বিদুশী গৌৰ
ভাৰতবৰ্ষৰ প্ৰশাসনিক কৰিড'ৰ, কূটনৈতিক অভিযান, বিশ্ববিদ্যালয়, সমাজ কল্যাণ বিভাগ আৰু ঐতিহ্য ৰক্ষা প্ৰতিষ্ঠানসমূহত বৰ্তমান এক নীৰৱ অথচ শক্তিশালী পৰিৱৰ্তন ঘটিছে। এই পৰিৱৰ্তনৰ গুৰি ধৰিছে একাংশ অসাধাৰণ মুছলমান মহিলাই, যিয়ে নিজৰ মেধা, অধ্যাৱসায় আৰু জনসেৱাৰ জৰিয়তে 'নেতৃত্ব'ৰ সংজ্ঞা নতুনকৈ নিৰূপণ কৰিছে।
গাঁৱৰ ধূলিয়ৰি পথ আৰু সাধাৰণ ঘৰৰ পৰা ওলাই আহি ৰাষ্ট্ৰীয় তথা আন্তঃৰাষ্ট্ৰীয় পৰ্যায়ত প্ৰভাৱ বিস্তাৰ কৰা এই মহিলাসকলৰ যাত্ৰাপথ সংগ্ৰাম আৰু শিক্ষাগ্ৰহণৰ এক অনুপম নিদৰ্শন। সমাজৰ প্ৰতি থকা গভীৰ দায়বদ্ধতাৰ বাবেই তেওঁলোকে পুৰণি ধ্যান-ধাৰণা আৰু বাধা-বিঘিনি নেওচি ভৱিষ্যত প্ৰজন্মৰ বাবে এক নতুন পথ প্ৰশস্ত কৰিছে। তেওঁলোকৰ এই কাহিনীবোৰ কেৱল ব্যক্তিগত সফলতাৰ কাহিনী নহয়; এইবোৰ হৈছে সুশাসন, শিক্ষা, কূটনীতি, সামাজিক ন্যায় আৰু সমাজৰ সৱলীকৰণৰ একোখন জীৱন্ত দস্তাবেজ।
আদিবা আনাম অছফাক আহমেদ শ্বেখ
আদিবা আনাম অছফাক আহমেদ শ্বেখ
মহাৰাষ্ট্ৰৰ য়াভাটমালৰ এখন সাধাৰণ ঘৰৰ পৰা ৰাজ্যখনৰ প্ৰথমগৰাকী মুছলমান মহিলা IAS বিষয়া হোৱালৈকে আদিবাৰ যাত্ৰা হৈছে প্ৰতিকূলতাক জয় কৰা এক অদম্য ইচ্ছাশক্তিৰ কাহিনী। এগৰাকী অট'ৰিস্কা চালকৰ কন্যা আদিবাই আৰ্থিক অনাটন, ধাৰাবাহিক বিফলতা আৰু সামাজিক কু-সংস্কাৰ নেওচি ২০২৪ চনৰ UPSC পৰীক্ষাত সৰ্বভাৰতীয় পৰ্যায়ত ১৪২ সংখ্যক স্থান লাভ কৰিবলৈ সক্ষম হয়। শিক্ষা আৰু কঠোৰ পৰিশ্ৰমৰ জৰিয়তে নিজৰ ভাগ্য সলনি কৰাৰ সপোন দেখা গ্ৰামাঞ্চল আৰু পিছপৰা সমাজৰ অগণন ছোৱালীৰ বাবে তেওঁৰ সফলতা আজি এক আশাস্বৰূপ।
ড০ অদিলা আব্দুল্লা
ড০ অদিলা আব্দুল্লা
তেওঁ কেৰালা প্ৰশাসনৰ এক সহানুভূতিশীল আৰু চিন্তাশীল মুখ। আই.এ.এছ.ত যোগদান কৰা মালাবাৰ অঞ্চলৰ প্ৰথমশাৰীৰ মুছলমান মহিলাসকলৰ ভিতৰত অন্যতম ড০ অদিলাই সমাজ কল্যাণ ব্যৱস্থা আৰু নগৰ প্ৰশাসন শক্তিশালী কৰাত গুৰুত্বপূৰ্ণ ভূমিকা পালন কৰিছে। কেৰালাৰ আৱৰ্জনা ব্যৱস্থাপনা প্ৰকল্পৰ কামেই হওক বা সামাজিক ন্যায় বিভাগৰ বিশেষ সচিব হিচাপেই হওক, তেওঁৰ নেতৃত্বত প্ৰকাশ পাইছে সহানুভূতি, দায়বদ্ধতা আৰু বিশেষকৈ সমাজৰ দুৰ্বল শ্ৰেণীৰ মানৱীয় মৰ্যাদাৰ প্ৰতি থকা গভীৰ প্ৰতিশ্ৰুতি।
