কাবুল
কাবুললৈ ইছলামবাদৰ শান্তি প্ৰসাৰৰ ক্ষেত্ৰত এক বৃহৎ বিপৰ্যয়ৰ ৰূপত পাকিস্তানৰ প্ৰতিৰক্ষা মন্ত্ৰী খোৱাজা আছিফ, আইএছআইৰ মুৰব্বী আছিম মালিক আৰু আন দুজন পাকিস্তানী জেনেৰেলৰ ভিছা নাকচ কৰা হৈছে।
সূত্ৰৰ উদ্ধৃতি দি ট’ল’নিউজে প্ৰকাশ কৰা অনুসৰি বিগত তিনিদিনত তিনিবাৰকৈ তেওঁলোকৰ ভিছাৰ অনুৰোধ নাকচ কৰা হৈছে।
ইফালে, চলিত আফগানিস্তান-পাকিস্তান সংঘাতত শান্তিপ্ৰেমীৰ চৰিত্ৰত অভিনয় কৰাৰ সুযোগ তৎক্ষণাত গ্ৰহণ কৰে আমেৰিকাৰ ৰাষ্ট্ৰপতি ড’নাল্ড ট্ৰাম্পে।
ইজৰাইললৈ যোৱাৰ পথত ট্ৰাম্পে দুয়োপক্ষৰ মাজত মধ্যস্থতা কৰাৰ প্ৰস্তাৱ দি কয়, "মই শুনিছো যে এতিয়া পাকিস্তান আৰু আফগানিস্তানৰ মাজত যুদ্ধ চলি আছে, গতিকে মই ঘূৰি অহালৈকে অপেক্ষা কৰাৰ সিদ্ধান্ত লৈছো। মই আন এটা ক্ষেত্ৰও অনুসৰণ কৰি আছো কাৰণ মই সংঘাত সমাধান আৰু শান্তি প্ৰতিষ্ঠা কৰাত পাকৈত, আৰু তেনে কৰাটো মোৰ বাবে এক সন্মান।"
তেওঁ লগতে কয় যে, "মই যুদ্ধ সমাধানৰ বিশেষজ্ঞ, শান্তি প্ৰতিষ্ঠাৰ বিশেষজ্ঞ। এনে কৰাটো সন্মানৰ বিষয়।"
আনহাতে চীনে দুয়োখন দেশকে চীনৰ কৰ্মী, প্ৰকল্প আৰু প্ৰতিষ্ঠানৰ সুৰক্ষা আৰু নিৰাপত্তা সুনিশ্চিত কৰিবলৈ অনুৰোধ জনাইছে।
চীনে দুয়োপক্ষৰ মাজত সংযম আৰু শান্তিৰ আহ্বান জনাই কয় যে, “দুয়ো ৰাষ্ট্ৰ চীনৰ বন্ধু আৰু ইখনে সিখনৰ প্ৰতিবেশী।” ইয়াত লগতে কোৱা হৈছে যে সু-চুবুৰীয়াতা বিচৰা, অৰ্থনৈতিক আৰু সামাজিক সমৃদ্ধিৰ পিছত লগা আৰু সন্ত্ৰাসবাদৰ বিৰুদ্ধে যৌথভাৱে যুঁজ দিয়াটো পাকিস্তান আৰু আফগানিস্তান উভয়ৰে মৌলিক আৰু দীৰ্ঘম্যাদী স্বাৰ্থত।
দেওবাৰে পাকিস্তান সেনাই স্বীকাৰ কৰে যে দুয়োখন চুবুৰীয়া দেশৰ মাজত উত্তেজনা বৃদ্ধি পোৱাৰ লগে লগে পাকিস্তান-আফগানিস্তান সীমান্তত নিশাটোৰ ভিতৰতে হোৱা তীব্ৰ সংঘৰ্ষত কমেও ২৩ জন সৈনিক আৰু ২০০ৰো অধিক তালিবান আৰু সংযুক্ত সন্ত্ৰাসবাদী নিহত হয়।
আনহাতে, তালিবান চৰকাৰৰ মুখ্য মুখপাত্ৰ জাবিহউল্লাহ মুজাহিদে দাবী কৰে যে এই আক্ৰমণত ৫৮ জন পাকিস্তানী সৈন্য নিহত হোৱাৰ লগতে প্ৰায় ৩০ জন আহত হৈছে।
চীনে ত্ৰিপাক্ষিক ব্যৱস্থাৰ জৰিয়তে পাকিস্তান আৰু আফগানিস্তানৰ সৈতে ঘনিষ্ঠ সম্পৰ্ক বজাই ৰাখিছে, কাবুলৰ বিৰুদ্ধে পাকিস্তানৰ উগ্ৰপন্থী সংগঠন তেহৰিক-ই-তালিবান পাকিস্তান (টিটিপি) আৰু বেলুচ লিবাৰেচন আৰ্মী (বিএলএ)ক আতিথ্য দিয়াৰ অভিযোগ ইছলামবাদে বাৰে বাৰে উত্থাপন কৰাৰ বাবে মাজে মাজে বৈঠক অনুষ্ঠিত কৰে।
