এই আন্তৰিকতাপূৰ্ণ মন্তব্যই তাকেই পুনৰবাৰ প্ৰমাণ কৰিলে। বৰ্ষাপাৰাৰ মেচখনৰ চূড়ান্ত ফলাফল যিয়েই নহওক কিয়, খেল আৰম্ভ হোৱাৰ পূৰ্বেই শাস্ত্ৰীৰ এই ব্যতিক্ৰমী অংগীভংগীয়ে প্ৰতিগৰাকী অসমীয়াৰ মনত ইতিমধ্যে এক সুকীয়া আৰু স্থায়ী স্থান দখল কৰিবলৈ সক্ষম হৈছে। এতিয়া ক্ৰীড়াপ্ৰেমী দৰ্শকৰ সম্পূৰ্ণ দৃষ্টি নিবদ্ধ হৈ আছে খেলপথাৰত চলি থকা দুয়োটা দলৰ এই আকৰ্ষণীয় আৰু উত্তেজনাময় ক্ৰিকেট যুঁজখনৰ ওপৰত।
