গুৱাহাটী
অসমৰ সংগীত জগতৰ জনপ্ৰিয় শিল্পী জুবিন গাৰ্গৰ ছিংগাপুৰত হোৱা সন্দেহজনক মৃত্যুৰ তদন্ত কৰিবলৈ গুৱাহাটী উচ্চ ন্যায়ালয়ে গঠন কৰি এজনীয়া তদন্ত সমিতিয়ে অভিযুক্তক জেৰা আৰম্ভ কৰিছে।
গুৱাহাটী উচ্চ ন্যায়ালয়ে এই ঘটনাটো তদন্ত কৰিবলৈ এখন দ্ৰুত বিচাৰ আদালত গঠন কৰাৰ লগতে ন্যায়াধীশ সুমিত্ৰা শইকীয়াৰ নেতৃত্বত এখন এজনীয়া তদন্ত সমিতি স্থাপন কৰিছে।
এই সমিতিয়ে ঘটনাটোত অভিযুক্ত দুজন লোক — শেথৰজ্যোতি গোস্বামী আৰু অমৃতপ্ৰভা মহন্ত — ক জেৰা আৰম্ভ কৰিছে। বৰ্তমান তেওঁলোক দিমা হাসাও জিলাৰ হাফলঙ উপ-কাৰাগাৰত বন্দী হৈ আছে।
এজনীয়া সমিতি দেওবাৰে হাফলঙত উপস্থিত হৈ চাৰ্কিট হাউচত থাকি তদন্ত চলাই আছে। সোমবাৰে কঠোৰ নিৰাপত্তাৰ মাজত গুৱাহাটী উচ্চ ন্যায়ালয়ৰ উকীল পল্লৱী কাকতি আৰু ভাস্কৰ শৰ্মা, কামৰূপ মেট্ৰ’ আদালতৰ অতিৰিক্ত ৰাজহুৱা অভিয়োজক সমুদ্ৰগুপ্ত দত্ত, আৰু অসম সচিবালয়ৰ ষ্টেনোগ্ৰাফাৰ প্ৰিয় ৰঞ্জন সিং হাফলঙ উপ-কাৰাগাৰলৈ গৈ অভিযুক্ত দুজনক জেৰা কৰে।
সমিতিৰ বৰমুৰীয়া ন্যায়াধীশ সুমিত্ৰা শইকীয়াই দিমা হাসাও জিলাৰ প্ৰশাসনক তদন্তৰ বাবে সকলো ব্যৱস্থা কৰিবলৈ নিৰ্দেশ দিছে। ইয়াৰ ভিতৰত তদন্ত প্ৰক্ৰিয়াৰ ভিডিঅ’ ৰেকৰ্ডিংও অন্তৰ্ভুক্ত আছে। সমিতিৰ সচিব অনুপ পাঠকো জেৰাৰ সময়ত উপস্থিত আছিল।
এই জেৰা ১৭ এপ্ৰিললৈকে চলি থাকিব বুলি আশা কৰা হৈছে। কিন্তু জেৰাত কি প্ৰশ্ন কৰা হৈছে, তাৰ বিষয়ে কোনো তথ্য প্ৰকাশ কৰা হোৱা নাই।
উল্লেখযোগ্য যে, জুবিন গাৰ্গৰ মৃত্যুৰ পিছত আৰক্ষীয়ে শেথৰজ্যোতি গোস্বামী আৰু অমৃতপ্ৰভা মহন্তক গ্ৰেপ্তাৰ কৰিছিল। তেওঁলোক ১৭ অক্টোবৰ, ২০২৫ তাৰিখৰ পৰা হাফলঙ উপ-কাৰাগাৰত ন্যায়িক জিম্মাত আছে।
