মহম্মদ আক্ৰাম / নতুন দিল্লী
বিহাৰৰ মতিহাৰীৰ ৰমনাৰ বাসিন্দা মহম্মদ ইব্ৰাহিমৰ প্ৰেৰণাদায়ক যাত্ৰাই কেৱল বিহাৰতে নহয় সমগ্ৰ ভাৰতবৰ্ষৰ যুৱক-যুৱতীসকলক প্ৰেৰণা যোগাইছে। পূব চম্পাৰণৰ এক সাধাৰণ পৰিয়ালত জন্ম গ্ৰহণ কৰাৰ পৰা ডুবাইত স্বীকৃতি অৰ্জন কৰালৈকে তেওঁৰ প্ৰেৰণাদায়ক কাহিনীয়ে কঠোৰ পৰিশ্ৰম আৰু স্পষ্ট উদ্দেশ্যবোধৰ প্ৰতিফলন ঘটায়।
শেহতীয়াকৈ ইব্ৰাহিমক অক্সফৰ্ড বিশ্ববিদ্যালয়ে শ্ৰেষ্ঠ ভ্ৰমণ আৰু প্ৰব্ৰজনকাৰী সেৱা বঁটা (Best Travel and Immigration Services Award)ৰে সন্মানিত কৰিছে। তেওঁৰ কেৰিয়াৰৰ বাবে এয়া এক ডাঙৰ কৃতিত্ব।
মহম্মদ ইব্ৰাহিম এগৰাকী বিদেশী প্ৰতিনিধি মহিলাৰ সৈতে
ইব্ৰাহিম কেৱল এজন সফল উদ্যোগী নহয়। তেওঁ এজন সমাজকৰ্মী, শিক্ষাবিদ আৰু মেণ্টৰ হিচাপেও শ শ যুৱক-যুৱতীক বিভিন্ন ক্ষেত্ৰত চাকৰি বিচৰাৰ ক্ষেত্ৰত সহায় কৰিছে। 'আৱাজ-দ্য ভইচ'ৰ সৈতে হোৱা এক বাৰ্তালাপাত তেওঁ কয়, "মই ব্যক্তিগতভাৱে স্নাতক ডিগ্ৰী লাভ কৰালৈকে কেইবাজনো ছাত্ৰ-ছাত্ৰীৰ শিক্ষাৰ বাবে ধন আগবঢ়াইছো, যিসকলৰ সামৰ্থ্য নাছিল। সমাজক কিবা এটা ঘূৰাই দিয়াটো মোৰ কৰ্তব্য।"
আবুধাবিলৈ প্ৰধানমন্ত্ৰী নৰেন্দ্ৰ মোদীৰ প্ৰথম আনুষ্ঠানিক ভ্ৰমণৰ সময়তো তেওঁৰ সমাজ আৰু পেছাদাৰী উৎকৰ্ষতাৰ প্ৰতি দায়বদ্ধতাক স্বীকৃতি দিয়া হয়, য’ত ইব্ৰাহিমে তেওঁক ৰাষ্ট্ৰপতি ভৱনত আদৰণি জনোৱাৰ সৌভাগ্য লাভ কৰে। বহু সাফল্যৰ উপৰিও ভ্ৰমণ আৰু অভিবাসন সেৱাৰ ক্ষেত্ৰত তেওঁৰ উল্লেখযোগ্য সফলতাৰ বাবে মহম্মদ ইব্ৰাহিমক ডুবাইৰ ফেডাৰেচন অৱ ইকনমিক ডেভেলপমেণ্ট এছ’চিয়েশ্যনে (Dubai’s Federation of Economic Development Association) সন্মানিত কৰে।
উল্লেখ্য যে, আল-হিৰা পাব্লিক স্কুলৰ পৰা তেওঁৰ শৈক্ষিক যাত্ৰা আৰম্ভ হৈছিল, তাৰ পিছত জামিয়া ইমাম ইবনে টাইমিয়াহ (Jamia Imam Ibn Taymiyyah)ত তেওঁ ধৰ্ম আৰু সমাজ অধ্যয়ন কৰে। মতিহাৰীৰ গোপাল শ্বাহ হাইস্কুলত মেট্ৰিক পৰীক্ষাত উত্তীৰ্ণ হৈ তেওঁ পৰৱৰ্তী সময়ত উচ্চ পঢ়াৰ বাবে কলকাতালৈ গুচি যায়। তাতে তেওঁ সুভাষ বসু ইনষ্টিটিউট অৱ হোটেল মেনেজমেণ্টৰ পৰা হোটেল মেনেজমেণ্টৰ ডিগ্ৰী লাভ কৰে, আৰু শেষত ছিকিম মণিপাল বিশ্ববিদ্যালয়ৰ পৰা এম বি এ সম্পূৰ্ণ কৰে।
