ৰাষ্ট্ৰসংঘ
বক্তাৰ সংশোধিত অস্থায়ী তালিকা অনুসৰি চলিত মাহৰ শেষৰ ফালে ৰাষ্ট্ৰসংঘৰ সাধাৰণ পৰিষদৰ বাৰ্ষিক উচ্চ পৰ্যায়ৰ অধিৱেশনত প্ৰধানমন্ত্ৰী নৰেন্দ্ৰ মোদীয়ে সাধাৰন অধিবেশনত ভাষণ প্ৰদান নকৰে।
অহা ৯ ছেপ্টেম্বৰত আৰম্ভ হ’ব ৰাষ্ট্ৰসংঘৰ সাধাৰণ পৰিষদৰ ৮০ সংখ্যক অধিবেশন। ২৩-২৯ ছেপ্টেম্বৰৰ পৰা চলিব এই উচ্চ পৰ্যায়ৰ সাধাৰণ বিতৰ্ক, অধিবেশনৰ পৰম্পৰাগত প্ৰথম বক্তা হিচাপে ব্ৰাজিল, তাৰ পিছতে আছে আমেৰিকা।
আমেৰিকাৰ ৰাষ্ট্ৰপতি ড’নাল্ড ট্ৰাম্পে ২৩ ছেপ্টেম্বৰত ঐতিহাসিক ইউএনজিএ প’ডিয়ামৰ পৰা বিশ্বৰ নেতাসকলক সম্বোধন কৰিব, যিটো হোয়াইট হাউছত দ্বিতীয়টো কাৰ্যকালত ৰাষ্ট্ৰসংঘৰ অধিবেশনত তেওঁৰ প্ৰথম ভাষণ।
শুকুৰবাৰে প্ৰকাশ পোৱা সাধাৰণ পৰিষদৰ ৮০ সংখ্যক অধিৱেশনৰ উচ্চ পৰ্যায়ৰ সাধাৰণ বিতৰ্কৰ বাবে বক্তাৰ সংশোধিত অস্থায়ী তালিকা অনুসৰি ভাৰতক প্ৰতিনিধিত্ব কৰিব এজন ‘মন্ত্ৰী’য়ে।
অহা ২৭ ছেপ্টেম্বৰত অধিৱেশনত ভাষণ দিব বৈদেশিক পৰিক্ৰমা মন্ত্ৰী এছ জয়শংকৰে। জুলাই মাহত জাৰি কৰা পূৰ্বৰ অস্থায়ী বক্তাৰ তালিকা অনুসৰি ২৬ ছেপ্টেম্বৰত সাধাৰণ অধিবেশনত মোদীয়ে ভাষণ প্ৰদান কৰাৰ কথা আছিল। ইজৰাইল, চীন, পাকিস্তান আৰু বাংলাদেশৰ চৰকাৰৰ মুৰব্বীসকলে ২৬ ছেপ্টেম্বৰত ইউএনজিএৰ সাধাৰণ অধিবেশনত ভাষণ প্ৰদান কৰিব।
চলিত বৰ্ষৰ ফেব্ৰুৱাৰী মাহত ৱাশ্বিংটনৰ হোৱাইট হাউছত ট্ৰাম্পৰ সৈতে দ্বিপাক্ষিক বৈঠকৰ বাবে মোদীয়ে আমেৰিকালৈ গৈছিল। ট্ৰাম্পে ভাৰতৰ ওপৰত মুঠ ৫০ শতাংশ শুল্ক আৰোপ কৰিছে, য’ত দিল্লীয়ে ৰাছিয়াৰ তেল ক্ৰয়ৰ বাবে ২৫ শতাংশ শুল্ক আৰোপ কৰিছে।
সাধাৰণ অধিবেশনৰ বাবে ইউএনজিএৰ বক্তাৰ তালিকাখন অস্থায়ী আৰু উচ্চ পৰ্যায়ৰ সপ্তাহ আৰম্ভ হোৱাৰ পূৰ্বে সময়সূচী আৰু বক্তাৰ পৰিৱৰ্তনৰ সম্ভাৱনা সদায় থাকে। সেই অনুসৰি তালিকাখন আপডেট কৰি থাকিব। ৰাষ্ট্ৰসংঘৰ মুখ্য কাৰ্যালয়ত বছৰৰ “সৰ্বাধিক কূটনৈতিক ঋতু” বুলি গণ্য কৰা এই উচ্চ পৰ্যায়ৰ অধিবেশন বছৰি ছেপ্টেম্বৰ মাহত আৰম্ভ হয়।
