নতুন দিল্লী
মধ্য ইৰানৰ মাৰ্কাজী প্ৰদেশত ইৰানী সেনাই আমেৰিকাৰ এফ-৩৫ যুদ্ধ বিমান ধ্বংস কৰিছে বুলি দাবী কৰিছে। ইৰানৰ খাতিম আল আনবিয়া মুখ্যালয়ে এই দাবী কৰিছে। সংবাদ মাধ্যমৰ মতে, ধ্বংসাৱশেষ পৰীক্ষা কৰাত ব্ৰিটেইনৰ লেকেনহিথ এয়াৰ বেছৰ প্ৰমাণ পোৱা গৈছে। এই বিমানঘাটিটো ব্ৰিটেইনত থকা আমেৰিকাৰ বায়ুসেনাৰ এক মূল ঘাটি। বৰ্তমান বিমানখনৰ পাইলট বা অভিযান সন্দৰ্ভত কোনো আনুষ্ঠানিক তথ্য প্ৰকাশ কৰা হোৱা নাই।
ইয়াৰ পূৰ্বে ১৯ মাৰ্চত ইৰানে আমেৰিকাৰ এফ-৩৫এ যুঁজাৰু বিমান এখন ধ্বংস কৰা বুলি দাবী কৰিছিল আৰু এই ঘটনাৰ ভিডিঅ’ প্ৰকাশ কৰিছিল। ভিডিঅ’টোত বিমানখনক আক্ৰমণ কৰা দেখা গৈছে যদিও ইয়াৰ দুৰ্ঘটনা নিশ্চিত কৰা হোৱা নাই। কিছুমান খবৰ অনুসৰি বিমানখনৰ ক্ষতি হৈছে, পাইলটজন সামান্য আঘাতপ্ৰাপ্ত হৈছে যদিও সুস্থিৰ হৈ আছে। পাইলটজন ৰক্ষা পৰে আৰু বিমানখন দুৰ্ঘটনাগ্ৰস্ত হোৱা নাছিল। পিছত ই মধ্যপ্ৰাচ্যৰ আমেৰিকাৰ বিমান ঘাটিত সফল জৰুৰীকালীন অৱতৰণ কৰে।
ইৰানৰ পূৰ্বৰ দাবী আমেৰিকাই খাৰিজ কৰাৰ পিছত ইৰানে এইবাৰ এফ-৩৫ৰ কেইবাটাও টুকুৰাৰ ফটো প্ৰকাশ কৰিছে। ইৰানৰ মেহৰ নিউজ এজেন্সীয়ে কয় যে দুৰ্ঘটনাৰ পৰা হোৱা শক্তিশালী বিস্ফোৰণত পাইলটৰ বাবে বাহিৰলৈ ওলোৱাত অসুবিধাৰ সৃষ্টি হৈছে। এই পোষ্টসমূহৰ সন্দৰ্ভত আমেৰিকাৰ চেণ্ট্ৰেল কমাণ্ডে কোনো সঁহাৰি নিদিলেও আই জি আৰ চিয়ে আমেৰিকাৰ যুদ্ধ বিমান এখন ধ্বংস কৰা বুলি পূৰ্বে কৰা দাবীক অস্বীকাৰ কৰে।