মহম্মদ ইব্ৰাহিম ইউ এ ই'ৰ কেইগৰাকীমান প্ৰতিনিধিৰ সৈতে
২০০৯ চনত তেওঁ ভাৰত স্কাউটৰ জৰিয়তে ড০ এ পি জে আব্দুল কালামৰ পৰা ৰাষ্ট্ৰপতি বঁটা লাভ কৰে, যিটো তেওঁৰ প্ৰাৰম্ভিক জীৱনৰ এক গৌৰৱময় মুহূৰ্ত। ইব্ৰাহিমে বেংগালুৰুৰ দ্য লীলা পেলেচত অধিনায়ক হিচাপে নিজৰ পেছাদাৰী কেৰিয়াৰ আৰম্ভ কৰিছিল আৰু তাৰ কিছু সময়ৰ পিছতে ডুবাইৰ প্ৰখ্যাত সাত তাৰকাযুক্ত হোটেল বুৰ্জ আল আৰবত তত্বাৱধায়ক হিচাপে যোগদান কৰিছিল। ইয়াৰ পৰাই তেওঁৰ সফল আন্তঃৰাষ্ট্ৰীয় কেৰিয়াৰৰ আৰম্ভণি হয়।
আনক উন্নীত কৰাৰ গভীৰ ইচ্ছাৰে ইব্ৰাহিমে ভাৰত, নেপাল আৰু বাংলাদেশৰ শ শ যুৱক-যুৱতীক উপসাগৰীয় অঞ্চলত ৱেইটাৰ, প্লাম্বাৰ, ইলেক্ট্ৰিচিয়ান, চাফাই কৰ্মী আৰু ছুপাৰভাইজাৰৰ দৰে চাকৰি নিশ্চিত কৰাত সহায় কৰিছিল।
আবুধাবিৰ ৰাজকীয় পৰিয়ালৰ এজন সদস্যৰ বাবে তেওঁ কোম্পানী আৰম্ভ কৰিবলৈ প্ৰথমটো সুযোগ পাইছিল বুলি ইব্ৰাহিমে প্ৰকাশ কৰে। জেনেৰেল মেনেজাৰৰ এটা দলৰ সমান্তৰালভাৱে মাত্ৰ দুবছৰতে তেওঁৰ ব্যৱসায় দ্ৰুতগতিত বৃদ্ধি পালে। লণ্ডনত তেওঁৰ গুৰু শ্বেখৰ অকাল মৃত্যুৰ পিছত ইব্ৰাহিমে নিজৰ যাত্ৰা অব্যাহত ৰাখি নিজৰ উদ্যোগ প্ৰতিষ্ঠা কৰিবলৈ আগবাঢ়ি যায়, যিটো আজি তেওঁৰ কঠোৰ পৰিশ্ৰম, দৃঢ়তা আৰু দৃষ্টিভংগীৰ প্ৰতীক হিচাপে পৰিচিত হৈছে।
মহম্মদ ইব্ৰাহিমে পৰিয়ালৰ সৈতে কটোৱা কিছু মূহুৰ্ত
আজি মহম্মদ ইব্ৰাহিমৰ ব্যৱসায়িক গোটত তিনিটা সমৃদ্ধিশালী কোম্পানী অন্তৰ্ভুক্ত কৰা হৈছে। সেইবোৰ হৈছেঃ প্ৰাইম আৰবিয়া গ্ল'বেল চাৰ্ভিচেছ (Prime Arabia Global Services), প্ৰাইম আৰবিয়া চি.টি সেৱা (Prime Arabia C.T Services), আবান প্ৰপাৰ্টিজ মেনেজমেণ্ট এল এল চি (Aban Properties Management LLC)।
এই কোম্পানীসমূহে ফেচিলিটী মেনেজমেণ্টৰ সৈতে জড়িত আৰু হোটেল পৰিচালনা, আই টি আই ট্ৰেড, আৰু কাৰিকৰী দক্ষতাৰ প্ৰশিক্ষণো প্ৰদান কৰে। ইয়াৰ জৰিয়তে শ শ যুৱক-যুৱতীয়ে এতিয়া পঞ্চ-তাৰকাযুক্ত হোটেল আৰু ডাঙৰ উদ্যোগত কৰ্মৰত হৈ এক উজ্জ্বল ভৱিষ্যতৰ সন্ধান লাভ কৰিছে।
