কংগো-কিনশাছা
ডেমক্ৰেটিক ৰিপাব্লিক অৱ কংগোত এক নাও দুৰ্ঘটনাত কমেও ১৯ জন লোকৰ মৃত্যু হোৱাৰ বাতৰি পোৱা গৈছে। কোবাল বতাহে নাওখনৰ ইঞ্জিন বিকল কৰি পেলোৱাৰ ফলত দুৰ্ঘটনাটো সংঘটিত হোৱা বুলি জানিব পৰা গৈছে। কংগোৰ মাই-ডম্বে হ্ৰদত সংঘটিত হৈছে এই ঘটনা। মাই-ডম্বে প্ৰদেশৰ ৰাজ্যপালে শনিবাৰে এই দুৰ্ঘটনাৰ কথা ৰয়টাৰ্ছক জানিবলৈ দিয়ে।
কংগোৰ স্থানীয় প্ৰশাসনে জানিবলৈ দিয়া মতে, নাওখন কিৰি গাঁৱৰ পৰা দেশখনৰ ৰাজধানী কিনশাছালৈ গৈ আছিল। তীব্ৰ বোগত বতাহ বলিবলৈ ধৰাত নাওখনৰ দুয়োটা ইঞ্জিন বিকল হৈ পৰে। ইয়াৰ ফলত নাওখন হ্ৰদত ডুব যায়। নাওখনত কিমানজন যাত্ৰী আছিল সেয়া বৰ্তমানো জানিব পৰা হোৱা নাই।
মাই-ডম্বে প্ৰদেশৰ ৰাজ্যপাল ক'ছো কেভানি লেবনে কয় যে প্ৰবল বতাহৰ বাবে নাওখনৰ ইঞ্জিন বিকল হৈ পৰিছিল। যাৰ ফলত এই দুৰ্ঘটনাটো সংঘটিত হয়। দুৰ্ঘটনাৰ দিনা আমি ৯ জন লোকৰ মৃতদেহ উদ্ধাৰ কৰিছিলো। আজি আৰু ১০ টা মৃতদেহ উদ্ধাৰ কৰা হৈছে। ৮২ জন যাত্ৰীৰ প্ৰাণ ৰক্ষা পৰে।
কংগোৰ গ্ৰাম্য অঞ্চলত নাৱে পৰিবহণৰ অন্যতম ভৰসা। এই দেশেত নদীপথেৰে বহু মানুহে যাতায়াত কৰে। কিন্তু প্ৰায়ে নাও দুৰ্ঘটনা সংঘটিত হয়। ইয়াৰে অধিকাংশ দুৰ্ঘটনাই নাৱৰ আকাৰৰ তুলনাত অতিৰিক্ত যাত্ৰী উঠোৱাৰ বাবে বা নাওখনৰ উন্নীতকৰণ নকৰাৰ বাবে সংঘটিত হয়। এই ঘটনাৰ পিছতে স্থানীয় প্ৰশাসনৰ বিষয়াই এই বিষয়টো উত্থাপন কৰিছে। আনহাতে, নৌ পৰিবহণ ব্যৱস্থাৰ ক্ষেত্ৰত জাৰি কৰা নিষেধাজ্ঞাসমূহো যথাযথভাৱে পালন কৰা হোৱা নাই। ছেপ্টেম্বৰ মাহতে কংগোৰ দুটাকৈ নাও দুৰ্ঘটনাত প্ৰায় ২০০ জন লোকে প্ৰাণ হেৰুৱাইছে।
