পাটনা
বিহাৰৰ বৈশালী জিলাত গংগা নদীত যাত্ৰীবাহী নাও এখন ডুবি যোৱাৰ ফলত সংঘটিত হৈছে এক শোকাৱহ দুৰ্ঘটনা। এই দুৰ্ঘটনাত কমেও ১৪ জন লোকৰ মৃত্যু হৈছে। নিহতসকলৰ ভিতৰত মহিলা আৰু শিশুও থকা বুলি আশংকা কৰা হৈছে। জিলাখনৰ ৰাঘোপুৰ অঞ্চলৰ ৰামপুৰ শ্যামচান্দ গাঁৱৰ সমীপত সংঘটিত হয় এই কৰুণ ঘটনা। দুৰ্ঘটনাৰ পিছতে উদ্ধাৰকাৰী দলে নদীত উদ্ধাৰ অভিযান আৰম্ভ কৰে।
ৰাঘোপুৰ আৰক্ষী থানাৰ অন্তৰ্গত অঞ্চলত সংঘটিত এই দুৰ্ঘটনাৰ সময়ত নাওখনত প্ৰায় ২০ জন যাত্ৰী আছিল বুলি প্ৰাথমিক তথ্যত প্ৰকাশ পাইছে। নদীৰ মাজভাগত নাওখন হঠাতে বাগৰি পৰাত যাত্ৰীসকল পানীত পৰে।
প্ৰকাশিত খবৰ অনুসৰি, কেইবাটাও শিশুৱে এক ভোজত অংশগ্ৰহণ কৰিবলৈ নাওখনত উঠিছিল। ভোজৰ পৰা উভতি অহাৰ পথতে এই শোকাৱহ দুৰ্ঘটনা সংঘটিত হয়। অৱশ্যে কি পৰিস্থিতিত নাওখন বাগৰি যায়, সেই বিষয়ে এতিয়াও স্পষ্ট তথ্য পোহৰলৈ অহা নাই।
দুৰ্ঘটনাৰ পিছতে উদ্ধাৰকাৰী দলে নদীৰ পৰা মৃতদেহ উদ্ধাৰ কৰিবলৈ অভিযান আৰম্ভ কৰে। উদ্ধাৰ অভিযান আগবঢ়াৰ লগে লগে মৃতকৰ সংখ্যাও বৃদ্ধি পায়। বৈশালী জিলাৰ জিলা দণ্ডাধীশ বৰ্ষা সিঙে প্ৰথম অৱস্থাত ১১ জন লোকৰ মৃত্যুৰ কথা নিশ্চিত কৰিছিল। পৰৱৰ্তী সময়ত উদ্ধাৰ হোৱা মৃতদেহৰ সংখ্যা বৃদ্ধি পোৱাত মৃতকৰ সংখ্যা ১৪ জনলৈ বৃদ্ধি পায়।
ইফালে, ৰাঘোপুৰ সমষ্টিৰ বিধায়ক তথা ৰাষ্ট্ৰীয় জনতা দলৰ নেতা তেজস্বী যাদৱে জনোৱা অনুসৰি, দুৰ্ঘটনাত আহত ছয়জন লোকক চিকিৎসালয়ত ভৰ্তি কৰোৱা হৈছে। আনহাতে, তিনিজন লোকক সুকলমে উদ্ধাৰ কৰা হৈছে।
এই শোকাৱহ নাও দুৰ্ঘটনাত কেইবাজনো লোকৰ প্ৰাণহানি হোৱাত গভীৰ শোক প্ৰকাশ কৰিছে বিহাৰৰ মুখ্যমন্ত্ৰী সম্ৰাট চৌধুৰীয়ে। দুৰ্ঘটনাত নিহত প্ৰতিগৰাকী ব্যক্তিৰ পৰিয়াললৈ ৪ লাখ টকাকৈ আৰ্থিক সাহায্য আগবঢ়োৱাৰ কথা ঘোষণা কৰিছে মুখ্যমন্ত্ৰীগৰাকীয়ে।
ইয়াৰ লগতে উদ্ধাৰ আৰু সাহায্য অভিযান অধিক ক্ষিপ্ৰতাৰে আগবঢ়াবলৈ জিলা প্ৰশাসনক নিৰ্দেশ দিছে মুখ্যমন্ত্ৰী চৌধুৰীয়ে। দুৰ্ঘটনাত আহতসকলে যাতে উপযুক্ত চিকিৎসা লাভ কৰে, সেয়াও নিশ্চিত কৰিবলৈ সংশ্লিষ্ট কৰ্তৃপক্ষক নিৰ্দেশ দিয়া হৈছে।
এই হৃদয়বিদাৰক ঘটনাই অঞ্চলটোত শোকৰ ছাঁ পেলাইছে। দুৰ্ঘটনাত প্ৰাণ হেৰুওৱা লোকসকলৰ পৰিচয় আৰু নাওখন ডুবি যোৱাৰ প্ৰকৃত কাৰণ সন্দৰ্ভত অধিক তথ্য এতিয়াও জানিব পৰা হোৱা নাই। পৰৱৰ্তী তদন্ত আৰু উদ্ধাৰ অভিযানৰ পিছত ঘটনা সন্দৰ্ভত অধিক তথ্য পোহৰলৈ অহাৰ সম্ভাৱনা আছে।
.webp "নৱৰাত্ৰি উপলক্ষে দেৱী শৈলপুত্ৰীক প্ৰণাম জনাই দেশবাসীক শুভেচ্ছা প্ৰধানমন্ত্ৰী মোদীৰ")
