ছানা
ইজৰাইলে পুনৰবাৰ য়েমেনৰ ৰাজধানী ছানাত বিমান আক্ৰমণ চলাইছে। জানিব পৰা মতে, হাউথী বিদ্ৰোহী নিয়ন্ত্ৰিত চৰকাৰৰ প্ৰধানমন্ত্ৰী আহমেদ আল ৰাহাৱী এই আক্ৰমণত নিহত হৈছে। ইয়াৰ সমান্তৰালকৈ আন বহু মন্ত্ৰীয়েও এই আক্ৰমণত প্ৰাণ হেৰুৱাইছে বুলি প্ৰকাশ পাইছে।
হাউথী বিদ্ৰোহীয়ে কয় যে, ২০২৪ চনৰ আগষ্ট মাহৰ পৰা আল-ৰহৱী হাউথী নেতৃত্বাধীন চৰকাৰখনৰ প্ৰধানমন্ত্ৰী আছিল। বিগত এটা বছৰত চৰকাৰৰ কাৰ্যকলাপ আৰু কৰ্মক্ষমতাৰ মূল্যায়নৰ বাবে আয়োজন কৰা নিয়মীয়া কৰ্মশালাৰ সময়ত তেওঁক আন মন্ত্ৰীসকলৰ সৈতে লক্ষ্য কৰি লোৱা হৈছিল। একে সময়তে ইজৰাইলী সেনাই য়েমেনৰ ছানা অঞ্চলৰ হাউথী সন্ত্ৰাসবাদী শাসনৰ সামৰিক ঘাটিত নিখুঁত আক্ৰমণ চলাইছিল।
বিদ্ৰেহী সংগঠনটোৰ শীৰ্ষ নেতাসকলে এটা এপাৰ্টমেণ্টত ৰাষ্ট্ৰীয় পৰ্যায়ত সম্প্ৰচাৰিত ভাষণ কাৰ্যসূচী চাই থকাৰ সময়তে এই বিমান আক্ৰমণ সংঘটিত হয়। য়েমেনৰ এটা চেনেলে প্ৰকাশ কৰা অনুসৰি হাউথী প্ৰধানমন্ত্ৰী আল ৰাহৱী তেওঁৰ কেইবাজনো সহায়কৰ সৈতে এটা এপাৰ্টমেণ্টত আছিল। এই আক্ৰমণত হাউথীৰ প্ৰতিৰক্ষা মন্ত্ৰী মহম্মদ নাছেৰ আল আথিফি আৰু মুখ্য সেনাধ্যক্ষ মহম্মদ আব্দ আল কৰিম আল গামাৰীও নিহত হোৱাৰ সম্ভাৱনা আছে।
গাজাত হামাছৰ বিৰুদ্ধে যুদ্ধৰ সময়ত হাউথীয়ে বাৰে বাৰে ইজৰাইললৈ ক্ষেপণাস্ত্ৰ নিক্ষেপ কৰি আহিছে। হাউথী বিদ্ৰোহীসকলে কয় যে, এই আক্ৰমণসমূহ পেলেষ্টাইনীসকলৰ সৈতে সংহতি প্ৰদৰ্শনৰ বাবে সংঘটিত কৰা হৈছে। কিন্তু য়েমেনৰ পৰা নিক্ষেপ কৰা বেছিভাগ ক্ষেপণাস্ত্ৰ আকাশমাৰ্গতে ইজৰাইলে বাধা দিয়াত ছিন্নভিন্ন হৈ পৰে। হাউথী পৰিচালিত স্বাস্থ্য মন্ত্ৰালয় আৰু চৰকাৰী বিষয়াৰ মতে, চলিত সপ্তাহৰ আৰম্ভণিতে ইজৰাইলৰ আক্ৰমণে ছানাৰ কেইবাটাও অঞ্চলক লক্ষ্য কৰি লৈছিল। এই আক্ৰমণত কমেও ১০ জন লোক নিহত হোৱাৰ লগতে ১০২ জন আহত হয়।
ইয়াৰ পূৰ্বে ইজৰাইল আৰু আমেৰিকাই য়েমেনত বিদ্ৰোহীৰ অধীনস্থ অঞ্চলত বোমা বিস্ফোৰণ কৰিছিল। ইয়াৰ ভিতৰত আছিল ছানা আৰু কৌশলগত উপকূলীয় চহৰ হোদেইডা। ইজৰাইলৰ আক্ৰমণৰ বাবে মে’ মাহত ছানা বিমানবন্দৰ সেৱা বন্ধ হৈ পৰিছিল। ট্ৰাম্প প্ৰশাসনে মে’ মাহত হাউথীৰ সৈতে চুক্তিৰ কথা ঘোষণা কৰিছিল। ইয়াৰ অধীনত তেওঁলোকে লোহিত সাগৰত জাহাজৰ ওপৰত আক্ৰমণ বন্ধ কৰাৰ বিনিময়ত বিমান আক্ৰমণ বন্ধ কৰি দিয়াৰ চুক্তি কৰিছিল। অৱশ্যে বিদ্ৰোহীসকলে কয় যে, এই চুক্তিত ইজৰাইলৰ সৈতে জড়িত ঘাটিসমূহত আক্ৰমণ বন্ধ কৰাৰ কথা অন্তৰ্ভুক্ত কৰা হোৱা নাই।
