শতানন্দ ভট্টাচাৰ্য, পুণে
পুনেৰ পিম্পৰি চিঞ্চৱাড় বিশ্ববিদ্যালয়ে (PCU) উত্তৰ-পূৰ্বাঞ্চলৰ আঠখন ৰাজ্যৰ প্ৰতিখনৰ পৰা এগৰাকীকৈ মেধাৱী ছাত্ৰ-ছাত্ৰীলৈ এশ শতাংশ টিউচন মাচুল ৰেহাই দিয়াৰ কথা ঘোষণা কৰিছে। ইয়াৰ জৰিয়তে এই অঞ্চলৰ প্ৰতিভাশালী যুৱক-যুৱতীসকলৰ বাবে উচ্চ শিক্ষা গ্ৰহণৰ দুৱাৰ মুকলি হৈছে।
অসম, অৰুণাচল প্ৰদেশ, মণিপুৰ, মেঘালয়, মিজোৰাম, নাগালেণ্ড, ত্ৰিপুৰা আৰু ছিকিমৰ ছাত্ৰ-ছাত্ৰীসকলে বিশ্ববিদ্যালয়ৰ নিৰ্ধাৰিত যোগ্যতাৰ ভিত্তিত এই বৃত্তিৰ বাবে আবেদন কৰিব পাৰিব। ইয়াৰ বাবে প্ৰাৰ্থীয়ে তেওঁলোকৰ অৰ্হতা পৰীক্ষাত ন্যূনতম ৮৫ শতাংশ নম্বৰ লাভ কৰিব লাগিব। উত্তৰ-পূবৰ প্ৰতিখন ৰাজ্যৰ পৰা এগৰাকীকৈ মেধাৱী ছাত্ৰ-ছাত্ৰীয়ে সম্পূৰ্ণ টিউচন মাচুল ৰেহাই লাভ কৰিব; লগতে বিশ্ববিদ্যালয়খনে অত্যাধুনিক প্ৰযুক্তিৰ গৱেষণাগাৰ আৰু উদ্যোগমুখী শিক্ষা প্ৰদান কৰিব।
পিম্পৰি চিঞ্চৱাড় এডুকেচন ট্ৰাষ্ট (PCET)ৰ এই পদক্ষেপৰ লক্ষ্য হৈছে যোগ্য শিক্ষাৰ্থীসকলৰ বাবে মানসন্মত উচ্চ শিক্ষাক অধিক সহজলভ্য কৰি তোলা। ইয়াৰ জৰিয়তে তেওঁলোকক এক সফল কেৰিয়াৰ গঢ়ি তুলিবলৈ প্ৰয়োজনীয় দক্ষতা প্ৰদান কৰা হ'ব, যাতে তেওঁলোকে নিজ নিজ ৰাজ্যৰ বিকাশত গুৰুত্বপূৰ্ণ অৱদান আগবঢ়াব পাৰে।
উত্তৰ-পূবৰ শিক্ষাৰ্থীসকলৰ বাবে আগবঢ়োৱা এই আঠটা বিশেষ বৃত্তিৰ উপৰি, বিশ্ববিদ্যালয়ে শৈক্ষিক প্ৰদৰ্শনৰ ভিত্তিত ৮০ শতাংশলৈকে মেধা-ভিত্তিক টিউচন মাচুল ৰেহাইৰ সুবিধাও প্ৰদান কৰে। অন্যান্য বৃত্তিৰ শিতানসমূহৰ ভিতৰত প্ৰয়োজন-ভিত্তিক সাহায্য, ক্ৰীড়া, প্ৰতিভা-ভিত্তিক বঁটা, স্নাতকোত্তৰ অধ্যয়ন আৰু PhD গৱেষণা আদি অন্তৰ্ভুক্ত, যিবোৰ নিৰ্ধাৰিত চৰ্তসাপেক্ষে প্ৰদান কৰা হয়।
বিশ্ববিদ্যালয়খনৰ এই প্ৰয়াসৰ উদ্দেশ্য হৈছে আৰ্থিক সাহায্যৰ লগতে প্ৰযুক্তিগত জ্ঞান আৰু কেৰিয়াৰমুখী শিক্ষাৰ সমন্বয় ঘটোৱা। ইয়াৰ লগতে দেশৰ বিভিন্ন প্ৰান্তৰ শিক্ষাৰ্থীসকলৰ মাজত সাংস্কৃতিক বিনিময় আৰু ৰাষ্ট্ৰীয় সংহতিক উৎসাহিত কৰাও ইয়াৰ অন্যতম লক্ষ্য।
