টিয়ানজিন (চীন)
প্ৰধানমন্ত্ৰী নৰেন্দ্ৰ মোদীয়ে দেওবাৰে চীনৰ ৰাষ্ট্ৰপতি ছি জিনপিঙক ২০২৬ চনত ভাৰতে আয়োজন কৰিবলগীয়া ব্ৰিকছ সন্মিলনলৈ আমন্ত্ৰণ জনাইছে বুলি বৈদেশিক পৰিক্ৰমা মন্ত্ৰালয়ে প্ৰকাশ কৰিছে। ৰাষ্ট্ৰপতি জিনপিঙে এই আমন্ত্ৰণৰ বাবে প্ৰধানমন্ত্ৰী মোদীক ধন্যবাদ জ্ঞাপন কৰাৰ লগতে ভাৰতৰ ব্ৰিকছ অধ্যক্ষতাৰ প্ৰতি চীনৰ সমৰ্থন আগবঢ়ায়। বৰ্তমানৰ আয়োজক ব্ৰাজিলৰ পৰা ব্ৰিকছৰ নেতৃত্ব ল’বলৈ সাজু হৈছে ভাৰত।
আজি বৈদেশিক পৰিক্ৰমা মন্ত্ৰালয়ে এক বিবৃতিত প্ৰকাশ কৰিছে যে প্ৰধানমন্ত্ৰী মোদীয়ে চীনৰ চাংহাই সহযোগিতা সংস্থাৰ সভাপতিত্ব আৰু টিয়ানজিনত অনুষ্ঠিত হোৱা শীৰ্ষ সন্মিলনৰ প্ৰতিও সমৰ্থন প্ৰকাশ কৰিছে।
আজি টিয়ানজিনত অনুষ্ঠিত চাংহাই সহযোগিতা সংস্থাৰ নেতাসকলৰ শীৰ্ষ সন্মিলনৰ মাজতে দুয়োগৰাকী নেতাই এক গুৰুত্বপূৰ্ণ বৈঠকত মিলিত হয়। ইয়াৰ পূৰ্বে ২০২৪ চনত ব্ৰিকছ শীৰ্ষ সন্মিলনৰ মাজত ৰাছিয়াৰ কাজানত দুয়োগৰাকী নেতাই সাক্ষাৎ কৰিছিল। চলিত বৰ্ষৰ জুলাই মাহত প্ৰধানমন্ত্ৰী মোদীয়ে ৰিঅ’ ডি জেনেইৰ’ত অনুষ্ঠিত ব্ৰিকছ গ্ৰুপিঙৰ শীৰ্ষ সন্মিলনত কৈছিল যে ভাৰতে অহা বছৰ ব্ৰিকছক “নতুন ৰূপ” দিয়াৰ চেষ্টা কৰিব।
প্ৰধানমন্ত্ৰী মোদীয়ে কয় যে ব্ৰিকছৰ অৰ্থ হ’ব সহযোগিতা আৰু বহনক্ষমতাৰ বাবে সুস্থিৰতা আৰু উদ্ভাৱন গঢ়ি তোলা, আৰু জি-২০ৰ অধ্যক্ষতাৰ সময়ত ভাৰতে যেনেকৈ গ্ল’বেল চাউথৰ বিষয়সমূহক কাৰ্যসূচীত অগ্ৰাধিকাৰ দিছিল, ঠিক সেইদৰে ভাৰতে ব্ৰিকছৰ অধ্যক্ষতাৰ সময়তো প্ৰথমে জনকেন্দ্ৰিকতা আৰু মানৱতাৰ মনোভাৱেৰে মঞ্চখনক আগুৱাই নিব।
"অধিক সমন্বয়মুখী আৰু বহনক্ষম শাসনৰ বাবে গ্লোবেল চাউথ ক'-অপাৰেচন শক্তিশালী কৰা" শীৰ্ষক বিষয়বস্তুৰ অধীনত ১৭ সংখ্যক ব্ৰিকছ সন্মিলন অনুষ্ঠিত হয়। ছি জিনপিঙে ভাৰ্চুৱেলি এই সন্মিলনত অংশগ্ৰহণ কৰে। বিশ্ব শাসন, বিত্ত, স্বাস্থ্য, এআই, জলবায়ু পৰিৱৰ্তন, শান্তি আৰু নিৰাপত্তাকে ধৰি কৌশলগত ক্ষেত্ৰসমূহত প্ৰতিশ্ৰুতি গ্ৰহণ কৰা হৈছিল।
ইয়াৰ পূৰ্বে, চীনৰ ৰাষ্ট্ৰপতি ছি জিনপিঙে দেওবাৰে প্ৰধানমন্ত্ৰী নৰেন্দ্ৰ মোদীক কয় যে ভূ-ৰাজনৈতিক উত্থান-পতনৰ মাজতে বেইজিং আৰু নতুন দিল্লীয়ে প্ৰতিদ্বন্দ্বিতাতকৈ বন্ধুত্ব বাছি লোৱা উচিত আৰু দ্বিপাক্ষিক বিবাদৰ বাহিৰলৈ চাব লাগে। চাংহাই সহযোগিতা সংস্থাৰ শীৰ্ষ সন্মিলনৰ আঁৰত অনুষ্ঠিত প্ৰতিনিধি পৰ্যায়ৰ আলোচনাৰ সময়তে চীনৰ ৰাষ্ট্ৰপতিগৰাকীয়ে এই মন্তব্য কৰে।
কেইবামাহৰ ব্যৱধানৰ অন্তত লগ পোৱাৰ সময়ত দুয়োজন নেতাই ইজনে সিজনক উষ্ম সম্ভাষণ জনায়। প্ৰায় এঘণ্টা ধৰি হোৱা আলোচনাত মিলিত হোৱাৰ আগতে তেওঁলোকে দৃঢ়ভাৱে হাত মিলায়। বৈঠকত উদ্বোধনী ভাষণত ঝি জিনপিঙে দুয়োপক্ষক দীৰ্ঘম্যাদী কৌশলগত দৃষ্টিভংগীৰে দ্বিপাক্ষিক সম্পৰ্কৰ কাষ চাপিবলৈ আহ্বান জনায়।
