আঙ্কাৰা
তুৰস্ক আৰু ছিৰিয়াৰ উদ্ধাৰকাৰীসকলে মঙলবাৰে ঠাণ্ডা নিশাত খালী হাতেৰে খান্দি ধাৰাবাহিকভাৱে বিধ্বংসী ভূমিকম্পৰ ফলত খহি পৰা হাজাৰ হাজাৰ অট্টালিকাৰ ধ্বংসাৱশেষৰ মাজত জীৱিত লোকৰ বিচাৰি কটায়।
তুৰস্ক-চিৰিয়া সীমান্তৰ ওচৰত প্ৰচণ্ড ভূমিকম্পৰ পিছত সমগ্ৰ দেশ দুখনতে নিশ্চিত মৃত্যুৰ সংখ্যা ৪৩০০ৰ ওপৰলৈ উঠিছে। ই হৈছে দেশ দুখনত হুৱা আটাইতকৈ ডাঙৰ ভূমিকম্প যাৰ প্ৰাবল্য আছিল ৰিখটাৰ স্কেলত ৭.৮।
তুৰস্ক আৰু ছিৰিয়াৰ দুৰ্যোগ সঁহাৰি দলসমূহে জনোৱা মতে কেইবাখনো চহৰত ৫৬০০ৰো অধিক অট্টালিকা খহি পৰিছে, যাৰ ভিতৰত ভূমিকম্পৰ সময়ত শুই থকা বাসিন্দাৰে ভৰি থকা বহু বহুমহলীয়া এপাৰ্টমেণ্ট ব্লকও আছে।
২৩ বছৰীয়া সাংবাদিক মেলিছা ছালমানে কয়, "আমি ভাবিছিলো যে এয়া সৰ্বনাশ। এইটো আছিল আমি প্ৰথমবাৰৰ বাবে লাভ কৰা এনেকুৱা অভিজ্ঞতা।"
তুৰস্কৰ সাহায্য সংস্থা আফাডে মঙলবাৰে জনোৱা মতে, কেৱল সেই দেশতে এতিয়া ২৯২১ জন লোকৰ মৃত্যু হৈছে আৰু সৰ্বমুঠ নিশ্চিত লোকৰ সংখ্যা ৪৩৬৫ জনলৈ বৃদ্ধি পাইছে।
মৃত্যুৰ সংখ্যা অনিবাৰ্যভাৱে বৃদ্ধি পোৱাৰ আশংকা কৰা হৈছে। বিশ্ব স্বাস্থ্য সংস্থাৰ বিষয়াসকলে অনুমান কৰিছে যে ২০ হাজাৰ পৰ্যন্ত লোকৰ মৃত্যু হ’ব পাৰে।
প্ৰাৰম্ভিক ভূমিকম্পটো ইমানেই ডাঙৰ আছিল যে গ্ৰীনলেণ্ডৰ দৰে দূৰৈত অনুভৱ কৰা হৈছিল আৰু ইয়াৰ প্ৰভাৱ ইমানেই ডাঙৰ যে ই বিশ্বজুৰি সঁহাৰিৰ সূচনা কৰিছে।
ইউক্ৰেইনৰ পৰা নিউজিলেণ্ডলৈকে কেইবাখনো ৰাষ্ট্ৰই সহায় প্ৰেৰণ কৰাৰ প্ৰতিশ্ৰুতি দিছে যদিও ঠাণ্ডা, বৰষুণ আৰু শূন্যৰ তলৰ উষ্ণতাই সঁহাৰি মন্থৰ কৰি তুলিছে।
বাহিৰত ঠাণ্ডাৰ স্বত্বেও আতংকিত বাসিন্দাসকলে ৰাতিটো ৰাজপথত কটালে। ঠাণ্ডাৰ বাবে জুইৰ কাষত গোট খাই থাকিল।
আমেৰিকাৰ ভূতাত্ত্বিক জৰীপে জনোৱা মতে, সোমবাৰৰ প্ৰথমটো ভূমিকম্পই পুৱা ৪:১৭ বজাত প্ৰায় ১৮ কিলোমিটাৰ গভীৰতাত তুৰস্কৰ প্ৰায় ২০ লাখ লোক বাস কৰা গাজিয়ানেপ চহৰৰ ওচৰত সংঘটিত হয়।
দুৰ্যোগ ব্যৱস্থাপনা সংস্থাটোৱে জনোৱা মতে, তুৰস্কত এতিয়ালৈকে ১৪ হাজাৰতকৈ অধিক লোক আহত হোৱাৰ খবৰ পোৱাৰ বিপৰীতে ছিৰিয়াই কমেও ৩৪১১ জন লোক আহত হোৱাৰ কথা প্ৰকাশ কৰিছে।
বিষয়াসকলে কয় যে তিনিটা বিমানবন্দৰ অকাৰ্য্যকৰী হৈ পৰিছে, যাৰ ফলত গুৰুত্বপূৰ্ণ সাহায্য প্ৰদান কৰাটো জটিল হৈ পৰিছে।
শীতকালীন তুষাৰপাতৰ ফলত অঞ্চলটোৰ প্ৰধান পথসমূহ বৰফেৰে আবৰি ধৰিছে।
