এই স্থানলৈ অহা শিশুসকলৰ উৎসাহ দেখিলেই মনটো উৎফুল্লিত হৈ পৰে। পুথিভঁৰালটো কেৱল জ্ঞানৰ উৎস নহয়, ই শিশুসকলৰ মাজত আত্মবিশ্বাস, আগ্ৰহ আৰু দেশ সেৱাৰ প্ৰতি আকৰ্ষণো জগাই তুলিছে। গাঁওখনৰ বহু শিশুৱে এতিয়া ডাঙৰ সপোন দেখিবলৈ লৈছে। তেওঁলোকে ভৱিষ্যতে নিজৰ গাঁও আৰু দেশৰ বাবে কিবা এটা মহান কাম কৰিবলৈ আকাংক্ষা কৰিছে। সীমিত সম্পদ থকা সত্ত্বেও এই কাৰ্যসূচীয়ে প্ৰমাণ কৰিছে যে, প্ৰকৃত নিষ্ঠা আৰু সামূহিক প্ৰচেষ্টাৰে বৃহৎ সপোন বাস্তৱায়িত কৰিব পাৰি।
বৰ্তমান এই পুথিভঁৰালটো মছজিদৰ ওপৰৰ মহলাত প্ৰায় ৩০x৩০ ফুট জোখৰ এটি হলত চলি আছে। কাঠ আৰু প্লাইউড ব্যৱহাৰ কৰি শিশুসকলৰ পঢ়া-শুনাৰ বাবে শান্তিপূৰ্ণ পৰিৱেশৰ সৃষ্টি কৰা হৈছে। ইয়াত এক অনুশাসিত অধ্যয়নৰ পৰিৱেশ স্পষ্টভাৱে দেখা যায়। পুথিভঁৰালটোত প্ৰায় ৩৪ জন ছাত্ৰ-ছাত্ৰীৰ বাবে বহিব পৰা ব্যৱস্থা আছে। ইয়াত দৈনিক প্ৰায় ১৮ জন ছাত্ৰ-ছাত্ৰীয়ে অধ্যয়ন কৰে। ২৪ ঘণ্টাই এই পুথিভঁৰালটো খোলা থাকে, যাৰ ফলত ছাত্ৰ-ছাত্ৰীসকলে তেওঁলোকৰ সুবিধাজনক যিকোনো সময়তে ইয়ালৈ আহি অধ্যয়ন কৰিব পাৰে।
বিশেষভাৱে প্ৰতিযোগিতামূলক পৰীক্ষাৰ বাবে প্ৰস্তুতি চলোৱা ছাত্ৰ-ছাত্ৰীসকলৰ বাবে এই পুথিভঁৰালটো নিৰ্মাণ কৰা হৈছে। ইয়াত ৰাজস্থান আৰু ভাৰতৰ বিষয়ে সাধাৰণ জ্ঞান, প্ৰতিযোগিতামূলক পৰীক্ষাৰ সৈতে জড়িত কিতাপ, মানসিক ক্ষমতা বৃদ্ধি কৰা সামগ্ৰী আদি সন্নিবিষ্ট কৰা হৈছে। ইয়াৰ লগতে বিনামূলীয়া ৱাই-ফাইৰ সুবিধাও প্ৰদান কৰা হৈছে, যাৰ ফলত শিশুসকলে অনলাইন বক্তৃতা আৰু অধ্যয়ন সামগ্ৰীৰ সুবিধা লাভ কৰিব পাৰে। বহু ছাত্ৰ-ছাত্ৰীয়ে নিজাকৈ কিতাপ লৈ আহি ঘণ্টাৰ পিছত ঘণ্টা বহি অধ্যয়ন কৰে। লাহে লাহে এই ঠাইডোখৰ গাঁৱৰ উমৈহতীয়া এক অধ্যয়নৰ কেন্দ্ৰলৈ ৰূপান্তৰিত হৈ পৰিছে।
মছজিদৰ চৌহদত গঢ়ি উঠা পুথিভঁৰালত শিক্ষাৰ্থীয়ে অধ্যয়ন কৰাৰ এক দৃশ্য
এই পুথিভঁৰালটো আৰম্ভ কৰাটো কোনো সহজ কাম নাছিল। সমিতিৰ সদস্য তথা শিক্ষক মহম্মদ ইকবালে কয় যে, প্ৰথম পদক্ষেপ আছিল গাঁওখনৰ শিক্ষিত আৰু সচেতন লোকসকলক একত্ৰিত কৰি এখন সভা অনুষ্ঠিত কৰা। এই বৈঠকত সিদ্ধান্ত লোৱা হৈছিল যে, শিশুসকলক সঠিক দিশত পথ প্ৰদৰ্শন কৰিবলৈ অনুকূল অধ্যয়ন পৰিৱেশ সৃষ্টি কৰাটো অতি প্ৰয়োজনীয়।
