আৱাজ-দ্য ভইচ'ৰ সৈতে হোৱা এক সাক্ষাৎকাৰত পাপু আলীয়ে কয়; "বহু বছৰ মই বিভিন্ন চাকৰিৰ ইণ্টাৰভিউ দি দি হাবাথুৰি খাইছোঁ। কৰ্মসংস্থাপনৰ বাবে বহিঃৰাজ্যলৈও গৈছিলোঁ। পিছত ভাবিলোঁ যে এনেকৈ থাকিলে বয়স গুচি যাব আৰু জীৱনত একো কৰিব নোৱাৰিম। গতিকে ঘৰতে মই সৰুকৈ হ’লেও কিবা এটা কৰাৰ মন মেলিলোঁ। মোৰ চেণ্ডেল উদ্যোগটো আৰম্ভ কৰিবলৈ প্ৰায় দুমাহ হৈছে। চাকৰি কৰিলে মই খাই-বৈ জীয়াই থাকিব পাৰিলোহেঁতেন। কিন্তু, তাতকৈ বেছি একো কৰিব নোৱাৰিম। সেয়ে, মই সৰুকৈ হ’লেও নিজেই কিবা এটা আৰম্ভ কৰিছোঁ। সময়ৰ লগে লগে উন্নতি কৰিব পাৰিম বুলি মই আশাবাদী।"

বৰ্তমান এই উদ্যোগৰ জৰিয়তে প্ৰতিদিনে ৪ ৰ পৰা ৫ হাজাৰ টকা উপাৰ্জন কৰিবলৈ সক্ষম হৈছে। তেওঁৰ উদ্যোগত প্ৰস্তুত হোৱা বিভিন্ন ডিজাইনৰ চেণ্ডেল গুৱাহাটী, বৰপেটা, বাক্সা আৰু নলবাৰী জিলাৰ বিভিন্ন প্ৰান্তলৈ পাইকাৰী দৰত যোগান ধৰা হয়। কঠোৰ পৰিশ্ৰম, অধ্যাৱসায় আৰু ইতিবাচক দৃষ্টিভংগীৰে সফলতাৰ শিখৰ বগাবলৈ চেষ্টা কৰা পাপু আলী এতিয়া অঞ্চলটোৰ নিবনুৱা যুৱক-যুৱতীৰ বাবে আদৰ্শ হৈ পৰিছে। ভৱিষ্যতে তেওঁ দিছপ'জেল ভোজপাত উদ্যোগ আৰু অন্য অত্যাৱশ্যকীয় সামগ্ৰীৰ উদ্যোগ গঢ়ি তোলাৰ আশা পুহি ৰাখিছে। এই যুৱকজনৰ এনে কৰ্মক বহু লোকে শুভেচ্ছাঁ জনাইছে।