উল্লেখ্য যে, ডুবাইত থাকিও ইব্ৰাহিম বিহাৰৰ শিপাৰ সৈতে গভীৰভাৱে জড়িত হৈ আছে। বিগত ১৫ বছৰে তেওঁ ড০ এ পি জে আব্দুল কালাম বিজ্ঞান ক্লাবৰ জৰিয়তে পিছপৰা ছাত্ৰ-ছাত্ৰীক সহায় কৰি আহিছে, শৈক্ষিক সামগ্ৰী আৰু শিক্ষাৰ দিশত পথ প্ৰদৰ্শন আগবঢ়াই আহিছে। তদুপৰি, তেওঁ মতিহাৰীৰ ৰমনাত বিনামূলীয়া পুথিভঁৰাল স্থাপন কৰি ছাত্ৰ-ছাত্ৰীৰ পঢ়া-শুনাৰ বাবে এক শান্তিপূৰ্ণ পৰিৱেশৰ সৃষ্টি কৰিছে।
পৰিয়ালৰ সৈতে মহম্মদ ইব্ৰাহিম
বৰ্তমান তেওঁ পূব চম্পাৰণৰ চাকীয়াত বিনামূলীয়া প্ৰশিক্ষক ক্লাছ চলাই আছে আৰু এই কেন্দ্ৰসমূহ সমগ্ৰ জিলাতে সম্প্ৰসাৰণ কৰাৰ পৰিকল্পনা কৰিছে। শেহতীয়াকৈ তেওঁ আই আই টিৰ প্ৰৱেশ পৰীক্ষাত উত্তীৰ্ণ হোৱা অঞ্চলটোৰ ছাত্ৰ অভয় কুমাৰক আৰ্থিক সাহায্য প্ৰদান কৰাৰ লগতে তেওঁৰ এই কৃতিত্বৰ বাবে তেওঁক সন্মান জনায়।
যুৱক-যুৱতীসকললৈ ইব্ৰাহিমৰ বাৰ্তা অতি সহজ আৰু শক্তিশালী। তেওঁ কয়, "জীৱনত সফলতা বিচাৰিলে সময়ক মূল্য দিবলৈ আৰম্ভ কৰক। এটা কঠোৰ অনুশাসন মানি চলক, আৰু কঠোৰ পৰিশ্ৰমক আপোনাৰ জীৱনৰ নীতি হ'বলৈ দিয়ক।" তেওঁৰ মতে ডুবাই ভাৰতীয়ৰ বাবে সুযোগেৰে ভৰপূৰ। আয়কৰ নথকাৰ বাবে ইয়াত সামান্য দৰমহাৰ ফলতো ভাল সঞ্চয় হ’ব পাৰে। তেওঁ দক্ষ আৰু নিষ্ঠাবান ভাৰতীয়সকলক গোলকীয় সুযোগসমূহ আত্মবিশ্বাসেৰে অন্বেষণ কৰিবলৈ উৎসাহিত কৰে।
একে সময়তে তেওঁ অনুভৱ কৰে যে বিহাৰত প্ৰচুৰ প্ৰতিভা আছে, কিন্তু উপযুক্ত পথ প্ৰদৰ্শন আৰু মেণ্টৰশ্বিপৰ অভাৱ পৰিলক্ষিত হৈছে। তেওঁৰ দৃষ্টিভংগী হৈছে চম্পাৰণক কাৰিকৰী শিক্ষা আৰু দক্ষতা বিকাশৰ কেন্দ্ৰ হিচাপে গঢ়ি তোলা, স্থানীয় যুৱক-যুৱতীসকলক আন্তঃৰাষ্ট্ৰীয় মঞ্চত উজলি উঠাত সহায় কৰা। মহম্মদ ইব্ৰাহিমৰ জীৱন যাত্ৰা এটা উজ্জ্বল উদাহৰণ, যিয়ে দেখুৱাইছে যে কেনেকৈ সৰু চহৰৰ এজন যুৱকে গোলকীয় সফলতা অৰ্জন কৰাৰ লগতে আনকো উৎসাহিত কৰিব পাৰে।
ইউ এ ই ত অনুষ্ঠিত এক অনুষ্ঠানত মহম্মদ ইব্ৰাহিম
শিক্ষা আৰু সমাজ সেৱাৰ প্ৰতি তেওঁৰ গভীৰ দায়বদ্ধতাই প্ৰমাণ কৰে যে বিদেশত থাকিও মানুহে নিজৰ গৃহভূমি, সমাজ আৰু জাতিৰ বিকাশত অৰ্থপূৰ্ণ প্ৰভাৱ পেলাব পাৰে। সদায় শিকিবলৈ আগ্ৰহী আৰু দান কৰি ভাল পোৱা ইব্ৰাহিমে দিনক দিনে নিজকে উন্নত কৰি আহিছে আৰু এখন উন্নত পৃথিৱী গঢ়ি তুলিছে।
.webp)
