গুৱাহাটী
মুখ্যমন্ত্ৰী হিমন্ত বিশ্ব শৰ্মাই দেওবাৰ অৰ্থাৎত ৩০ আগষ্টত জনোৱা মতে, অসম কেবিনেটে গুৱাহাটী চিকিৎসা মহাবিদ্যালয়ত প্ৰ’টন বিম থেৰাপী (Proton Beam Therapy)ৰ সুবিধা স্থাপনৰ বাবে ৬০০ কোটি টকাৰ অনুমোদন জনাইছে।
এই সুবিধা স্থাপন হ'লে ৰাজ্যখনত উন্নত মানৰ কৰ্কট ৰোগৰ চিকিৎসাৰ সুযোগ যথেষ্ট বৃদ্ধি পাব বুলি আশা কৰা হৈছে। মুখ্যমন্ত্ৰী শৰ্মাই কয় যে, প্ৰস্তাৱিত প্ৰ'টন বিম থেৰাপী যন্ত্ৰটো ভাৰতৰ ৰাজহুৱা স্বাস্থ্যসেৱা ব্যৱস্থাত প্ৰথমটো এনে সুবিধা হ'ব।
মুখ্যমন্ত্ৰীগৰাকীৰ মতে, এই সুবিধা স্থাপন হোৱাৰ পিছত গুৱাহাটী চিকিৎসা মহাবিদ্যালয় দেশৰ ৰাজহুৱা আৰু ব্যক্তিগত দুয়োটা খণ্ড মিলাই প্ৰ’টন বিম থেৰাপীৰ সুবিধা থকা তৃতীয়খন চিকিৎসালয়ত পৰিণত হ’ব।
প্ৰ’টন বিম থেৰাপী কিছুমান বিশেষ ধৰণৰ কৰ্কট ৰোগৰ চিকিৎসাত ব্যৱহাৰ কৰা হয়। এই প্ৰযুক্তিৰ জৰিয়তে ৰেডিয়েচন অধিক লক্ষ্যভিত্তিকভাৱে প্ৰয়োগ কৰিব পৰা যায়, যাৰ ফলত চাৰিওফালৰ সুস্থ কোষসমূহৰ ওপৰত ৰেডিয়েচনৰ প্ৰভাৱ তুলনামূলকভাৱে হ্ৰাস কৰাৰ সম্ভাৱনা থাকে। এই সুবিধাৰ জৰিয়তে কেৱল অসমৰেই নহয়, দেশৰ অন্যান্য প্ৰান্তৰ কৰ্কট ৰোগীসকলেও উন্নত চিকিৎসা লাভ কৰিব পাৰিব বুলি আশা কৰা হৈছে।
ইয়াৰ উপৰি আন এক গুৰুত্বপূৰ্ণ সিদ্ধান্তত অসম কেবিনেটে ৰাজ্যখনৰ বিভিন্ন বৃহৎ মূলধনী প্ৰকল্পৰ বাবে প্ৰায় ৫০,০০০ কোটি টকাৰ এক বিশেষ পেকেজত অনুমোদন জনাইছে।
মুখ্যমন্ত্ৰী শৰ্মাই জনোৱা মতে, এই পুঁজি ৰাজ্য চৰকাৰৰ নিজা সম্পদ, ৰাষ্ট্ৰীয় কৃষি আৰু গ্ৰামোন্নয়ন বেংক (NABARD)ৰ পৰা লোৱা ঋণ আৰু কেন্দ্ৰীয় চৰকাৰৰ বিভিন্ন আঁচনিৰ অধীনত উপলব্ধ পুঁজিৰ জৰিয়তে সংগ্ৰহ কৰা হ’ব।
এই বৃহৎ পেকেজৰ মূল গুৰুত্ব থাকিব প্ৰাথমিক স্বাস্থ্যসেৱাৰ আন্তঃগাঁথনি শক্তিশালী কৰা, বিদ্যালয় আৰু অংগনৱাড়ী কেন্দ্ৰসমূহৰ উন্নয়ন কৰাৰ লগতে চাহ বাগিচাৰ শ্ৰমিকসকলৰ বাবে গৃহ নিৰ্মাণৰ ক্ষেত্ৰত।
ইয়াৰ লগতে অসমৰ পথ আৰু বিদ্যুৎ সংযোগ ব্যৱস্থাও অধিক শক্তিশালী কৰাৰ বাবে পুঁজি আবণ্টন কৰা হ’ব। ৰাজ্যখনৰ বিভিন্ন অঞ্চলত বান প্ৰতিৰোধী মথাউৰি শক্তিশালী কৰাৰ বাবেও পেকেজটোৰ এটা অংশ ব্যৱহাৰ কৰা হ’ব।
চৰকাৰে এই বৃহৎ বিনিয়োগ পেকেজক ৰাজ্যখনৰ আন্তঃগাঁথনি আৰু জনসেৱাৰ ক্ষেত্ৰত এক ব্যাপক সম্প্ৰসাৰণমূলক কাৰ্যসূচী হিচাপে অভিহিত কৰিছে। স্বাস্থ্যসেৱা, শিক্ষা, যাতায়াত আৰু যোগাযোগ ব্যৱস্থা, বিদ্যুৎ যোগান, গৃহ নিৰ্মাণ আৰু বান নিয়ন্ত্ৰণৰ দৰে গুৰুত্বপূৰ্ণ খণ্ডসমূহক কেন্দ্ৰ কৰি এই পুঁজি ব্যয় কৰা হ’ব।
.webp "প্ৰতিনিধিত্বমূলক ছবি")