ড০ ছাবিনা হাছান
ড০ ছাবিনা হাছান
অসমত ঐতিহ্য সংৰক্ষণ আৰু পুৰাতত্ত্বৰ ক্ষেত্ৰত এক শক্তিশালী সত্ত্বা হিচাপে আত্মপ্ৰকাশ কৰিছে ড০ ছাবিনা হাছানে। অসম চৰকাৰৰ পুৰাতত্ত্ব সঞ্চালকালয়ৰ উপ-সঞ্চালক হিচাপে চৰাইদেউ মৈদামক ইউনেস্ক'ৰ বিশ্ব ঐতিহ্য ক্ষেত্ৰৰ স্বীকৃতি প্ৰদান কৰাত তেওঁ মুখ্য ভূমিকা গ্ৰহণ কৰাৰ লগতে ডিমা হাছাওত গুৰুত্বপূৰ্ণ আৱিষ্কাৰ কৰিছে। মাতৃত্ব, শিক্ষা আৰু ক্ষেত্ৰভিত্তিক গৱেষণাৰ মাজত সুন্দৰ ভাৰসাম্য ৰক্ষা কৰি তেওঁ পুৰাতত্ত্বক সমাজৰ সাংস্কৃতিক শিপাৰ সৈতে সংযোগ কৰা এখন দলঙলৈ ৰূপান্তৰিত কৰিছে, যিয়ে নৱপ্ৰজন্মক ইতিহাস আৰু ঐতিহ্য সংৰক্ষণৰ মূল্য বুজিবলৈ অনুপ্ৰাণিত কৰিছে।
ড০ ছৈয়দ চেহৰিশ আছগৰ
ড০ ছৈয়দ চেহৰিশ আছগৰ
ড০ আছগৰৰ কৰ্মজীৱনত উৎকৃষ্টতা, দৃঢ়তা আৰু পৰিৱৰ্তনকামী জনসেৱাৰ প্ৰতিচ্ছবি দেখা যায়। বৃত্তিগতভাৱে এগৰাকী চিকিৎসক ড০ চেহৰিশে ২০১০ চনত জম্মু-কাশ্মীৰ প্ৰশাসনিক সেৱা পৰীক্ষাত শীৰ্ষস্থান দখল কৰিছিল আৰু পৰৱৰ্তী সময়ত ইউ.পি.এছ.চি.ত সৰ্বভাৰতীয় পৰ্যায়ত ১১৮ সংখ্যক স্থান লাভ কৰিছিল। বাডগামৰ প্ৰথমগৰাকী মহিলা উপায়ুক্ত হোৱাৰ পৰা আৰম্ভ কৰি আত্মসহায়ক গোটৰ জৰিয়তে পাঁচ লক্ষাধিক গ্ৰাম্য মহিলাক সৱলীকৰণ কৰা 'সাথ' কাৰ্যসূচীৰ দৰে পদক্ষেপৰ গুৰি ধৰালৈকে, তেওঁৰ প্ৰশাসনিক যাত্ৰা উদ্ভাৱন আৰু সামাজিক প্ৰভাৱেৰে ভৰপূৰ। অসামৰিক সেৱাত উৎকৃষ্টতাৰ বাবে লাভ কৰা প্ৰধানমন্ত্ৰীৰ বঁটাই সুশাসন আৰু জনকল্যাণৰ ক্ষেত্ৰত তেওঁৰ অৱদানক অধিক উজলাই তুলিছে।
নজহৎ তাবাচ্ছুম অব্ৰু
নজহৎ তাবাচ্ছুম অব্ৰু
তেওঁৰ জীৱন কাহিনী পাৰিবাৰিক মূল্যবোধ, শিক্ষা আৰু অধ্যাৱসায়ৰ শক্তিত গভীৰভাৱে শিপাই আছে। বিবাহ আৰু মাতৃত্বৰ বাবে শিক্ষাজীৱনৰ পৰা এটা দশকৰ বিৰতি লোৱাৰ পিছতো তেওঁ উভতি আহি KPSC পৰীক্ষাত তৃতীয় স্থান লাভ কৰে আৰু পৰৱৰ্তী সময়ত কৰ্ণাটকৰ অন্যতম অগ্ৰণী মুছলমান মহিলা আই.এ.এছ. বিষয়া হিচাপে পৰিগণিত হয়। বেংগালুৰু ৱান আৰু খাজানে-২ আদি ই-গভৰ্নেন্স প্ৰকল্পৰ লগতে মহিলা কল্যাণ, অনাময় আৰু স্বাস্থ্যসেৱাৰ ক্ষেত্ৰত লোৱা পদক্ষেপসমূহৰ জৰিয়তে তেওঁ প্ৰমাণ কৰিছে যে সহানুভূতিশীল নেতৃত্ব আৰু প্ৰশাসনিক উদ্ভাৱনে কেনেকৈ ৰাজহুৱা ব্যৱস্থা আৰু জনসাধাৰণৰ জীৱনধাৰণৰ মান উন্নত কৰিব পাৰে।