পিম্পৰি চিঞ্চৱাড় এডুকেচন ট্ৰাষ্ট (PCET)ৰ কাৰ্যবাহী সঞ্চালক ড০ গিৰীশ দেশায়ে কয়, “শিক্ষাই হৈছে জীৱনজোৰা সফলতা আৰু সৱলীকৰণৰ মূল চাবিকাঠি। যেতিয়া আমি এজন ব্যক্তিক শিক্ষিত কৰোঁ, তেতিয়া আমি সমগ্ৰ সম্প্ৰদায় আৰু অঞ্চলটোৰ প্ৰগতিৰ ক্ষেত্ৰত বৰঙণি যোগাওঁ।”
তেওঁ লগতে কয় যে এই পদক্ষেপে উত্তৰ-পূব ভাৰতৰ ছাত্ৰ-ছাত্ৰীসকলক গুণগত শিক্ষা, আধুনিক প্ৰযুক্তি আৰু উদ্যোগমুখী শিক্ষণৰ সুবিধা প্ৰদান কৰিব, যাৰ ফলত তেওঁলোকে কৰ্মসংস্থাপনৰ বহল সুযোগসমূহ অন্বেষণ কৰিবলৈ সক্ষম হ'ব।
বিশ্ববিদ্যালয়খনে প্ৰযুক্তি-কেন্দ্ৰিক শিক্ষণ পৰিৱেশৰ ওপৰত বিশেষ গুৰুত্ব দিছে। ২০২৬ চনৰ ২৮ ছেপ্টেম্বৰত মুকলি কৰা তেওঁলোকৰ 'চেণ্টাৰ অৱ এক্সেলেন্স ইন ইণ্ডাষ্ট্ৰী ৫.০ এণ্ড ফিউচাৰ টেকন'লজি'ত ১৬ টা অত্যাধুনিক পৰীক্ষাগাৰ আছে।
এই সুবিধাসমূহে কৃত্ৰিম বুদ্ধিমত্তা আৰু মেচিন লাৰ্নিং, ইণ্ডাষ্ট্ৰিয়েল ৰবটিক্স, অটোমেচন, ইলেক্ট্ৰিক বাহনৰ প্ৰযুক্তি, ড্ৰোণ প্ৰযুক্তি, ছেমিকণ্ডাক্টৰ প্ৰযুক্তি, ডিজিটেল টুইনছ আৰু স্মাৰ্ট মেনুফেকচাৰিঙৰ দৰে নৱাগত ক্ষেত্ৰসমূহক সামৰি লৈছে। ইয়াৰে তেৰটা পৰীক্ষাগাৰ 'ডিজিটেক ৰবটিক্স ইণ্ডিয়া প্ৰাইভেট লিমিটেড'ৰ সহযোগত স্থাপন কৰা হৈছে।
ইয়াৰ উপৰি, বিশ্ববিদ্যালয়খনত চি-ডেক পুনেৰ সহযোগত বিকশিত এটা হাই-পাৰফৰমেন্স কম্পিউটিং পৰীক্ষাগাৰ, AMD-ৰ সহযোগত স্থাপিত এটা এআই আৰু এডাপটিভ কম্পিউটিং পৰীক্ষাগাৰ, আৰু পাই-স্কোৱেৰ টেকন'লজিছ তথা ব্লেকবেৰী কিউএনএক্সৰ সহযোগত এটা QNX RTOS Centre of Excellence আছে।
পুনেৰ প্ৰধান ঔদ্যোগিক আৰু প্ৰযুক্তি খণ্ডসমূহৰ ওচৰত অৱস্থিত হোৱাৰ বাবে, এই বিশ্ববিদ্যালয়ে শিক্ষাৰ্থীসকলক ভৱিষ্যতৰ কৰ্মসংস্থাপনৰ বাবে প্ৰস্তুত কৰি তুলিবলৈ ব্যৱহাৰিক শিক্ষা, উদ্যোগৰ সৈতে জড়িত প্ৰকল্প, গৱেষণা আৰু দক্ষতা বিকাশৰ ওপৰত জোৰ দিয়ে।
বৃত্তি সম্পৰ্কীয় সকলো সুবিধা বিশ্ববিদ্যালয়ৰ অৰ্হতাৰ চৰ্ত, আসনৰ উপলব্ধতা আৰু নিৰ্দেশাৱলীৰ ওপৰত নিৰ্ভৰশীল। ছাত্ৰ-ছাত্ৰীসকলে একে সময়তে মাত্ৰ এটাহে বৃত্তি গ্ৰহণ কৰিব পাৰিব আৰু পৰৱৰ্তী সময়ত এই বৃত্তি বাহাল থাকিবলৈ তেওঁলোকে নিৰ্ধাৰিত শৈক্ষিক মানদণ্ড বজাই ৰাখিব লাগিব।
