শ্বিলং
মেঘালয়ত হানিমুনৰ সময়ত স্বামী ৰাজা ৰঘুবংশীক হত্যাৰ ষড়যন্ত্ৰ ৰচনা কৰাৰ অভিযোগত অভিযুক্ত সোণম ৰঘুবংশী নামৰ মহিলাগৰাকীৰ বিৰুদ্ধে গোট খোৱা প্ৰমাণ দাখিল কৰাত বিশেষ তদন্তকাৰী দলৰ সন্মুখত ভাঙি পৰে বুলি সূত্ৰই প্ৰকাশ কৰিছে।
সূত্ৰই লগতে কয় যে তেওঁৰ কথিত প্ৰেমিক ৰাজ কুশৱাহাৰ সহযোগত স্বামীক হত্যা কৰাৰ পৰিকল্পনা কৰা বুলিও স্বীকাৰ কৰে। কুশৱাহাইও এদিন পূৰ্বে অপৰাধ স্বীকাৰ কৰিছিল।
সূত্ৰৰ পৰা জানিব পৰা মতে, সোনাম, যিয়ে সোমবাৰে পুৱা ৩ বজাত শিলঙৰ পৰা ১,৩০০ কিলোমিটাৰ দূৰত ৰহস্যজনকভাৱে উলিয়াই আহিছিল, প্ৰথমে নিজকে ডকাইতিৰ বলি হিচাপে উপস্থাপন কৰিবলৈ চেষ্টা কৰিছিল। গাজীপুৰৰ পৰা শিলচৰলৈ অহা ২৭ ঘণ্টীয়া যাত্ৰাত কোনো আৰক্ষী ৰ সৈতে তেওঁ কথা পতা নাছিল। সূত্ৰই আৰু জনোৱা মতে, যেতিয়া পুৱা ১১ বজাত জেৰা আৰম্ভ হয়, তেতিয়া তেওঁ ডকাইতিৰ বলি হোৱাৰ দাবী পুনৰাবৃত্তি কৰে।
কিন্তু যেতিয়া শ্বিলং আৰক্ষীৰ এছ আই টিয়ে অপৰাধৰ পিছত হত্যাকাৰীক লগ পোৱা চি চি টি ভি ফুটেজ, কল ৰেকৰ্ড, আৰু অপৰাধস্থলীৰ পৰা উদ্ধাৰ হোৱা ৰেইনকোট আৰু তেজেৰে দাগ পৰা চাৰ্টৰ দৰে প্ৰমাণ আৰু পিছত তেওঁৰ বুলি চিনাক্ত কৰাকে ধৰি প্ৰমাণৰ শৃংখল দাখিল কৰাৰ সময়ত সোণমে কান্দি কান্দি স্বীকাৰোক্তি দিয়া বুলি জানিব পৰা গৈছে।
ঈষ্ট খাচি হিলছৰ আৰক্ষী অধীক্ষক বিবেক ছিয়েমে কয়, "সোণমৰ বিৰুদ্ধে আমাৰ হাতত এনে প্ৰমাণ আছে যিয়ে হত্যাকাণ্ডৰ সৈতে তেওঁৰ জড়িততা প্ৰমাণ কৰে।"
১০ জুনত সোণমৰ কথিত প্ৰেমিক ৰাজ কুশৱাহা আৰু তেওঁৰ তিনিজন ভেৰণীয়া হত্যাকাৰী বিশাল সিং চৌহান, আকাশ ৰাজপুত, আৰু আনন্দ কুৰ্মীয়ে ৰাজা ৰঘুবংশীৰ হত্যাকাণ্ডৰ লগত জড়িত থকাৰ কথা স্বীকাৰ কৰে।
সংবাদ মাধ্যমৰ আগত ইন্দোৰৰ এ চি পি (অপৰাধ শাখা) পুনম চান্দ যাদৱে জনোৱা মতে, অভিযুক্তই হত্যাকাণ্ড সংঘটিত কৰা বুলি স্বীকাৰ কৰাই নহয়, ৰাজাৰ পত্নী সোণমও সেই স্থানত উপস্থিত আছিল আৰু “স্বামীৰ মৃত্যু চাইছিল” বুলিও প্ৰকাশ কৰিছে।
১১ মে’ত ইন্দোৰত বিবাহপাশত আবদ্ধ হৈ সোণম আৰু ৰাজাই হানিমুনৰ বাবে মেঘালয়লৈ যাত্ৰা কৰে। ২৩ মে’ত দম্পতীহালে নংৰিয়াট গাঁৱৰ এটা হোমষ্টেৰ পৰা চেক আউট কৰে। দহ দিনৰ পাছত প্ৰায় ২০ কিলোমিটাৰ দূৰত্বত অৱস্থিত ২০০ ফুট গভীৰ খাৱৈত ৰাজাৰ মৃতদেহ উদ্ধাৰ হয়।
আৰক্ষীয়ে জনোৱা মতে, ৰাজ কুশৱাহাই ভাড়া অনা বুলি অভিযোগ উত্থাপন কৰা তিনিজন লোকে ৰাজাক হত্যা কৰিছিল। কুশৱাহা গোটেই সময়ছোৱাত সোণমৰ সৈতে যোগাযোগত আছিল বুলি জানিব পৰা গৈছে। বৰ্তমান চাৰিওজন অভিযুক্ত আৰক্ষীৰ জিম্মাত।
ইফালে, সোণম ৰঘুবংশীৰ ভাতৃ গোবিন্দেও মাত মাতিছে, হত্যাকাণ্ডত ভগ্নীৰ ভূমিকাক লৈ তেওঁ নিশ্চিত বুলি উল্লেখ কৰিছে। "এতিয়ালৈকে পোৱা প্ৰমাণ অনুসৰি মই ১০০ শতাংশ নিশ্চিত যে তাই এই হত্যাকাণ্ড সংঘটিত কৰিছে। এই গোচৰৰ আটাইকেইজন অভিযুক্ত ৰাজ কুশৱাহাৰ সৈতে জড়িত। আমি সোণম ৰঘুবংশীৰ সৈতে আমাৰ সম্পৰ্ক শেষ কৰিছো। ৰাজাৰ পৰিয়ালৰ ওচৰত ক্ষমা বিচাৰিছো।"
গোবিন্দে লগতে প্ৰকাশ কৰে যে ৰাজ কুশৱাহাই সোণমক ‘দিদি’ বুলি মাতিছিল আৰু যোৱা তিনি বছৰ ধৰি সোণমে তেওঁক ৰাখী বান্ধি আহিছিল। "তেওঁলোকৰ সম্পৰ্কৰ বিষয়ে আমি জানিলে আমি কেতিয়াও এনেকুৱা হ’বলৈ নিদিলোহেঁতেন।" - তেওঁ লগতে কয়।