ইকবালে গাঁওখনত সজাগতা বৃদ্ধিৰ কাম অব্যাহত ৰাখিছিল। তেওঁ মছজিদ, চৌহদ আৰু সভা-সমিতিত লোকসকলক সাক্ষাৎ কৰি শিশুসকলৰ শিক্ষাৰ গুৰুত্বৰ বিষয়ে বুজাইছিল। এই পদক্ষেপৰ বিষয়েও নামাজৰ পিছত, প্লেটফৰ্মত, চাহৰ দোকানত আলোচনা কৰা হৈছিল। লাহে লাহে মানুহবোৰে বুজিবলৈ ধৰিলে যে, যদি গাঁৱত অনুকূল অধ্যয়ন পৰিৱেশ সৃষ্টি কৰা হয়, তেন্তে শিশুৰ ভৱিষ্যত উন্নত হ’ব পাৰে।
পুথিভঁৰালটো নিৰ্মাণৰ বাবে জনসাধাৰণৰ পৰা সহযোগিতা বিচৰা হৈছিল। গাঁৱৰ মানুহে নিজৰ সামৰ্থ্য অনুসৰি যিমান পাৰে অৰিহণা যোগাইছিল। কোনোৱে ৫০০ টকা, কোনোবাই ১০০০ বা ২০০০ টকা, আনকি কোনোৱে ৫০০০ টকা পৰ্যন্ত বৰঙণি আগবঢ়াইছিল। এই সামূহিক সহযোগিতাৰ জৰিয়তে প্ৰায় ২.৫ লাখ টকা সংগ্ৰহ কৰা হৈছিল।
মছজিদৰ চৌহদত গঢ়ি উঠা পুথিভঁৰালটিৰ এক দৃশ্য
এই পৰিমাণৰ ধনেৰে হলটো পঢ়া-শুনা কৰাৰ উপযোগী কৰি নিৰ্মাণ কৰা হৈছে। চকী-মেজৰ ব্যৱস্থা কৰা হৈছিল, মজিয়াত কাৰ্পেট পাৰি দিয়া হৈছিল, ফেন লগোৱা হৈছিল, বৈদ্যুৎ সংযোগ কৰা হৈছিল। প্ৰতিখন মেজৰ ওচৰত বৈদ্যুতিক বৰ্ড লগোৱা হৈছিল। ইনভাৰ্টাৰ, কম্পিউটাৰ, টিভি, চিচিটিভি কেমেৰা স্থাপন কৰা হৈছিল। ইণ্টাৰনেটৰ সুবিধাৰ বাবেও ৱাই-ফাইৰো ব্যৱস্থা কৰা হৈছিল। মছজিদ কমিটীয়েও ইয়াৰ বাবে বৰঙণি আগবঢ়াইছিল আৰু পুথিভঁৰালটোৰ পৰা তেওঁলোকে কোনো ভাড়া আদায় লোৱা নাছিল।
পুথিভঁৰালটোৰ পৰিচালনাৰ বাবে নামমাত্ৰ মাচুল লোৱা হৈছে। ব’ৰ্ডৰ ছাত্ৰ-ছাত্ৰীৰ পৰা ১০০ টকা আৰু প্ৰতিযোগিতামূলক পৰীক্ষাৰ বাবে প্ৰস্তুতি চলোৱাৰ পৰা প্ৰতিমাহে ২০০ টকা লোৱা হয়। কমিটীয়ে বিশ্বাস কৰে যে, অলপ মাচুল দি শিশুৰ দায়িত্ব আৰু নিয়মীয়াকৰণ বৃদ্ধি কৰিব পাৰি। ইয়াত আৰ্থিকভাৱে দুৰ্বল শিশুসকলকো বিনামূলীয়া শিক্ষা প্ৰদান কৰা হয়।