নাজমা মহম্মদ মল্লিক
নাজমা মহম্মদ মল্লিক
ভাৰতৰ প্ৰথমগৰাকী মুছলমান মহিলা IFS বিষয়া হিচাপে ইতিহাস ৰচনা কৰা নাজমা মহম্মদ মল্লিকে নীৰৱ অথচ প্ৰভাৱশালী সেৱাৰ জৰিয়তে এক সুকীয়া কূটনৈতিক কৰ্মজীৱন গঢ়ি তুলিছে। বৰ্তমান জাপান আৰু মাৰ্শ্বাল দ্বীপপুঞ্জত ভাৰতৰ ৰাষ্ট্ৰদূত হিচাপে কাৰ্যনিৰ্বাহ কৰা নাজমাই কূটনীতি, প্ৰযুক্তি আৰু অৰ্থনৈতিক সহযোগিতাৰ ক্ষেত্ৰত আন্তঃৰাষ্ট্ৰীয় সম্পৰ্ক শক্তিশালী কৰাৰ লগতে কেইবাখনো দেশত ভাৰতক প্ৰতিনিধিত্ব কৰিছে। গণতন্ত্ৰ, অৰ্থপূৰ্ণ আলোচনা আৰু অহিংসাৰ বাৰ্তাৰে মল্লিকে বিশ্ব দৰবাৰত ভাৰতৰ মূল্যবোধক অতি মৰ্যাদা আৰু সংযমেৰে তুলি ধৰিছে।
নাহিদা জম জম
নাহিদা জম জম
নাহিদা কৰ্ণাটকৰ এগৰাকী নিৰ্ভীক আৰু জনদৰদী প্ৰশাসক হিচাপে পৰিচিত। ৰাজহুৱা ভাষণ আৰু তৃণমূল পৰ্যায়ৰ সম্পৰ্কৰ জৰিয়তে তেওঁ ধাৰাবাহিকভাৱে মহিলা সৱলীকৰণ, শিক্ষা আৰু চিন্তাৰ স্বাধীনতাৰ পোষকতা কৰি আহিছে। গৰ্ভৱতী অৱস্থাতো ক'ভিড-১৯ মহামাৰীৰ সময়ত তেওঁ কৰা একাগ্ৰ ক্ষেত্ৰভিত্তিক সেৱাৰ বাবে তেওঁ সাধাৰণ ৰাইজৰ লগত নিবিড়ভাৱে জড়িত এগৰাকী সহানুভূতিশীল বিষয়া হিচাপে সমাদৰ লাভ কৰিছিল। ছাত্ৰ-ছাত্ৰী, মহিলা বা প্ৰান্তীয় সমাজ- সকলোৰে আগত তেওঁ ৰক্ষণশীল সামাজিক নীতি-নিয়মক প্ৰত্যাহ্বান জনোৱাৰ লগতে আত্মনিৰ্ভৰশীলতা আৰু সজাগতাৰ প্ৰসাৰত গুৰুত্ব আৰোপ কৰে।
ছৈয়দা ছৈয়দাইন হামিদ
ছৈয়দা ছৈয়দাইন হামিদ
তেওঁ ভাৰতত মহিলাৰ অধিকাৰ, শান্তি আৰু সামাজিক ন্যায়ৰ অন্যতম প্ৰভাৱশালী কণ্ঠ। এগৰাকী প্ৰসিদ্ধ লেখিকা, শিক্ষাবিদ, পৰিকল্পনা আয়োগৰ প্ৰাক্তন সদস্য আৰু ৰাষ্ট্ৰীয় মহিলা আয়োগৰ সদস্য হিচাপে তেওঁ মানৱ অধিকাৰ ৰক্ষা কৰা আৰু সম্প্ৰদায়সমূহৰ মাজত সম্প্ৰীতিৰ বাৰ্তা বিয়পোৱাৰ কামত নিজৰ জীৱন উছৰ্গা কৰিছে। 'মুছলমান ৱুমেনছ ফৰাম' আৰু 'ৱুমেনছ ইনিচিয়েটিভ ফৰ পিচ ইন চাউথ এছিয়া'ৰ প্ৰতিষ্ঠাপক হিচাপে তেওঁ ভাৰত আৰু পাকিস্তানৰ মাজত শান্তি প্ৰতিষ্ঠাৰ প্ৰচেষ্টাত নিৰলসভাৱে কাম কৰি প্ৰমাণ কৰিছে যে ৰাজহুৱা জীৱনত সাহস আৰু সহানুভূতি একেলগে বৰ্তি থাকিব পাৰে।
