গুৱাহাটী
বৃহস্পতিবাৰে পুৱতি নিশা ভূমিকম্পই জোকাৰি গ'ল অসম। পুৱা প্ৰায় তিনি বজাত সংঘটিত ভূমিকম্পৰ কম্পন গুৱাহাটীকে ধৰি ৰাজ্যৰ বিভিন্ন প্ৰান্তত অনুভূত হয়। আনহাতে, গভীৰ টোপনিত শোৱাপাটীত থকাৰ সময়ত সংঘটিত এই ভূমিকম্পত ৰাইজৰ মাজত এক আতংকৰ সৃষ্টি হয়।
ৰাষ্ট্ৰীয় ভূকম্পন কেন্দ্ৰই (এন চি এছ) জনোৱা অনুসৰি, বৃহস্পতিবাৰে পুৱতি নিশা সংঘটিত ভূমিকম্পটোৰ ৰিখটাৰ স্কেলত প্ৰাবল্য আছিল ৫ । ইয়াৰ উৎপত্তিস্থল মৰিগাঁও জিলা। এন চি এছৰ মতে, পুৱা ২.২৫ সংঘটিত হোৱা এই ভূমিকম্পটোৰ অভিকেন্দ্ৰ ভূপৃষ্ঠৰ পৰা ১৬ কিলোমিটাৰ গভীৰতাত।
"২৭ ফেব্ৰুৱাৰীত ভাৰতীয় সময় মতে পুৱা ২.২৫ বজাত ২৬.২৮ উত্তৰ অক্ষাংশ আৰু ৯২.২৪ পূব দ্ৰাঘিমাংশত অৱস্থিত অসমৰ ৫ প্ৰাবল্যৰ এটা ভূমিকম্প সংঘটিত হয় । ইয়াৰ গভীৰতা ১৬ কিঃমিঃ ।" এন চি এছৰ X হেণ্ডেলত উল্লেখ কৰিছে।
উল্লেখ্য যে, অসম আটাইতকৈ ভূকম্পন প্ৰৱণ অঞ্চলবোৰৰ ভিতৰত এটাত অৱস্থিত হোৱাৰ বাবে ইয়াত ভূমিকম্প সচৰাচৰ সংঘটিত হৈ থাকে। অসম হৈছে ভূকম্পন ক্ষেত্ৰ ৫-ৰ অন্তৰ্গত হয়। ইয়াৰ অৰ্থ হৈছে ৰাজ্যখনত শক্তিশালী ভূকম্পনৰ প্ৰবল সম্ভাৱনা আছে। অৱশ্যে বৃহস্পতিবাৰে সংঘটিত ভূমিকম্পটোৰ ফত হোৱা ক্ষয়-ক্ষতিৰ কোনো তথ্য লাভ কৰা হোৱা নাই।
উল্লেখ্য যে, বিগত বছৰবোৰত অসমত বহুকেইটা বৃহৎ ভূমিকম্প সংঘটিত হৈ গৈছে। ইয়াৰ ভিতৰত আটাইতকৈ শক্তিশালী আৰু ক্ষতিকাৰক ভূমিকম্প দুটা সংঘটিত হৈছিল ১৮৯৭ আৰু ১৯৫০ চনত। ১৯৫০ চনত অসম-তিব্বত ভূমিকম্প (৮.৬ প্ৰাবল্য) আৰু ১৮৯৭ চনৰ শ্বিলং ভূমিকম্প (৮.১ প্ৰাবল্য) দুটা ইতিহাসৰ আটাইতকৈ শক্তিশালী ভূমিকম্পৰ ভিতৰত পৰে।
