বৰ্তমানলৈ বলিউডত বহুকেইখন চিনেমাত অভিনয় কৰিছে যদিও কেনী বসুমতাৰীৰ বাবে শ্বাহৰুখৰ 'জৱান' ছবিখন অতি বিশেষ। কিয়নো, এইবাৰ তেওঁ অভিনয় কৰিছে বলীউদৰ বাদশ্বাহ শ্বাহৰুখ খানৰ সৈতে। "শ্বাহৰুখ খানৰ সৈতে কাম কৰিব পোৱাটো মোৰ বাবে এক ডাঙৰ কথা। এতিয়ালৈকে মই যিমান বলিউডৰ ছবি কৰিছোঁ, এইখন আটাইতকৈ ডাঙৰ বোলছবি। সমগ্ৰ বিশ্বৰ কোটি কোটি লোকে এই ছবিখন উপভোগ কৰিব। ছবিখনত শ্বাহৰুখ খানে দ্বৈত চৰিত্ৰত অভিনয় কৰিছে। মুখ্য চৰিত্ৰটোৰ পিতৃ এগৰাকী সেনা আৰু তেওঁৰ এটা ৪ জনীয়া কামাণ্ডো দল আছে। সেই ৪ জনীয়া কামাণ্ডো দলৰ মই অন্যতম সদস্য। ছবিখনত আমাৰ অলপ এক্সনৰো দৃশ্য আছে।"
পূৰ্বতে অভিনয় কৰা বলিউডৰ চিনেমা আৰু ‘জৱান’ৰ মাজৰ পার্থক্যৰ কথা সোধাত কেনী বসুমতাৰীয়ে কয়, “এইখন যথেষ্ট ডাঙৰ বাজেটৰ চিনেমা। মই ইমান ডাঙৰ বাজেটৰ চিনেমা পূৰ্বতে কৰা নাই। আমি মুম্বাই আৰু চেন্নাইত শ্বুটিং কৰিছিলোঁ। চেন্নাইত শ্বুটিঙৰ বাবে এখন মহিলা জেলৰ ছেট বনাইছিল। সেই ছেটটো বনাওঁতে ৪৫ লাখ টকা খৰচ হৈছিল। জেলখনৰ দৃশ্যগ্ৰহণত অভিনয় কৰিবলৈ ২০০ ৰ পৰা ৩০০ জুনিয়ৰ আৰ্টিষ্ট আহিছিল। গতিকে এইখন এখন বহু ডাঙৰ স্কেলৰ ছবি। আমাৰ ইয়াত ৪৫ লাখ টকাত এখন ভাল বোলছবি শ্বুটিঙৰ পৰা মুক্তিলৈকে সম্পূৰ্ণ হৈ যায়। এদিন মই শ্বুটিঙত একাউন্টটেন্টক সুধিছিলোঁ যে এদিনত কিমান খৰছ হয়, তেওঁ মোক প্ৰায় ৭০ লাখ টকা এদিনত খৰছ হয় বুলি কৈছিল। গতিকে ২০০ ৰ পৰা ২৫০ কোটি টকা বাজেটৰ এখন ছবিত অভিনয় কৰাৰ সুযোগ পাইছোঁ, এইটোৱে মোৰ কাৰণে ডাঙৰ কথা।“
উল্লেখ্য যে, অসমীয়া ছবিজগততো কেনী বসুমতাৰীয়ে দৰ্শকৰ বিপুল সঁহাৰি লাভ কৰিবলৈ সক্ষম হৈছে। বৰ্তমানলৈ কম বাজেটত কেনীয়ে বহু কেইখন অসমীয়া বোলছবি নিৰ্মাণ কৰিছে আৰু ৰাইজৰ মৰম বুটলিবলৈ সক্ষম হৈছে।
অসমীয়া ছবিৰ কথা উল্লেখ কৰি কেনী বসুমতাৰীয়ে কয়; "কিছুমানে কয় যে মানুহে অসমীয়া চিনেমা নাচায়। কিন্তু শেহতীয়াকৈ কেইখনমান অসমীয়া চিনেমাই এই কথা ভুল বুলি প্ৰমাণিত কৰিছে। প্ৰথমতে চিনেমাখনৰ কাহিনী ভাল হ'ব লাগিব। চিনেমা এখন যদি চাৰিওফালৰ পৰা ভাল হয়, তেন্তে মানুহে চাবই। ডাঙৰ বাজেটৰ চিনেমা বনাবলৈ অসমত ছবিগৃহৰ সংখ্যা বৃদ্ধি হ'ব লাগিব”।
মনকৰিবলগীয়া যে, ২০২৪ চনৰ শিক্ষক দিৱসৰ দিনা কেনী বসুমতাৰীৰ পৰিচালনাৰে 'লোকেল কুম্ফু ৩' ছবিগৃহত মুকলি হ'ব।
চলিত বৰ্ষৰ শেষৰ ফালে ছবিখনৰ শ্বুটিং আৰম্ভ কৰা হ'ব। ইতিমধ্যে লোকেল কুম্ফু প্ৰথম আৰু দ্বিতীয়খনে দৰ্শকৰ ব্যাপক সমাদৰ লাভ কৰিবলৈ সক্ষম হৈছিল। তাৰ বাহিৰেও কেনীয়ে অভিনয় কৰা ‘জীয়া’ আৰু ‘গোলাই চুৰ’ নামৰ ছবি দুখনো শীঘ্ৰে মুক্তি লাভ কৰিব।
