নতুন দিল্লী
চিভিল এভিয়েচনৰ সঞ্চালকালয় (DGCA)-এ এয়াৰবাছ A320 পৰিয়ালৰ কেইবাখনো মডেলৰ বিমান চলাচল নিষিদ্ধ কৰাৰ নিৰ্দেশনা জাৰি কৰিছে।
সহকাৰী সঞ্চালক নিশিকান্ত শৰ্মা স্বাক্ষৰিত এক নিৰ্দেশনাত কোৱা হৈছে যে প্ৰয়োজনীয় বাধ্যতামূলক সংশোধন আৰু বিমান যোগ্যতা নিৰ্দেশনাৱলী মানি নচলিলে এই নিৰ্দেশনাৰ অধীনত কোনো বিমান চলাব নোৱাৰিব। এই নিৰ্দেশনাত A319, A320 আৰু A321 বিমানৰ কেইবা প্ৰকাৰৰ লগতে এয়াৰবাছ A320 শ্ৰেণীৰ মডেলৰ বিস্তৃত পৰিসৰ অন্তৰ্ভুক্ত কৰা হৈছে।
এয়াৰবাছ A320 বিমানৰ বিশ্বব্যাপী তাৎক্ষণিক মেৰামতিৰ বাবে আহ্বান জনোৱাৰ পিছত এই পদক্ষেপ গ্ৰহণ কৰা হৈছে। A320 বিমানৰ সৈতে সংঘটিত এক ঘটনাৰ পিছত সাম্ভাৱ্য "সৌৰ বিকিৰণৰ আশংকা’ৰ কথা পোহৰলৈ আহে, যিয়ে বিমান নিয়ন্ত্ৰণৰ বাবে গুৰুত্বপূৰ্ণ তথ্য নষ্ট কৰিব পাৰে। এয়াৰবাছে অনুমান কৰা অনুসৰি ইয়াৰ ফলত সমগ্ৰ বিশ্বত প্ৰায় ৬,০০০ বিমান প্ৰভাৱিত হ'ব।
কোম্পানীটোৱে কয় যে ই আন্তৰ্জাতিক বিমান কৰ্তৃপক্ষৰ সৈতে কাম কৰি আছে আৰু ছফ্টৱেৰ আৰু হাৰ্ডৱেৰ সুৰক্ষা ব্যৱস্থাসমূহ কাৰ্যকৰী কৰাটো নিশ্চিত কৰিবলৈ এটা এলাৰ্ট অপাৰেটৰ ট্ৰান্সমিছন (AOT) জাৰি কৰিছে। ইউৰোপীয় সংঘৰ বিমান সুৰক্ষা সংস্থা (EASA)ৰ জৰুৰীকালীন বিমানযোগ্যতা নিৰ্দেশনাত এই AOT প্ৰতিফলিত হ’ব।
এই ঘটনাই সমগ্ৰ ভাৰততে বিমান যাত্ৰাত প্ৰভাৱ পেলোৱাৰ সম্ভাৱনা আছে, য'ত ঘৰুৱা বিমান সংস্থা এয়াৰ ইণ্ডিয়া আৰু ইণ্ডিগ'ই সাম্ভাৱ্য বিলম্ব আৰু সময়সূচীৰ সালসলনিৰ কথা সদৰী কৰিছে। দুয়োটা বিমান সংস্থাই কয় যে তেওঁলোকে এয়াৰবাছৰ সৈতে সমন্বয় স্থাপন কৰি আছে যাতে পৰীক্ষণ সম্পন্ন কৰিব পাৰে আৰু তেওঁলোকৰ A320 বিমানসমূহৰ প্ৰয়োজনীয় আপডেট ৰূপায়ণ কৰিব পাৰে।
এয়াৰ ইণ্ডিয়াই কয় যে এই নিৰ্দেশনাত তেওঁলোকৰ বিমানৰ কিছু অংশৰ 'ছফ্টৱেৰ/হার্ডৱেৰ পুনৰ সংযোজন'ৰ কথা জড়িত হৈ আছে। ইণ্ডিগ'ই যাত্ৰীসকলক আশ্বাস দিয়ে যে সুৰক্ষা তেওঁলোকৰ সৰ্বোচ্চ অগ্ৰাধিকাৰ আৰু পৰিদৰ্শনৰ সময়ছোৱাত হোৱা যিকোনো অসুবিধাৰ বাবে তেওঁলোকে ক্ষমা বিচাৰিছে।