অধ্যাপক শ্ববিনা নিচাত ওমৰ
অধ্যাপক শ্ববিনা নিচাত ওমৰ
অধ্যাপক শ্ববিনা পশ্চিমবংগত শৈক্ষিক নেতৃত্ব আৰু মহিলা সৱলীকৰণৰ এক গতিশীল প্ৰতীক হৈ পৰিছে। শিক্ষা আৰু প্ৰশাসনৰ ক্ষেত্ৰত পঁচিশ বছৰতকৈও অধিক সময় পাৰ কৰা শ্ববিনাই সৰ্বাংগীণ শিক্ষা, ডিজিটেল সাক্ষৰতা আৰু লিংগ সজাগতাৰ পোষকতা কৰি নিজৰ নেতৃত্বৰে প্ৰতিষ্ঠানসমূহক ৰূপান্তৰিত কৰিছে। এগৰাকী শিক্ষাবিদ, বক্তা আৰু প্ৰশাসক হিচাপে তেওঁ যুৱপ্ৰজন্মক শিক্ষাক কেৱল এক বৃত্তি হিচাপে নহয়, সামাজিক পৰিৱৰ্তন আৰু আত্মনিৰ্ভৰশীলতাৰ এক শক্তিশালী আহিলা হিচাপে চাবলৈ অনুপ্ৰাণিত কৰি আহিছে।
জয়নাব ছৈয়দ
জয়নাব ছৈয়দ
জয়নাবৰ যাত্ৰাই অধ্যাৱসায়, অনুশাসন আৰু জনসেৱাৰ প্ৰতি থকা একাগ্ৰতাক প্ৰতিফলিত কৰে। অসামৰিক সেৱাৰ পৰীক্ষাত ধাৰাবাহিক বিফলতা অতিক্ৰম কৰি সৰ্বভাৰতীয় পৰ্যায়ত ১০৭ সংখ্যক স্থান লাভ কৰালৈকে, তেওঁ মানসিক দৃঢ়তা আৰু আত্মবিশ্বাসৰ শক্তি প্ৰমাণ কৰি দেখুৱাইছে। বৰ্তমান TRIFED-ত কাৰ্যনিৰ্বাহ কৰি তেওঁ সমগ্ৰ পূব ভাৰতৰ জনজাতীয় লোকসকলৰ জীৱিকা সৱল কৰাৰ লগতে শিল্পী আৰু আত্মসহায়ক গোটসমূহৰ বাবে অৰ্থনৈতিক সুযোগ সম্প্ৰসাৰণৰ কাম কৰি আছে। তেওঁৰ কাহিনীয়ে প্ৰমাণ কৰে যে দৃঢ়তা আৰু প্ৰতিশ্ৰুতিবদ্ধতাই কেনেকৈ বিফলতাক সমাজৰ বাবে অৰ্থপূৰ্ণ সেৱা আগবঢ়োৱাৰ সুযোগলৈ ৰূপান্তৰিত কৰিব পাৰে।
সামগ্ৰিকভাৱে, এই মহিলাসকলে আধুনিক ভাৰতৰ এক পৰিৱৰ্তনশীল অধ্যায়ক প্ৰতিনিধিত্ব কৰিছে। প্ৰশাসন, কূটনীতি, শিক্ষা, পুৰাতত্ত্ব, সমাজ কল্যাণ আৰু সক্ৰিয় সমাজকৰ্মৰ মাজেৰে তেওঁলোকৰ যাত্ৰাপথ ভিন ভিন হ'লেও শিক্ষা, সেৱা আৰু অধ্যাৱসায়ৰ জৰিয়তে সমাজৰ সৱলীকৰণৰ এক উমৈহতীয়া দৃষ্টিভংগীয়ে তেওঁলোকক একত্ৰিত কৰি ৰাখিছে। সমাজৰ পুৰণি বাধাসমূহ অতিক্ৰম কৰি ভৱিষ্যত প্ৰজন্মৰ বাবে নতুন স্থান সৃষ্টি কৰাৰ জৰিয়তে, তেওঁলোকে কেৱল প্ৰতিষ্ঠানসমূহক নতুন ৰূপ দিয়াই নহয়, বৰং সাম্প্ৰতিক ভাৰতবৰ্ষত 'নেতৃত্ব'ৰ প্ৰকৃত স্বৰূপ কেনেকুৱা হোৱা উচিত, তাৰো নতুন সংজ্ঞা দাঙি ধৰিছে।
