প্ৰধানমন্ত্ৰী মোদীয়ে কয় যে জাপানৰ উৎকৃষ্টতা আৰু ভাৰতৰ পৰিসৰে এক নিখুঁত অংশীদাৰিত্বৰ সৃষ্টি কৰিব পাৰে। তেওঁ কয় যে, দুয়োখন দেশৰ মাজত ভাগ-বতৰা কৰা কৰ্মশক্তিৰ ফলত সমৃদ্ধিৰ সূচনা হ’ব।
প্ৰধানমন্ত্ৰী মোদীয়ে কয়, "ভাৰত আৰু জাপানৰ অংশীদাৰিত্ব অৰ্থনৈতিকভাৱে কৌশলগত আৰু স্মাৰ্ট শক্তি। আমি অংশীদাৰী স্বাৰ্থক অংশীদাৰী সমৃদ্ধিলৈ ৰূপান্তৰিত কৰিছো। গ্ল'বেল ছাউথৰ জাপানী ব্যৱসায়ীসকলৰ বাবে ভাৰত হৈছে এক স্প্ৰিং ব’ৰ্ড। আমি একেলগে এছিয়াৰ শতিকাক স্থিতিশীলতা, বৃদ্ধি আৰু সমৃদ্ধিৰ দিশত গঢ় দিম। ভাৰতে নতুন আৰু সৰলীকৃত আয়কৰ ব্যৱস্থাৰ প্ৰৱৰ্তন কৰিছে।"
প্ৰধানমন্ত্ৰীয়ে ভাষণত কয়, "আমাৰ সংস্কাৰ কেৱল কৰত সীমাবদ্ধ নহয় - আমি ব্যৱসায় সহজ কৰাৰ ওপৰত গুৰুত্ব দিছো আৰু একক ডিজিটেল অনুমোদনৰ দুৱাৰ মুকলি কৰিছো৷ আমি ৪৫,০০০ টা কম্প্লাইয়েন্সক যুক্তিযুক্ততা প্ৰদান কৰিছো আৰু নিয়ন্ত্ৰণমুক্ত কৰাৰ বাবেও এখন কমিটী গঠন কৰিছো। প্ৰতিৰক্ষা আৰু মহাকাশ খণ্ড ব্যক্তিগত কোম্পানীসমূহৰ বাবে মুকলি কৰা হৈছে আৰু আমি আমাৰ পাৰমাণৱিক খণ্ডও মুকলি কৰিছো। বিশ্বই কেৱল ভাৰতক দেখাই নহয়, বিশ্বাসো কৰিছে।"
ইয়াৰ পূৰ্বে প্ৰধানমন্ত্ৰীগৰাকীয়ে টকিঅ’ত উপস্থিত হোৱাৰ লগে লগে বিষয়াসকলৰ লগতে ভাৰতীয় সম্প্ৰদায়ৰ লোকসকলেও তেওঁক উষ্ম আদৰণি জনাই আৰু প্ৰধানমন্ত্ৰীগৰাকীৰ আগমনৰ কিছু সময়ৰ পিছতে তেওঁলোকৰ সৈতে মত-বিনিময় কৰে।
ভাৰত-জাপান অৰ্থনৈতিক মঞ্চত ভাষণ দি জাপানৰ প্ৰধানমন্ত্ৰী শিগেৰু ইছিবাই কয়, "জাপানৰ উন্নত প্ৰযুক্তি আৰু ভাৰতৰ অসাধাৰণ প্ৰতিভা আৰু বিশাল বজাৰ ইটো সিটোৰ পৰিপূৰক, যাৰ ফলত দুয়োখন দেশৰ অৰ্থনৈতিক সম্পৰ্ক নাটকীয়ভাৱে সম্প্ৰসাৰিত হ’ব। মেক ইন ইণ্ডিয়াত বহু জাপানী কোম্পানীয়ে মূখ্য ভূমিকা পালন কৰি আছে আৰু এই সহযোগিতা সমগ্ৰ প্ৰশান্ত মহাসাগৰ আৰু ভাৰত মহাসাগৰ, আফ্ৰিকা আনকি ইউৰোপতো বিয়পি পৰিছে।"
জাপানৰ প্ৰধানমন্ত্ৰীগৰাকীয়ে কয়, "আজি আমাৰ কোম্পানীসমূহৰ মাজত কেইবাখনো সহযোগিতাৰ নথিপত্ৰত স্বাক্ষৰ কৰাটোৱে ভাৰতত অধিক বিনিয়োগ আৰু সহযোগিতা শক্তিশালী কৰাৰ বাবে জাপানৰ দৃঢ় দায়বদ্ধতাক প্ৰদৰ্শন কৰিছে আৰু এইটোৱেই স্পষ্ট প্ৰমাণ যে, আমি দুয়োখন দেশক কেন্দ্ৰ কৰি এক শক্তিশালী যোগান শৃংখল গঢ়ি তুলিছো৷ এনে এটা মুহূৰ্তত মহামহিম মোদীৰ সৈতে ইয়াত একেলগে থিয় দিয়াটো মোৰ বাবে এক বৃহৎ সন্মান। মই আমাৰ দ্বিপাক্ষিক সহযোগিতাৰ ভৱিষ্যত আৰু অধিক বিকশিত হোৱাটো বিচাৰিছো।"
শুকুৰবাৰে জাপানৰ প্ৰধানমন্ত্ৰী শিগেৰু ইছিবাৰ সৈতে প্ৰথম বাৰ্ষিক সন্মিলনত অংশগ্ৰহণ কৰে প্ৰধানমন্ত্ৰী মোদীয়ে । প্ৰায় সাত বছৰৰ ভিতৰত এয়া ভাৰতৰ প্ৰধানমন্ত্ৰীগৰাকীৰ প্ৰথম একক জাপান ভ্ৰমণ। বাৰ্ষিক সন্মিলনৰ বাবে মোদীয়ে শেষবাৰৰ বাবে ২০১৮ চনত জাপান ভ্ৰমণ কৰিছিল। ভাৰতৰ প্ৰধানমন্ত্ৰীগৰাকীয়ে অৱশ্যে কেইবাবাৰো জাপান ভ্ৰমণ কৰিছে৷ সেই ভ্ৰমণকালত বহুপক্ষীয় বৈঠক আৰু অন্যান্য অনুষ্ঠানসমূহত তেওঁ অংশগ্ৰহণ কৰিছিল৷
প্ৰধানমন্ত্ৰীৰ ভ্ৰমণৰ পূৰ্বে বৈদেশিক পৰিক্ৰমা মন্ত্ৰালয়ে প্ৰকাশ কৰা এক বিবৃতিত কোৱা হৈছে যে এই ভ্ৰমণ সম্পূৰ্ণৰূপে ভাৰত আৰু জাপানৰ দ্বিপাক্ষিক কাৰ্যসূচীৰ প্ৰতি উৎসৰ্গিত হ’ব। বৈদেশিক পৰিক্ৰমা মন্ত্ৰালয়ে কয়, "২০১৪ চনত কাৰ্যভাৰ গ্ৰহণ কৰাৰ পিছত প্ৰধানমন্ত্ৰীগৰাকীৰ জাপান ভ্ৰমণৰ ক্ষেত্ৰত এয়া অষ্টমটো ভ্ৰমণ আৰু ই আমাৰ বৈদেশিক সম্পৰ্কত এই বিশেষ সম্পৰ্কক প্ৰদান কৰা উচ্চ অগ্ৰাধিকাৰৰ প্ৰতিফলন ঘটায়।"