পুথিভঁৰালটো মুকলি কৰা বেছি দিন হোৱা নাই যদিও ইতিমধ্যে ইয়াৰ ফলাফল দেখিবলৈ পোৱা গৈছে। শেহতীয়াকৈ এজন ছাত্ৰই চতুৰ্থ বৰ্গৰ চৰকাৰী চাকৰি লাভ কৰিছে। কমিটীয়ে কয় যে, এয়া মাত্ৰ আৰম্ভণিহে। যদি শিশুসকলে এনেধৰণৰ ইতিবাচক শিক্ষাৰ পৰিৱেশ লাভ কৰি থাকে, তেন্তে ভৱিষ্যতে বহু ছাত্ৰ-ছাত্ৰীয়ে ডাঙৰ ডাঙৰ প্ৰতিযোগিতামূলক পৰীক্ষাতো সফলতা লাভ কৰিবলৈ সক্ষম হ’ব।
মছজিদৰ চৌহদত গঢ়ি উঠা পুথিভঁৰালৰ ভিতৰত এক দৃশ্য
এই পদক্ষেপক আৰু অধিক শক্তিশালী কৰি তোলাৰ বাবে গাঁওখনৰ এজন মাদ্ৰাছা শিক্ষক গুল মহম্মদে পুথিভঁৰালটোৰ বাবে প্ৰায় ২০০ গজ ভূমি দান কৰাৰ কথা ঘোষণা কৰে। ভূমি চিনাক্ত কৰা হৈছে। ট্ৰাষ্টৰ পঞ্জীয়ন সম্পূৰ্ণ হোৱাৰ পিছত এই ভূমিত এটা সুকীয়া আৰু উন্নত পুথিভঁৰাল নিৰ্মাণৰ পৰিকল্পনা কৰা হৈছে।
পুথিভঁৰালটো পৰিচালনাৰ বাবে গঠন কৰা হৈছে ১২ জনীয়া এখন সমিতি। সমিতিখনৰ সভাপতি হৈছে মাষ্টৰ শ্বাফি মহম্মদ, সম্পাদক ড° ৱাজিৰ মহম্মদ আৰু কোষাধ্যক্ষ হৈছে ড° আব্দুল কাদিৰ। ইয়াৰ উপৰিও কেইবাজনো শিক্ষক, চিকিৎসক, আৰু অন্যান্য সচেতন ব্যক্তিয়ে এই পদক্ষেপক সমৰ্থন কৰি আছে। ভৱিষ্যতে ইয়াক ডিজিটেল লাইব্ৰেৰীলৈ ৰূপান্তৰিত কৰাৰ পৰিকল্পনা কৰা হৈছে। ছাত্ৰ-ছাত্ৰীসকলক অনলাইন অধ্যয়ন সামগ্ৰী আৰু ই-লাৰ্নিঙৰ সুবিধা প্ৰদান কৰা হ’ব। প্ৰতিযোগিতামূলক পৰীক্ষাৰ বাবেও অফলাইন কোচিং ক্লাছ আৰম্ভ কৰাৰ পৰিকল্পনা কৰা হৈছে।
উণ্টড়া গাঁৱত প্ৰায় ১২০০ ঘৰ লোকে বসবাস আছে। এইখন হৈছে এখন মুছলমান সংখ্যাগৰিষ্ঠ গাঁও। অৱশ্যে ইয়াত আৰম্ভ হোৱা এই শৈক্ষিক পদক্ষেপ সমগ্ৰ অঞ্চলটোৰ বাবে এক প্ৰেৰণা হৈ পৰিছে। গাঁওখনৰ যুৱক-যুৱতীসকলে কয় যে, আগতে তেওঁলোকে পঢ়া-শুনাৰ বাবে চহৰলৈ যাবলগীয়া হৈছিল যদিও এতিয়া তেওঁলোকে গাঁওখনৰেই এনে এক স্থান লাভ কৰিছে, য’ত তেওঁলোকে শান্তিপূৰ্ণভাৱে নিজৰ ভৱিষ্যতৰ বাবে প্ৰস্তুতি চলাব পাৰে।
এটা সাধাৰণ মছজিদৰ হলৰ পৰা আৰম্ভ হোৱা এই প্ৰচেষ্টা এতিয়া গাঁওখনৰ শিশু আৰু যুৱক-যুৱতীসকলৰ বাবে কঠোৰ পৰিশ্ৰম, আশা আৰু উন্নত ভৱিষ্যতৰ নতুন পথ মুকলি কৰিছে। সমাজৰ সহযোগিতা এনেদৰে থাকিলে এই সৰু পুথিভঁৰালটোৱে বহু ডাঙৰ সপোনক বাস্তৱত পৰিণত কৰিব পাৰিব।
