নতুন দিল্লী
বাংলাদেশৰ নিৰ্বাসিত প্ৰাক্তন প্ৰধানমন্ত্ৰী শ্বেখ হাছিনাক মানৱতা বিৰোধী অপৰাধত দোষী সাব্যস্ত কৰি বাংলাদেশৰ আন্তঃৰাষ্ট্ৰীয় অপৰাধ ন্যায়াধিকৰণে তেওঁক মৃত্যুদণ্ডৰ আদেশ দিয়াৰ পিচতেই আৰম্ভ হোৱা প্ৰতিবাদে লৈছে তীব্ৰ ৰূপ। হাছিনাৰ আৱামী লীগে মঙলবাৰৰ পৰা অহা ৩০ নৱেম্বৰলৈকে দেশজোৰা আন্দোলন আৰু প্ৰতিৰোধ সমদল ঘোষণা কৰিছে। ন্যায়াধিকৰণে প্ৰাক্তণ প্ৰধানমন্ত্ৰীগৰাকীক দিয়া মৃত্যুদণ্ডৰ ৰায় অবৈধ বুলি আখ্যা কৰি এই প্ৰতিবাদ জনাইছে।
উল্লেখযোগ্য যে, যোৱা ১৭ নৱেম্বৰত আন্তঃৰাষ্ট্ৰীয় অপৰাধ ন্যায়াধিকৰণে (আইচিটি-বিডি) প্ৰাক্তন প্ৰধানমন্ত্ৰীৰ অনুপস্থিতিত অনুষ্ঠিত বিচাৰৰ পিছতেই তদানীন্তন গৃহমন্ত্ৰী আছাদুজ্জামান খান কামালৰ সৈতে ৭৮ বছৰীয়া হাছিনাক মৃত্যুদণ্ডৰ শাস্তি বিহিছিল। বৰ্তমান হাছিনাই ভাৰতত আশ্ৰয় লৈ থকাৰ বিপৰীতে কামালেও দেশখনতেই আত্মগোপন কৰাৰ সন্দেহ কৰা হৈছে।
আৱামী লীগে নিজৰ অফিচিয়েল ছ’চিয়েল মিডিয়া একাউণ্টত প্ৰকাশ কৰা এটা পোষ্টত অভিযোগ কৰে যে ন্যায়াধিকৰণৰ এই ৰায়দান অহা বছৰৰ ফেব্ৰুৱাৰী মাহত অনুষ্ঠিত হ’বলগীয়া নিৰ্বাচনৰ পূৰ্বে কৰা এক ষড়যন্ত্ৰ। হাছিনা আৰু দলটোক 'নিৰ্বাচনৰ বাহিৰত' ৰখাৰ বাবে মহম্মদ ইউনুছৰ নেতৃত্বত চলা অন্তৱৰ্তীকালীন চৰকাৰে চলোৱা ৰাজনৈতিক ষড়যন্ত্ৰৰ অংশ বুলিও আৱামী লীগে নিজৰ অফিচিয়েল ছ’চিয়েল মিডিয়া একাউণ্টত প্ৰকাশ কৰিছে।
দলটোৱে অবৈধ আইচিটি ন্যায়াধিকৰণৰ অবৈধ ৰায়দান নাকচ কৰি আৰু ইউনুছৰ পদত্যাগৰ দাবী জনাইছে। ইয়াৰে অংশৰূপে দলটোৱে প্ৰতিবাদ, বিক্ষোভ আৰু ৩০ নৱেম্বৰলৈকে সকলো জিলা আৰু উপজিলা (উপজিলা)ত প্ৰতিৰোধ সমদল ঘোষণা কৰে। আৱামী লীগে কয় যে এই প্ৰহসনীয় ৰায়ক নাগৰিকে অৱজ্ঞাৰে নাকচ কৰিছে আৰু ন্যায়াধিকৰণৰ কাৰ্যবিধিক বিচাৰক উপহাস বুলি অভিহিত কৰিছে।
আৱামী লীগে কয় যে তেওঁলোকে ৰাষ্ট্ৰ বিৰোধী ষড়যন্ত্ৰ বুলি কোৱা কথাটো প্ৰতিহত কৰিবলৈ তৃণমূল পৰ্যায়ৰ কৰ্মী, ৰাজনৈতিক নেতা আৰু অংশীদাৰসকলৰ সৈতে জড়িত হৈ আছে। মুক্তি সমৰ্থক শক্তিসমূহক নিৰ্বাচনী প্ৰক্ৰিয়াৰ পৰা বাদ দিয়াৰ যিকোনো প্ৰচেষ্টাৰ বিৰুদ্ধে দেশজুৰি প্ৰতিৰোধৰ নেতৃত্ব দিয়াৰ প্ৰতিশ্ৰুতি দিয়ে।
দলটোৱে সকীয়াই কয়,"মঞ্চায়িত নিৰ্বাচন... বাংলাদেশত অনুমতি দিয়া নহ'ব। যিকোনো মূল্যৰ বিনিময়ত ইয়াক প্ৰতিহত কৰা হ'ব।"যোৱা বছৰৰ ৫ আগষ্টত ছাত্ৰ-ছাত্ৰীৰ নেতৃত্বত জুলাই বিদ্ৰোহ বুলি অভিহিত কৰা হিংসাত্মক প্ৰতিবাদত হাছিনাৰ আৱামী লীগ চৰকাৰখন উফৰাই পেলোৱা হৈছিল।
এই প্ৰতিবাদৰ তিনিদিন পিছত প্ৰতিবাদকাৰী ছাত্ৰ-ছাত্ৰীৰ আহ্বানত পেৰিছৰ পৰা নোবেল বঁটা বিজয়ী ইউনুছে অন্তৱৰ্তীকালীন চৰকাৰৰ মুখ্য উপদেষ্টা হিচাপে দায়িত্ব গ্ৰহণ কৰিবলৈ উৰা মাৰিছিল। হাছিনা আৰু আন দুগৰাকীয়ে প্ৰতিবাদকাৰীক প্ৰতিহত কৰিবলৈ নৃশংস পদ্ধতি গ্ৰহণ কৰাৰ অভিযোগ উত্থাপন হৈছিল। আনহাতে, ৰাষ্ট্ৰসংঘৰ অধিকাৰ কাৰ্যালয়ৰ প্ৰতিবেদনত কোৱা হৈছে যে যোৱা বছৰৰ ১৫ জুলাইৰ পৰা ১৫ আগষ্টৰ ভিতৰত প্ৰায় ১৪০০ লোকৰ মৃত্যু হৈছিল।