ইজৰাইল-হামাছৰ যুদ্ধ অব্যাহত থকাৰ লগতে ইউক্ৰেইনৰ সংঘাতৰ মাজতে এইবাৰৰ এই অধিবেশন অনুষ্ঠিত হৈছে। ৮০ সংখ্যক অধিবেশনৰ বিষয়বস্তু হৈছে ‘একেলগে ভাল: শান্তি, উন্নয়ন আৰু মানৱ অধিকাৰৰ বাবে ৮০ বছৰ আৰু তাতকৈ অধিক’।
২২ ছেপ্টেম্বৰত ‘ৰাষ্ট্ৰসংঘৰ ৮০ বছৰীয়া জয়ন্তী স্মৃতিত’ এখন বৈঠকৰ জৰিয়তে অধিৱেশনৰ আৰম্ভণি কৰা হ’ব। মহিলা সম্পৰ্কীয় চতুৰ্থ বিশ্ব সন্মিলনৰ ৩০ বছৰীয়া জয়ন্তী উপলক্ষে ৰাষ্ট্ৰসংঘৰ সাধাৰণ পৰিষদে “লিংগ সমতা আৰু মহিলা আৰু ছোৱালীৰ সৱলীকৰণৰ বাবে বেইজিং ঘোষণাপত্ৰ আৰু কাৰ্য্যৰ মঞ্চৰ পুনৰ প্ৰতিশ্ৰুতি, সম্পদ আৰু কাৰ্যকৰীকৰণ ত্বৰান্বিত কৰা” বিষয়ক কেন্দ্ৰ কৰি এক উচ্চ পৰ্যায়ৰ বৈঠক আহ্বান কৰিব।
ৰাষ্ট্ৰসংঘই কয় যে, এই বৈঠকত ১৯৯৫ চনত বেইজিঙত অনুষ্ঠিত হোৱা গুৰুত্বপূৰ্ণ সন্মিলনৰ পিছৰ অগ্ৰগতিৰ ওপৰত চিন্তা-চৰ্চা কৰা হ’ব আৰু বিশ্বজুৰি লিংগ সমতা আগুৱাই নিয়াৰ ক্ষেত্ৰত হোৱা কৃতিত্ব, উত্তম পদ্ধতি, ব্যৱধান আৰু চলি থকা প্ৰত্যাহ্বানসমূহৰ ওপৰত আলোকপাত কৰা হ’ব।
ৰাষ্ট্ৰসংঘৰ সচিব প্ৰধান এণ্টনিঅ’ গুটেৰেছে ২৪ ছেপ্টেম্বৰত জলবায়ু শীৰ্ষ সন্মিলন আহ্বান কৰিব, যাতে বিশ্বৰ নেতাসকলে তেওঁলোকৰ নতুন ৰাষ্ট্ৰীয় জলবায়ু কাৰ্য্য পৰিকল্পনা দাখিল কৰাৰ লগতে নতুন স্বচ্ছ শক্তি যুগৰ সুবিধাসমূহ আকৰ্ষণ কৰাৰ মঞ্চ হিচাপে কাম কৰিব।
সপ্তাহটোত অনুষ্ঠিত হ’বলগীয়া আন উচ্চ পৰ্যায়ৰ বৈঠকসমূহৰ ভিতৰত আছে ছামিট ফৰ এ ছাষ্টেনেবল, ইনক্লুছিভ এণ্ড ৰেজিলিয়েণ্ট গ্ল’বেল ইক'নমি; অসংক্ৰামক ৰোগ আৰু মানসিক স্বাস্থ্য আৰু মংগল; যুৱক-যুৱতীসকলৰ বাবে বিশ্ব কাৰ্যসূচীৰ ৩০ বছৰীয়া জয়ন্তী; এআই গভৰ্নেন্সৰ ওপৰত গ্ল’বেল ডাইলগ আৰম্ভ; পাৰমাণৱিক অস্ত্ৰ সম্পূৰ্ণৰূপে নিৰ্মূলৰ আন্তঃৰাষ্ট্ৰীয় দিৱস; আৰু ম্যানমাৰৰ ৰোহিংগীয়া মুছলমান আৰু অন্যান্য সংখ্যালঘুৰ পৰিস্থিতি।
